Read urhobo Job 3 Bible Online

Job 3 - urhobo bible

Job 3

¹Rẹ ọna vwọ wan nu Job de rhiẹ unu rọye ọ da harhe ẹdẹ re vwiẹrẹ.

³E jẹn ẹdẹ re vwiẹ vwẹ na ghwọrọ, vẹ ason rọ tare, Amrevun rẹ ọmọshare.

⁴Jẹn ẹdẹ yena mu ebri! Jẹn Ọghẹnẹ rẹ enu na sa guọnọ-ọ, eyẹ ukpẹ ji lo muo rhe-e.

⁵Jẹn okuku vẹ ebri rode reyọ. Jẹn egho mu vwe enu rọye, jẹn ebri rẹ ẹdẹ na djẹ oshọ muo.

⁶Ason yena jẹn ebri rode na muo reyọ! e jọ ghọghọ vwẹ ohri rẹ ẹdẹ rẹ ukpe na-a, e je kerẹ ba unu rẹ emeranvwe na-a.

⁷E, jẹn ason yena dia ofefe; e je nyo edo rẹ aghọghọ vwẹ ẹdẹ na-a.

⁸Jẹn otu re harhẹ ẹdẹ na harhọ, otu re riẹn obo ra rhọvwọ Okpodjerivwi.

⁹Jẹn isio rẹ ọke erhie rọye mu ebri, jo rhẹro rẹ orẹmrẹ ẹkẹvuọvo jo cha mrẹ-ẹ, ọ je mrẹ iphophẹro rẹ urhiọke-e;

¹⁰fikiridie o huhu ẹchẹ rẹ uwevwi rẹ oni mẹ-ẹ, o si ukpokpogho na nu kẹ ẹro mẹ-ẹ.

¹¹Die jabọ evwo ju vwe evwiẹ chora? ri mi vwo je ẹnwẹ efuo ri mi vwo shotọ?

¹²Die jabọ rẹ vwo mu vwe kpahe awọ? Eyẹ die jabọ ra vwọ vwẹ evie kẹ vwẹ vie?

¹³Kidie ọke yena ki mie shevwerhẹ totọ fọ gbiẹi, ke mia vwerhẹ, yi mi re rovwoma mẹ,

¹⁴vẹ ivie vẹ ediaguare rẹ akpọ na re nabọ tọn ushi kẹ oma rayen,

¹⁵eyẹ vẹ isun ri vwo iro, re ghwẹ idọnọ vọn iwevwi rayen.

¹⁶Eye kidie jabọ re gbi si vwe nu kerẹ ọmọ re vwiẹ chọra-a, kerẹ emọboba ro jẹ ọnre ẹ mrẹ-ẹ?

¹⁷Etiyin oruimwemwu de je ukpokpogho ẹmrẹ, etiyin ọ rẹ omarhọ de rovwoma.

¹⁸Etiyin ihwo re hẹ uwodi de rovwoma kugbe, ayen gbi nyo urhuru rẹ onotu rẹ iruo-o,

¹⁹Tẹ itete tẹ iride hẹ oboyi, eviẹn de nẹ abọ rẹ ọnini rọye.

²⁰Die jabọ ra vwọ vwẹ orẹmrẹ kẹ ohwo rọ hẹ ọdjarhe, ra da vwẹ arhọ kẹ ohwo rẹ akpọ muenu.

²¹Ọ rẹ urhuru rẹ ughwu sie, ẹkẹvuọvo yọ rhọvwa cha-a, rọ tọn otọ guọnọ kerẹ ohwo rọ guọnọ efe re sinu vwẹ otọ;

²²e re ghọghọ gangan, re oma vwerha, vwẹ ọke rẹ ayen da guọnọ ushi mrẹ?

²³Die jabọ ra vwọ kẹ ohwo rẹ idjerhe rọye djahere ọremre, Ọ rẹ Ọghẹnẹ brudje nure na?

²⁴Kidie irhivwẹ mẹ kọ de cha kerẹ ikara mẹ, enuebro mẹ kọ de mwavwa cha kerẹ ọkẹre rẹ ame.

²⁵Kidie obo re me djẹ kẹ kọye bru vwe rhe, ọ rẹ oshọ rọye mu vwe kọye te vwe oma.

²⁶Oma phẹ vwẹ-ẹ, eyẹ oma fu vwe-e, mi vwo omarovwo-o, ẹkẹvuọvo yẹ ukpokpogho bru vwe cha.