Read urhobo Job 21 Bible Online

Job 21 - urhobo bible

Job 21

¹Etiyin Job da kpahe:

²Gba nabọ kerhọ rẹ eta mẹ, gbe jẹ ọnana dia uchebro wẹn.

³Vwo odiri kẹ vwẹ, re me ta, me da ta nu, wọ ke vwo vwẹ jehwẹ.

⁴Vwọ kẹ vwẹ, kẹ ohwo rẹ akpọ mi guẹ na? Die sorọ mi rhe vwo jẹ odiri evwo?

⁵Gbe ni vwe re o gbe we unu, rere wọ vwẹ obọ wẹn rhurhu unu wẹn.

⁶Ọke mi de roro ko gbe vwe unu, uvwo rẹ oma mẹ ko di muẹ kpogho.

⁷Die sorọ rẹ ohwo-umwemwu vwo herọ? ro vwo te ọkpako, o mi rhe vwo ẹgba rode?

⁸Eyere rẹ emọ rayen rhe ghwotọ vwe irharọ rayen, ọ re uvwiẹ rayen vwẹ irharo rayen.

⁹Uwevwi rayen nẹ abọ rẹ oshọ, ọkpọ rẹ Ọghẹnẹ ọ he enu raye-en.

¹⁰Irhuẹn eshare rayen vwiẹ yo vwo oba-a, irhuẹn rẹ eya ghwe vwiẹ jẹ djẹ emọ na nẹ oma-a.

¹¹Ayen jẹ imitete rayen kerẹ igegede, emọ rayen gbeha.

¹²Ayen vwẹ eshẹshẹghẹ vẹ isorogun so ine, edo rẹ akpata kọ vwerha ayen oma.

¹³Evun rẹ erhuvwu etiyin ayen da ghọghọ vwẹ ẹdẹ rẹ akpọ rayen, vwẹ evun rẹ ufuoma kẹ obo Erivwi ayen ra.

¹⁴Ayen ta kẹ Ọghẹnẹ nẹ, Bi nẹ avwanre oma! Ma guọnọ ẹriẹn rẹ idjerhe wẹ-ẹn.

¹⁵Die Ọrovwoẹgba epha, re ma vwọ ga? Didi erere ri te avwanre ọ da dianẹ ma nẹ ẹrhovwo kẹ?

¹⁶Nighe, erhuvwu rayen rha hẹ abọ raye-en? Iroro rẹ ohwo-umwemwu pha shesheri kẹ vwẹ.

¹⁷Bro ọke e fu urhukpẹ rẹ ohwo-umwemwu bute? Rẹ okpetu rayen de bru ayen ra? Rẹ Ọghẹnẹ da ghare odjadja vwẹ ophu rọye?

¹⁸Re ayen da họhọ ẹbe eyaya vwẹ obaro rẹ odju, re họhọ iphọphọ rẹ ogiribo djuẹ yanran?

¹⁹Wọ tare nẹ, Ọghẹnẹ sẹro rẹ orukuruku rayen hẹrhẹ emọ rayen. Jẹn ahwa osa rọyen kẹ oma rẹ ayen, rere ayen vwọ riẹn.

²⁰Jẹn ẹro rayen ọvo mrẹ ẹguọghọ rayen, jẹn ayen je da ophu rẹ Ọrovwoẹgba na.

²¹Die ọye avwerhe ayen vwọ kẹ uwevwi rayen vwẹ obuko rayen, vwẹ ọke re de bru nẹ emeravwe rayen?

²²Kẹ ohwo se yono Ọghẹnẹ erianriẹn, yẹ wọ mrẹre nẹ ọye guẹdjọ rẹ otu ri kpenu?

²³Ọvo mu ghwu vwẹ evun rẹ oyovwe rọye, rọ da dia vwẹ ofuvwegbe vwẹ ọke ejobi,

²⁴oma rọye vọnre vẹ ivwri otu rẹ esuanso rọye epha rhuọrhuọrhuọ.

²⁵Ọfa mi rhe ghwu vwẹ evun rẹ ivuemio-vwo rode, ọ je davwẹ emuesiri dẹvo-o.

²⁶O vwo ofẹnẹ-ẹ ayen ejobi shevwerhẹ ekpẹn re, ihori de rhurhu ayen.

²⁷Nighe me riẹn iroro wẹn, vẹ ona wẹn ru wo vwo gbe vwe kuẹ.

²⁸Kidie wọ tare nẹ, Uwevwi rẹ osun na rhọ? Utughẹ rẹ ohwo-umwemwu na dia rhọ?

²⁹Wo rha nọ vwẹ obọ rẹ ihwo re yan vwẹ idjerhe na-a, wọ rha reyọ iseri raye-en,

³⁰nẹ ohwo-umwemwu sa va abọ vwẹ ẹdẹ rẹ ukpokpogho, re de sivwo rhọ vwẹ ẹdẹ rẹ ophu?

³¹Ono djẹ idjerhe rọye kẹ rẹ ẹro rọye de te, ono hwa osa rẹ obo ro ruru kẹ?

³²Re vwo muo kpo obo ushi nu, a da rhẹrẹ ushi rọye.

³³Ẹrhẹnre rẹ iyara vwerhọma, eshare na ejobi de nene, otu re karo kẹ vwo unu-u.

³⁴Mavọ wọ vwẹ eta ifefe bru vwe uche krite? Emuọfa wọ rha kpahe kẹ vwẹ gbe herọ-ọ jokpa rẹ ofian ọvo.