Read urhobo Job 32 Bible Online

Job 32 - urhobo bible

Job 32

¹Etiyin eshare erha nana rha kpahe ki Job ọfa-a, fikiridie ọye ọvo se oma rọye ọvwata.

²Etiyin ophu de mu Elihu ọmọ rẹ Barakẹl rẹ ohwo rẹ Buz, ohwo rẹ uvwiẹ rẹ Ram. O de mu ophu kpahe Job fikiridie ọye ọvo brorhiẹ kẹ oma rọye nẹ ọ re ase ọ gbe rha dia Ọghẹnẹ-ẹ;

³ophu dede ji muo kpahe igbeyan erha ri Job na fikiridie ayen mrẹ ekpahọ vuọvọ vwọ kẹ-ẹ, yẹ ayen tare nẹ Job ru chọ.

⁴Asakiephana Elihu kọ hẹrhẹ rọ vwọ ta ota kẹ Job fikiridie ayen kpako nọ.

⁵Ọke rẹ Elihu rhe vwọ mrẹ nẹ ẹkpahọ rha herọ vwẹ unu rẹ eshare erha na-a, o de rhi muophu.

⁶Etiyin Elihu ọmọ ri Barakẹl ohwo rẹ Buz da kpahe: Mẹvwẹ omotete mi ruẹ, wọ kpako re; vwẹ ọtiọye na oshọ mu vwe mi de guegue re me vwọ ta evun mẹ kẹ wẹ.

⁷Me tare, gbe jẹn ẹdẹ na ta ota re ikpe buebu na yono aghwanrẹ.

⁸Ẹkẹvuọvo erhi rọ hẹ evun rẹ ohwo, ẹnwẹ rẹ Ọrovwoẹgba na, re sa vwẹ ọhọ vwọ kẹ.

⁹Ọ dia ekpakọ ọvo re ghwanre-e, ọ je dia ọkpako ọvo ri vwo ọhọ ro shehọ-ọ.

¹⁰Vwẹ ọtiọye na me tare, Kerhọn mẹ, ju vwe je ta evun mẹ phia.

¹¹Nighe, me ra hẹrhẹ eta wẹn, me ra kerhọn rẹ eta rẹ aghwanre wẹn na, ru wọ vwọ guọnọ obo ru wọ ta.

¹²Me nabọ kerhọn wẹ, gbe nighe, o vwo ohwo ro se gbe ota phihọ Job unu-u, eyẹ sa kpahe phihọ eta rọye, vwẹ ohri rẹ ovwan na-a.

¹³Jomaotọ eyẹ wọ da rha ta nẹ, Avwanre mrẹ aghwanre re; Ọghẹnẹ che phio kua, ọ dia ohwo-o.

¹⁴Ọ je gare eta rọye na vi vwe-e, me rha cha vwẹ eta rẹ ovwan na kpahe kẹ-ẹ.

¹⁵E gere ayen she, ayen rha kpahe ọfa-a, ayen rhe vwo ota rẹ ayen ta-a.

¹⁶Ke me cha hẹrhẹ, fikiridie ayen gbe kpahe ota-a, fikiridie ayen mudia etiyin ayen gbe kpahe ota ọfa-a?

¹⁷Ke me cha kpahe ọ mẹ, ki mi che djẹ iroro mẹ phia.

¹⁸Kidie eta vọn evun mẹ buebu, erhi rọ hẹ evun mẹ na kọye re da vwẹ jẹ.

¹⁹Nighe, udu mẹ kerẹ udi rọ mrẹ asan ghwọrọ wa-an; kerẹ ophiẹn rẹ udi ọkpokpọ, ro muegbe rọ vwọ bẹre.

²⁰Gbe ju vwe ta, rere mi vwo kuẹnwẹ; mi se rhiẹ unu mẹ re me kpahe.

²¹Me cha ghwoma nyẹ abọvo-o eyẹ vwo brugu phihọ ohwo ọvo oma-a.

²²Kidie me riẹn obo re brugu phihọ ohwo oma-a, Ọrọmavwẹ de rhi hwe vwe phẹrẹkpẹ.