Read urhobo Job 28 Bible Online

Job 28 - urhobo bible

Job 28

¹Omuẹro nẹ ọgọdọ rẹ idọnọ ghine herọ, ẹdia rẹ oro ra hworhe fon je herọ.

²Otọ ọye e siẹ utehru nẹ cha, a me wran ikọpa nẹ ogba rhe.

³Ihwo mi siobọ nẹ ebri, ra hiẹ otọ rẹ oba rẹ akpọ mrẹ ogba re siunu vwẹ ebri kokodo.

⁴Ayen me tọn inu fiẹ iyara shesheri nẹ asan rẹ ihwo dia, e da chọrọ eyọyan re wanvrẹn ẹro, a vwẹ ayen ya shesheri ke ihwo, ayen phieghe cha phieghe kpo.

⁵Akpọ na, emuọre ne cha, ẹkẹvuọvo obotọ rọye họhọ obo rẹ erhanre kurhẹriẹ.

⁶Eragha rọye eye asan rẹ ibieragha ri do ghrẹnghrẹn epha, o vwo ibiekpẹn rẹ oro.

⁷Ọphran ro hwe eranvwe na riẹn idjerhe yena-a, ibiẹro rẹ ọso je mrẹ-ẹ.

⁸Eranvwe ri herẹn ji chiyo-o, okpohrokpo je wanvrẹ-ẹn.

⁹Ohwo ghwẹ obọ rọye kpahe oragha ọgangan na, o ghwiẹ awọ rẹ igbenu na.

¹⁰O de bru mu phihọ eragha na, ibiẹro rọye da mrẹ emu ọghaghare ejobi.

¹¹O de gbe ito na rere ayen vwo jẹ ọkẹre ẹdjẹ, emu re sinu na ọ da vwọ phia.

¹²Ẹkẹvuọvo bovọ a da mrẹ aghwanre? Bovọ ẹdia rẹ eriariẹn epha vwo?

¹³Ohwo riẹn idjerhe ra wan ra-a, a mrẹ vwẹ otọ rẹ ihwo ekpokpọ-ọ.

¹⁴Asan okokodo na tare, ọ hẹ evun mẹ-ẹ, abadi na tare, O rhe vwe-e.

¹⁵A sa vwẹ oro dẹ-ẹ idọnọ ra vwanvwere se te unu ra dẹ-ẹ.

¹⁶A sa vwẹ unu rẹ oro rẹ Ọfa vwo dje-e, vwẹ ibieragha ọghaghare vẹ i ri lo ghrẹnghrẹn.

¹⁷Oro vẹ ughegbe e se vwo dje-e, eyẹ e se vwo wene irhu vẹ oro oyoyovwi-i.

¹⁸E rhe se ode rẹ ivie eyẹ evwarha ri lo wrowro-o, aghwanre ghare nọ irhu.

¹⁹A sa vwi topaz, rẹ Ẹtiopia dje-e, o ji vwo oro oghaghare re se vwo dje-e.

²⁰Ki bovọ aghwanre fiki nurhe? Bovọ ọhọ epha?

²¹E siro nu kẹ ihwo ekpokpọ, a da vwọ djahe kẹ emephran ri idadeghe na.

²²Erivwi vẹ Ughwu tare, Avwanre vwẹ erhọn rẹ avwanre nyo uwrẹn rọye.

²³Ọghẹnẹ ri vughe idjerhe rọye, ọye je riẹn asan rọ epha.

²⁴Kidie ọye ri mrẹ te oba rẹ akpọ na, ọ me mrẹ emu kemu ro hẹ otọ rẹ idjuvwu.

²⁵Ọke rọ da vwẹ ẹhọhọ rẹ odju kẹ, ọ vwanvwẹ obo rẹ ame teri.

²⁶O de ji urhi kẹ osio, o de ru idjerhe kẹ enuenyavwọn rẹ agbrara na;

²⁷kẹsiẹye ọ ke mrẹ o de ghwoghwo, o vwi ro mu, ọ da guọnọ phia.

²⁸Ọ da ta kẹ ohwo rẹ akpọ, Nighe, oshọ ẹdjẹ rẹ Ọrovwohwo, ọye aghwanre, oma re sinu umwemwu ọye ẹruọ