Read urhobo Job 27 Bible Online

Job 27 - urhobo bible

Job 27

¹Job da rhoma mu ikun rọye phihọ egbe, ta nẹ:

²Rẹ Ọghẹnẹ vwọ herọ na, ohwo rọ reyọ ẹkẹ mẹ mievwe na, te Ọrovwoẹgba na, ro ru ẹnwẹn mẹ muenu na,

³kirobo rẹ ẹnwẹn mẹ dia evun mẹ krite na, rẹ ẹnwẹn rọ Ọghẹnẹ da je hẹ inwe mẹ na,

⁴ẹbẹrunu mẹ sa vwọrọ efia-an, ẹrẹnvwe mẹ sa phiẹn ohwo-o.

⁵Re me vwọ ta nẹ wo shephihọ ọ e pha bẹnbẹn, rhiri bẹsiẹ mi vwo ghwu mi se ku ase mẹ fia-a.

⁶Me yọnrọn ọvwata mẹ kokoroko, mi che siobọ no-o; udu me ji bruhwe vwe ẹdẹ ọvuọvo-o.

⁷Jẹ ọvweghrẹ mẹ họhọ ohwo umwemwu, jẹ otu ri vrẹn vwọ so vwẹ họhọ ohwo ro jẹfuọn.

⁸Die iphiẹrohọ rẹ ohwo rọ ga Ọghẹnẹ-ẹ vwẹ ọke rẹ Ọghẹnẹ de bro kufia nu, vwẹ ọke rẹ Ọghẹnẹ da reyọ arhọ rọye nu?

⁹Kẹ Ọghẹnẹ se nyo oviẹ rọye, vwẹ ọke rẹ ukpokpoghọ de bro rhe?

¹⁰Kẹ oma sa vwerhọn vwẹ evun rẹ Ọrovwoẹgba na? O se se Ọghẹnẹ vwẹ ọke ejobi?

¹¹Mi che yono uwe obo rẹ obọ rẹ Ọghẹnẹ epha, me cha djahe obo ri rhe Ọrovwoẹgba na-a.

¹²Nighe, ovwan ejobi koko mrẹ rhe, kidie jabọ rẹ ovwan rhe vwọ koko dia ihwo diodi?

¹³Ẹkẹn rẹ Ọghẹnẹ ro te ohwo umwemwu, ọnana uku rẹ otu ri shenyẹ ihwọ mrẹ reyọ vwẹ obọ rẹ Orovwọẹgba na.

¹⁴Ọ da dianẹ emọ rọye buru, yi bu kẹ oda, ivwrọmọ rọye je sa re evun vọ-ọn.

¹⁵Otu ri ghwu chekọ emiavwe ko che shi ayen, eyauku rayen che beroma-a.

¹⁶Owenẹ ọ ghwẹ idọnọ koko kerẹ iwurhie dede, rọ da ghwẹ emwa koko kerẹ ophiẹn,

¹⁷Ọ sa ghwe ayen koko, ẹkẹvuọvo ohwo ọsoso ri che rhuo ayen, otu rẹ abọ rayen fonro cha ghare idọnọ na.

¹⁸Uwevwi rọ dovworo ọ họhọ avwrẹ rẹ anẹ, kerẹ ọgarivi rẹ ọrhẹrotọ.

¹⁹Ọ vẹ efe gbi kpo ehwa, ẹkẹvuọvo ọ rha dia ọtiọye ọfa-a; o vwo rhiẹ ẹro rọye, efe rọye gbe herọ-ọ.

²⁰Uguegue da ruo oma kerẹ oghwe; vwẹ ason ogiribo rode de muo yanran.

²¹Odju rẹ obaro ọnre kpaerọ kpenu ọ da wan vrẹn, o hwerhire nẹ ẹdia rọye.

²²O siaro phio rhe, onẹ ọtuatua ọ vwọ djẹ nẹ ẹgba rọye.

²³Ọ teyọ abọ phihọ oma, ọ da fiunu kẹ vwẹ ẹdia rọye.