Read urhobo Job 20 Bible Online

Job 20 - urhobo bible

Job 20

¹Etiyin Zofa ohwo ri Naamat da kpahe.

²Ọtiọye na iroro mẹ da kpahe kẹ vwẹ, fikiridie okpakpa mẹ hẹ evun mẹ.

³Mi nyo ẹghwọ ro tu vwe oma, vwẹ evun rẹ ẹruọ mẹ erhi da kpahe kẹ vwẹ

⁴Wọ riẹn ọnana nẹ awanre rhe, rhabae re vwo phi ohwo phihọ akpọ,

⁵nẹ aghọghọ rẹ ohwo umwemwu pha krẹkrẹ, nẹ aghọghọ rẹ ohwo rọ riẹn Ọghẹnẹ-ẹ tọ-ọn?

⁶Owenẹ ugrogro rọye te odjuvwu dede, rẹ uyovwi rọye de te irharheghe dede,

⁷ọ cha ghwọrọ kufia bẹdẹ kerẹ isọn robọ rọye, ihwo re mrẹrẹ ejobi cha ta nẹ, Kọ rhọ vwo?

⁸Ọ cha rhan yanran kerẹ evwerhẹn, a gbe mrẹ-ẹ, a cha djẹ kufia kerẹ emramrẹ rẹ ason.

⁹Ẹro rọ mrẹrẹ nu gbe mrẹ ọfa-a, e gbi se ni ẹdia rọye ọfa-a.

¹⁰Emọ rọye ke cha guọnọ arọesiri rẹ ovwiogbere, abọ rọye che siobọ nẹ efe rọye.

¹¹Ibeku rọye vọnre vẹ ọgangan rẹ eghele, ẹkẹvuọvo ọ vẹ ọye gbe che shevwerhẹ vwẹ evun rẹ otọ na.

¹²Owenẹ umwemwu vwerha vwẹ unu rọye, owenẹ ọ djahere vwẹ otọ rẹ ẹrẹnvwe rọye.

¹³Owenẹ ọ rhovwe siobọ nọ-ọ dede, rọ da yọnrọn vwẹ unu rọye,

¹⁴dede na emuọre rọye cha rhẹriẹ vwẹ egede rọye; Ukpaphrẹ rẹ ovwẹ ọ dia vwẹ evun rọye.

¹⁵Ọ rọ efe nu ọ da rhoma kpa ayen; Ọghẹnẹ si ayen nẹ evun rọye rhe.

¹⁶Ọ fiọnfiọn obi rẹ ovwẹ; ẹrẹnvwe rẹ ọrobiebi che hwe vwobọ.

¹⁷O che se nẹ irhie na-a, ivwori rọ dje ọkere rẹ ọnyọn kugbe ameivie ro djeri.

¹⁸O che siobọ nẹ ibi rẹ iruo rọye, o se rhivwo rọ-ọ, ọ cha mrẹ aghọghọ vwẹ erere rẹ eki rọye na-a.

¹⁹Kidie ọ ghwọrọ ọgbere ọ da rha siọn, uwevwi rọ bọnre-e ọ gbọrhiro reyọ.

²⁰Fikiridie urhuru rọye basa-a, obo ri jere-e o se sivwo rhọ-ọ.

²¹Rọ vwọ re nu ọvuọvọ gbi chekọ-ọ, ọtiọye na efe rọye gbe tọ-ọn.

²²Vwẹ ọvọnvọn rẹ efe rọye yọ hẹ ọbẹvwẹ, ebabẹ rẹ umiovwo ejobi che bro rhe.

²³Rẹ evun rọye vwọ vọn nu Ọghẹnẹ de ji ophu ọtuatua rọye bro rhe, ọ da rhọ kuo kerẹ emuọre.

²⁴Ọ cha djẹ nẹ abọ rẹ ekuakua rẹ utehru; odada rẹ ẹronvwo che duvwo fi.

²⁵E siro e de yoro nẹ oma rọye, unegbe ro lo na de yoro nẹ ukpaphrẹ rọye rhe; uguegue da ruọ oma,

²⁶Ebri hwi ra hẹrhẹ efe rọye; erhanre re phophori-i kọye cha tọrhẹ; obo ro chekọ vwẹ utughẹ rọye cha torhẹ re.

²⁷Idjuvwu cha vwẹ orukuruku rọye phia, akpọ na ji che vrẹn vwọ suọ.

²⁸Ka cha ghwa ekuakua rẹ uwevwi rọye reyọ, ka cha ghwa yanran vwẹ ẹdẹ rẹ ọphu rẹ Ọghẹnẹ na.

²⁹Ọna ẹkẹn rẹ Ọghẹnẹ ghare kẹ ohwo umwemwu, ukuẹriọ rẹ Ọghẹnẹ ghwoghwiro kẹ.