Read urhobo Job 24 Bible Online

Job 24 - urhobo bible

Job 24

¹Die sorọ rẹ Ọrovwoẹgba rhe bru ọke rẹ orhiebro-o, die jabọ rẹ ihwo re riẹnrẹ rha mrẹ ẹdẹ rọye-e?

²Ihwo kparọ ughwru rẹ otọ; ayen fru igodẹ ayen me ghẹrẹ ayen.

³Ayen djẹ ekẹtẹkẹtẹ rẹ ọmọphrorivwi kuẹfia; ayen reyọ erhuẹn rẹ ayeuku vwo vienwan.

⁴Ayen gere ovwiogbere nẹ idjerhe, ivwiogbere rẹ akpọ na ejobi sioma rayen nu.

⁵Nighe, kerẹ ekẹtẹkẹtẹ rẹ aghwa vwẹ aton ọtiọye ayen kpo owian rayen, re guọnọ eranvwe muẹ ria vwẹ evun rẹ aghwa, kerẹ emuọre vwọ kẹ emọ rayen.

⁶Ayen gbeje emuọre rayen vwẹ evun rẹ aghwa ayen mie gbugbo ri vain vwẹ udju rẹ ohwo umwemwu.

⁷Ason na ejobi ayen mi shevwerhẹ ẹbẹba, amwa herọ-ọ, ayen ji vwo obo rẹ ayen vwo phopho oma vwẹ ekpahe na-a.

⁸Osio rẹ igbenu na kpọrhọ ayen oma, ayen mi churu mu oragha na kidie ayen vwo urhurho-o.

⁹(Ihwo evo herọ re sanvwẹ ọmọphrorivwi nẹ unu rẹ evie, re reyọ ọmọ rẹ ovwiogbere vwo viẹnvwan).

¹⁰Ayen yan ẹbẹba, amwa herọ-ọ, erhierhi ayen vwọ ghwa oghwa;

¹¹vwẹ ohri rẹ urhiẹ rẹ oliv rẹ ohwo umwemwu ayen de ruẹ evwri, ayen chihi okọ ri wain, ẹkẹvuọvo urhuru ji si ayen.

¹²Ọ ro ghwẹ rọ hẹ evun rẹ orere na re beroma, enwẹn rẹ ohwo ra woma re kpere se ọchuko; yẹ Ọghẹnẹ kerhọ rẹ ẹrhovwo raye-en.

¹³Ihwo evo herọ ri mu kpahe urhukpẹ, re vẹ idjerhe rọye riẹrioma-a, re dia idjerhe rọye-e.

¹⁴Ozighẹ vrẹn vwẹ evun rẹ ebri, rere o vwo hwe ovwiogbere vẹ ọrakpọbẹ; vwẹ evun rẹ ason ọ me họhọ oji.

¹⁵Ẹro rẹ igberadja je hẹrhẹ uvo rẹ ọphiẹvwe, tanẹ, Ẹro ọvuọvo cha mrẹ vwẹ-ẹ; o mi wene opharo rọye phihọ emu ọfa.

¹⁶Vwẹ evun rẹ ason ayen me tọn iwevwi fi, vwẹ oghẹruvo ayen mi huhu ẹchẹ gbe oma, ayen riẹn urhukpẹ-ẹ.

¹⁷Kidie okuku rode na ọye irhiọke kẹ ayen ejobi; kidie ayen ugbeyan rẹ obo ri muoshọ vwẹ ebri hwi na.

¹⁸Wọ da ta nẹ, Ọkẹre rode mu ayen kpata kpata wan enu rẹ ame; a harhẹ ẹkẹn rayen ekan vwẹ evun rẹ otọ na, ichihi edi ọvuọvo rhe hirhe aro ku udju ri vain raye-en.

¹⁹Uvo ọgangan vẹ oheri ya amẹ rẹ ibieragha na nu; eriyin Erivwi ji ru kẹ ihwo ri ru umwemwu.

²⁰Ayen chọrọ ẹro vwẹ esuada rẹ orere na, a rha karophihọ odẹ rayen ọfa-a, eriyin umwemwu vwirhẹn kerẹ urhe.

²¹Ẹgan ro vwo ọmọ-ọ kọye ayen ria, ayen ruẹ emuesiri kẹ ayeuku-u.

²²Dede na Ọghẹnẹ vwẹ ogangan rọye vwọ nẹrhẹ ọgba tọn; ayan vrẹn vwẹ ọke rẹ ofu de dje ayen.

²³Ọ kẹ ayun omafuvwe, a da chọ ayen uko; ẹro rọye nẹ idjerhe rayen.

²⁴Ayen de kpenu vwẹ ọmọke, yẹ ayen ghwe re, ayen vwioro, ayen yare kerẹ orhọn, ka nyavwẹ ayen kufia kerẹ erheghe rẹ emamọ.

²⁵Ọ rha dia ọtiọye-e, kono se dje nẹ mẹvwẹ ọvwọrefian, kono ri se dje kẹ vwẹ nẹ emuọvọ hẹ obo re me ta-a?