Read urhobo Job 22 Bible Online

Job 22 - urhobo bible

Job 22

¹Etiyin Elifaz ohwo rẹ Teman da kpahe;

²Ohwo se fi erere kẹ Ọghẹnẹ? Omuẹro ohwo rọ ghwanre oma rọye ọ dia erere kẹ.

³Omavwerhovwẹ kẹ Ọrovwoẹgba ọ da dianẹ wọ dia ọvwata, eyẹ ke erere kẹ wo de je ekan evwo?

⁴Obo wọ vwọ djẹ oshọ rọye kọye ọ vwọ davwẹ owẹ nẹ, kọye o vwo nene we gu ẹdjọ na?

⁵Ọ dianẹ umwemwu wẹn re rhoro? Orukuruku wẹn vwo oba-a.

⁶Kidie wo gborho ivienwa rẹ imoni wẹn reyọ ekueku, wọ da ban emwa nẹ ayen ehu.

⁷Otu rẹ oma rhọ wọ kẹ ayen ame da-a, Otu rẹ owẹvwe hwe wọ kẹ ayen emuọre-e.

⁸Ohwo ro vwo ogangan kọye ri vwo otọ na, ohwo rọ mrẹ ẹroesiri kọye diarọ.

⁹Wọ djẹ eyauku kpo abọ ofefe, wọ guọghọ abọ rẹ emephrorivwi.

¹⁰Ọtiọye na a kpahe ifi riariẹ owẹ phihọ re, oshọ de mu we kpregede;

¹¹Urhukpẹ wẹn mu ebri, eriyin na wọ rha mrẹ orẹ-ẹ, ọkẹre rẹ ame rhurhu uwe

¹²Ọ dia Ọghẹnẹ ri kpenu vwẹ idjuvwu na? Gba mrẹ isio ri kpenu gangan na, mavọ ayen kpenu te!

¹³Fiki rẹ ọtiọye na wọ da ta nẹ, Die Ọghẹnẹ tobọ riẹn? Ọ sa wan ebri rode bru orhiẹn?

¹⁴Egho rode rhurhuro, ọtiọye na ọ rha mrẹ orẹ-ẹ, ọ yan vwẹ eghogho rẹ odjuvwu.

¹⁵Wo ji churobọ mu idjerhe rẹ awanre na rẹ ihwo umwemwu na wan re na?

¹⁶E fru ayen reyọ tavwe rẹ ọke rayen ki te; e ghwie uchivwọ rayen kufia.

¹⁷Ayen da ta kẹ Ọghẹnẹ nẹ, Bi nẹ avwanre oma, kidie Ọrovwoẹgba na se ru avwanre?

¹⁸Dede nẹ ọ ghwẹ emuesiri vọn iwevwi rayen, ẹkẹvuọvo iroro rẹ ohwo umwemwu sheri kẹ vwẹ.

¹⁹Ọvwata mrẹre ọ da ghọghọ; ihwo esiri hwẹ ayen viẹ,

²⁰tanẹ, Omuẹro ivwighrẹ rẹ avwanre e bru ayen kufia, obo rẹ ayen yan jovwo ẹrhanre ghwọrọ ayen.

²¹Wọ vẹ Ọghẹnẹ gba rhọvwe kugbe rere wo se vwo ufuoma, etiyin erhuvwu wan te we obọ.

²²Reyọ uyono nẹ unu rọye rhe, wo phi eta rọye phihọ udu wẹn.

²³Wo de rhivwi bru Ọrovwoẹgba ru wọ da vwẹ oma wẹn kpotọ, wo de si umwemwu shesheri nẹ utughẹ wẹn,

²⁴wo de bru oro phihọ iwurhie, wo de bru oro rẹ Ọfa phihọ ohri rẹ eragha rẹ ọkẹre djẹ wan,

²⁵ọ da dianẹ Ọrovwoẹgba dia oro wẹn, vẹ idọnọ eghaghare wẹn;

²⁶etiyin oma kọ vwerhẹ owẹ vwẹ evun rẹ Ọrovwoẹgba, kọ kpare opharo wẹn ra mrẹ Ọghẹnẹ.

²⁷Ku wọ nẹ ẹrhovwo wẹn kẹ, ko nyo we, ku wọ hwa osa rẹ ive wẹn.

²⁸Ku wọ jẹn iroro, ke ruo kẹ wẹ, urhukpẹ kọ la mu idjerhe wẹn.

²⁹Kidie Ọghẹnẹ si ọvweheri kpotọ, o mi sivwi ohwo rọ pha dẹndẹn.

³⁰O sivwẹ ohwo esiri, e che sivwi uwe fiki rẹ abọ wẹn re fonro.