Read urhobo Job 31 Bible Online

Job 31 - urhobo bible

Job 31

¹Me vẹ ẹro mẹ re ọphọ nure, komavọ mi ru se ni ọmọtọbẹ?

²Didi ẹkẹ Ọghẹnẹ cha vwọ kẹvwẹ nẹ obenu rhe, te ukuẹriọ mẹ ro che nẹ obọ rẹ Ọrovwoẹgba ejobi rhe vwẹ obenu?

³Ọ dianẹ uyovwemiovwo she vwa oruimwemwu, umiovwo ke rhe vwa otu ri ruẹ orukuruku?

⁴Ọ rha mrẹ idjerhe mẹ-ẹ, ro de kerẹ ichiyotọ mẹ-ẹ?

⁵Ọ da dianẹ mẹ yan nene ọvwọrefian, rẹ owọ mẹ de brọma ra ro ọphiẹvwẹ,

⁶(Ja vwẹ ovwanvwọn rẹ uyota vwavwe ovwẹ, e jẹ Ọghẹnẹ riẹn ọvwata mẹ!)

⁷Ọ da dianẹ ichiyotọ mẹ ghwru nẹ idjerhe na, rẹ udu mẹ da yan nene ẹro mẹ, rọ da dianẹ upe tamu abọ mẹ;

⁸gbe jẹn uvwe kọn, re ohwo ọfa re, re wo ji ghwie obo re djẹ kẹ vwẹ na kufia

⁹Ọ da dianẹ udu mẹ phiẹn vwẹ ra riẹriẹ aye, ri mi de re fiọnko vwẹ anurhoro rẹ ọrivẹ mẹ;

¹⁰e gbe jẹ aye mẹ nyẹnyẹ ako phihọ kẹ ohwo ọfa, re ihwo efa she rhurho.

¹¹Kidie ọyena kẹ umwemwu ọbrabra; ọyena kẹ orukuruku rẹ iguẹdjọ na che ru gangan

¹²kidie ọyena kọ dia erhanre rọ tua ra ro Erivwi, rọ cha torhẹ eyere mẹ to otọ.

¹³Ọ da dianẹ me siẹn iguegu rẹ odibo mẹ rẹ ọshare yẹrẹ ọ rẹ aye ri guẹ kpahe ovwẹ,

¹⁴kidie mi che ruẹ vwẹ ọke rẹ Ọghẹnẹ de vrẹn vwọ so ovwẹ? ro da guọnọ otọ rọye, kidie me kpahe kẹ?

¹⁵Ọ dia ọ rọ ma vwẹ phihọ evun na re je ma? Ọ dia ohwo ọvuọvo na re ma avwanre phihọ evun na?

¹⁶Ọ da dianẹ me vwẹ obo rẹ ovwiogbere guọnọre djahe obuko, eyẹ me da nẹrhẹ ẹhẹrhẹ bẹn ayeuku,

¹⁷eyẹ mẹvwẹ ọvo da re ukodo mẹ, rẹ ọmọphrorivwi rha re vwọ-ọ

¹⁸(kidie nẹ ọke emọ rhe me vwọ ghẹrẹ kerẹ ọse, me vwẹ ẹro te nẹ evun rẹ oni rọye rhe),

¹⁹ọ da dianẹ me mrẹ ohwo rẹ ẹbẹba hwe, eyẹ ovwiogbere rọ mrẹ amua vwo phopho-o;

²⁰ọ da dianẹ ehu rọye rhe jiri uvwe-e, ọ da dianẹ ẹto rẹ igegede mẹ rha nẹrhẹ oma rọye rhorho-o;

²¹ọ da dianẹ me kparẹ obọ mẹ vwọ teye ọmọphrorivwi; fikiridie me mrẹ ọchuko vwẹ anurhoro,

²²gbe jẹn ophapha rẹ igabọ me she no, gbe jẹn ugbobọ mẹ kpare nẹ ẹdia rọye.

²³Kidie me hẹ uguegue rẹ okpetu ro che nẹ obọ rẹ Ọghẹnẹ cha, mi gbi se yivwi hirhe aro ku ọrho rọye na-a.

²⁴Ọ da dianẹ oro kọye me vwẹ ẹro so, eyẹ oro ọghaghare kọye me vwẹ udu kpahe,

²⁵Ọ da dianẹ me ghọghọre fiki rẹ efe mẹ ro buru, eyẹ fikiridie obo mi vwori pha buebu;

²⁶ọ da dianẹ me bẹrẹ ẹro sa ọnre rọ vacha gala gala, eyẹ emeranvwe rọ yan vwẹ erhuvwu rọye,

²⁷ọ da bẹbẹ si udu mẹ reyọ, re unu mẹ da fiọnfiọn obọ mẹ,

²⁸ọnana je hẹ orukuruku rẹ ibrorhiẹ na che bru hwe, kidie ye me vwọrọ ofian kẹ Ọghẹnẹ ro hẹ obenu nure.

²⁹Ọ da dianẹ me ghọghọre vwẹ umiovwo rẹ ohwo ro kpokpo uvwe, eyẹ oma da vwerhovwẹ vwẹ ọke rẹ umiovwo de te oma

³⁰(me vwẹ unu mẹ ru umwemwu-u; ri mi de vwo duvwu iyori hwe-e);

³¹ọ da dianẹ ihwo rẹ utughẹ mẹ rha ta-a. Kono herọ rọ re emu rọye rẹ evun de jẹ ẹvọn?

³²(ọyoyan na ji wo phihọ ọsuere-e, mi rhiẹ ẹchẹ mẹ phihọ kẹ ọ rẹ oyan bẹn);

³³ọ da dianẹ mi si ogbeku mẹ nu kẹ ihwo, ri mi de si orukuruku mẹ nu vwẹ agada mẹ,

³⁴fikiridie oshọ rẹ urogho rode na mu vwe, rẹ ehwẹjẹ rẹ ekrun mẹ da djẹ oshọ mu vwe, ọtiọye mi de fotovwi, me rha ro otafe-e.

³⁵E, mane mi vwo ohwo ọvo ro nyo ọmẹ! (Mi siro phihọ etinẹ gbe jẹn Ọrovwoẹgba na kpahe kẹ vwẹ.)

³⁶Uyota ki mie muo kpahe igabọ mẹ, ke muo phihọ kerẹ erhu rẹ ovie,

³⁷Ki mie gbe ikun rẹ obo rẹ oyan mẹ teri ejobi kẹ; ki mie si kẹrẹ kerẹ osun.

³⁸Ọ da dianẹ otọ mẹ viẹ hwe vwe, rẹ inuerhẹ rọye de koko viẹ,

³⁹ọ da dianẹ me re emu ro nuro rhe ọphẹ, re me da so ughwu kẹ ihwo ri vworo;

⁴⁰egbe jẹn inwe djẹ phia vwẹ ẹdia rẹ eka na, jẹn ẹbe umwemwu djẹ rhe vwẹ ẹdia rẹ irosu. Eta rẹ Job reri.