Read urhobo Job 33 Bible Online

Job 33 - urhobo bible

Job 33

¹Ẹkẹvuọvo asakiephana, gbe nyo eta mẹ, E Job, re wọ kerhọn rẹ eta mẹ ejobi.

²Nighe, mi rhiẹ unu mẹ; ẹrẹnvwe rẹ unu mẹ herọ ta.

³Eta mẹ djẹ ọvwata rẹ udu mẹ phia, kugbe obo rẹ ẹbẹrunu mẹ riẹnre ayen ghwa ta gbagba.

⁴Erhi rẹ Ọghẹnẹ re ma vwẹ, ẹnwẹ rẹ Ọrovwoẹgba na re kẹ vwẹ arhọ.

⁵Wo de se ru, gba kpahe kẹ vwẹ; gba nabọ rhuẹrẹ eta wẹn phihọ dẹndẹn kẹ vwẹ; re wo mudia.

⁶Nighe, me herọ vwẹ obaro rẹ Ọghẹnẹ kirobo ru wọ epha, ubro rẹ ọphiẹn a je vwọ ma vwẹ rhe.

⁷Nighe, wo jẹ oshọ mẹ mu we-e, ekeke mẹ cha họhọ nọ kẹ wẹ-ẹ.

⁸Uyota, wọ ta kẹ vwẹ nyo re, mi nyo edo rẹ eta wẹn nure.

⁹Wọ tare, Me epha fuanfon mi vwo ọyanchọ-ọ, me fonro, orukuruku hẹ evun mẹ-ẹ.

¹⁰Nighe, ọ herọ guọnọ ota mẹ, ọ vwẹ ovwẹ ru ọvweghrẹ,

¹¹O phi awọ mẹ phihọ igoni, ọ da rhẹrẹ idjerhe mẹ ejobi.

¹²Nighe, wọ sa dia ọvwata vwẹ ọnana-a. Me cha kpahe kẹ wẹ. Ọghẹnẹ rho no ohwo.

¹³Die sorọ wo vwo nene họnra, tanẹ, Ọ rha kpahe phihọ ota mẹ ọvuọvo-o?

¹⁴Kidie Ọghẹnẹ ta ota vwẹ idjerhe ọvo, vwẹ idjerhe ivẹ, ye ohwo se vughe-e.

¹⁵Vwẹ evwerhẹn, vwẹ emramrẹ vwẹ ason, rẹ ovwerhẹn rode de mu ihwo, rẹ ayen da vwerhẹn vwẹ ehwa rayen,

¹⁶etiyin ko rhiẹ erhọn rẹ ihwo, ọ me vwẹ obo re cha phia guegue ayen,

¹⁷rere o vwo ku ohwo rhẹriẹ nẹ uruemu rọye, re o vwo si eheri nẹ ohwo oma,

¹⁸si ẹnwẹn rọye nẹ Ukpotọ na, rere ọ vwọ jẹ ughwu rẹ oda eghwo.

¹⁹A me vwẹ emiavwe fa ohwo vwẹ enu rẹ ehwa rọyẹ, ji kugbe ẹghwọ vwẹ ibeku rọye kọke kọke;

²⁰ọtiọye na emu kọ phuẹ arhọ rọye cha, emu ọvwevwerhe rhe we-e.

²¹Oma rọye da rhe don a rha sa mrẹ-ẹ, ibeku rọye ra mrẹ jovwo-o da sada phia.

²²Ẹnwẹ rọye de si kẹrẹ Ukpotọ na, arhọ rọye de si kẹrẹ otu yena re ghwa ughwu cha na.

²³Ọ da dianẹ amakashe herọ kẹ, ovwrohọnre, ọvo vwẹ uriori na, ro ghwoghwo kẹ ohwo emu ro fori kẹ,

²⁴yo nẹ arodọvwẹ rọye, ọ me ta, sivwo ro vwo je otọ rẹ Ukpotọ na ẹ ra; me mrẹ emu ra vwo tan re;

²⁵jẹn oma rọye rhe dia wọnwọn kerẹ oma rẹ emeghele, jẹn ogangan rẹ emeghele rhivwi bro rhe.

²⁶Etiyin ohwo ko nẹ ẹrhovwo kẹ Ọghẹnẹ, ọ me reyọ, ọ me vwẹ aghọghọ rhe obaro rọye. O mi gbe ikun rẹ esivwo rọye kẹ ihwo,

²⁷ọ da sọ ine vwẹ obaro rẹ ihwo, ta nẹ, Mi ru imwemwu, mi de ku emu esiri rhẹriẹ, a hwa osa rọye kẹ vwẹ-ẹ.

²⁸Ọ tan ẹnwẹ mẹ o gbi jọ yanran ra ro Ukpotọ na-a, arhọ mẹ kọ cha mrẹ urhukpẹ na.

²⁹Nighe, Ọghẹnẹ ri ru imu nana ejobi, asiava, asiarha, kẹ ohwo,

³⁰rere o vwo si ẹnwẹ rọye nẹ Ukpotọ na rhe, rere ọ vwọ mrasa mrẹ urhukpẹ rẹ arhọ na.

³¹Jomaotọ, E Job, kerhọn mẹ, fo tovwi rere me ta.

³²Wo de vwo obo re wọ ta, gba kpahe kẹ vwẹ; gba ta, kidie me guọnọre ni mi brorhiẹ kẹ wẹ.

³³Ọ rha dia ọtioye-e, gba kerhọn mẹ, fọ gbiei, re mi yono uwe aghwanre.