Read urhobo Job 30 Bible Online

Job 30 - urhobo bible

Job 30

¹Ẹkẹvuọvo asakiephana ayen ke vwẹ ovwẹ jehwẹ, ihwo re boba nọ vwẹ, ihwo re mia vwẹ esẹ rayen jehwẹ re de phi ayen ba erankọ rẹ uchuru mẹ.

²Didi erere me mrẹ vwẹ ogangan rẹ abọ rayen vwo, ihwo rẹ ẹgba rayen reri?

³Fiki rẹ ọbẹvwẹ vẹ owẹvwe ogangan, ayen ke gbẹrhiẹ otọ ọyaya ofefe na;

⁴ayen ke tọrọ erhọn vẹ ẹbe rẹ aghwa, ayen da vwẹ awọ rẹ uhwerhe sasa oma rayen.

⁵A djẹ ayen nẹ ohri rẹ ihwo; ayen kpere nene ayen kerẹ oji.

⁶Ukpọkẹre rẹ iyara ọye ayen asa rayen, inu re hẹ evun rẹ otọ vẹ evun rẹ eragha.

⁷Eye ayen bọn phihọ vwẹ uherevie rẹ aghwa; obotọ rẹ esokpọ ayen keke oma phihọ.

⁸Jẹ iroro evwo, uvwiẹ ro jẹ ọghọ evwo ọ da nẹrhẹ, a djẹ ayen nẹ otọ na.

⁹Asakiephana mẹvwẹ kẹ une rayen, kẹ omẹvwẹ ayen vwo brẹ ohare.

¹⁰Mi tu ayen oma, ayen kode kẹ vwẹ shesheri; ayen da ghwa mrẹ vwẹ ayen mi dje enya kufia.

¹¹Fikiridie Ọghẹnẹ rhan ufi mẹ ọ da kuọrọ ovwe kpotọ, ayen gbi se chirako vwẹ irharo mẹ-ẹ.

¹²Vwẹ obọrhe mẹ ihwo ogbarogba na de vrẹn, ayen da djẹ vwẹ kufia, ayen da kpare idjerhe rẹ eghwọrọ rayen vwọ phi vwe.

¹³Ayen de kporo idjerhe mẹ, ayen rhuọba okpetu mẹ, ohwo ọvuovo da ayen ji-i.

¹⁴Kerẹ uphrophro rode na ayen wan rhe, uherevie rọye ayen de ghorie okprukpru.

¹⁵Uguegue de rhi mu vwe; aphopho da fa ọghọ nẹ uvwe oma, oyovwe mẹ da ravwiẹ kerẹ eghọ.

¹⁶Asakiephana erhi mẹ kọ mwavwa hwẹ vwẹ evun mẹ, ẹdẹ rẹ ukpokpogho gba vwẹ koko hwẹn.

¹⁷Ason na ko kpogho ibeku mẹ, emiavwe rọ gbẹrhiẹ ovwẹ na rhe ju vwe nwẹ-ẹ.

¹⁸Ẹgba o vwo fru ewu mẹ reyọ, ọ gba vwẹ yariẹ kerẹ ohọre rẹ ewu mẹ.

¹⁹Ọghẹnẹ gere uvwe teye ibehre, mi de hirhe phihọ ekpẹn vẹ iwurhie.

²⁰Mi kperi se we wo nyo kẹ vwẹ-ẹ, mi mudia, wọ je kerhọ mẹ-ẹ.

²¹Wọ rhi hirhe phihọ ọvwọkọn kẹ vwẹ, ẹgba rẹ obọ wẹn na wo vwo kpokpo uvwe na.

²²We mu vwe phihọ enu rẹ odju, wọ da vwẹ ovwẹ djẹ vwẹ enu rọye, wo dju vwe rhe dju vwe kpo vwẹ evun rẹ ogirino na.

²³Uyota, me riẹnre nẹ wo che hwe vwe, wọ cha vwẹ ovwẹ kpo uwevwi re ve phihọ kẹ ihwo rẹ akpọ na ejobi.

²⁴Yẹ ohwo re ku erhurhu nyẹ nure gbe sa riẹn obọ rọye-e, rọ da nọ ekpẹn rẹ ọchuko vwẹ ukpokpogho rọye-e?

²⁵Me rha viẹ kẹ ohwo rẹ ọke gan kẹ? Ivun rhe miovwo uvwe fiki rẹ ivwio-gbere-e?

²⁶Ẹkẹvuọvo ọke me vwọ guọnọ erhuvwu, umiovwo koye rhere; me vwọ hẹrhẹ urhukpẹ, ebri da rhe.

²⁷Udu mẹ hẹ evun rẹ ogidi, ọ rha fọ-ọ, ẹdẹ rẹ ukpokpogho da rhe vwa vwẹ.

²⁸Me yan vwẹ ebri, ọ gbe dia uvo-o; Mi mudia vwẹ evun rẹ ọghwẹgbe na, mi de kperi se ọchuko,

²⁹Mẹvwẹ oniọvo rẹ erha, vẹ ugbeya rẹ igomugoro.

³⁰Ohọroma mẹ de rhi bi ọ da kpẹn nẹ uvwe oma, ibeku mẹ ke rhorha gidigidi.

³¹Isorogun mẹ hirhe phihọ omemuohọ, urephe mẹ de hirhe phihọ urhuru rẹ otu re viẹ.