Read urhobo Job 34 Bible Online

Job 34 - urhobo bible

Job 34

¹Etiyin Elihu da ta:

²Nyo eta mẹ, ovwan evwaghwanre, re ovwan kerhọn mẹ, ovwan re vwo eriẹnrẹn na,

³kidie orhọn davwẹ eta nẹ kirobo rẹ ẹrẹnvwe davwẹ emuọre.

⁴Jẹn avwanre jẹ obo ro shephihọ, jẹn avwanre roro obo ro yovwiri vwẹ ohri rẹ avwanre.

⁵Kidie Job tare, Mẹvwẹ ọvwata, Ọghẹnẹ da reyọ ẹkẹ mẹ yanran,

⁶ukpe rẹ ẹkẹ mẹ vwo te vwe e de se vwe ọvwọrefian; owenẹ me chọ urhi-i dede na yẹ era mẹ kpori-i.

⁷Didi ohwo re họhọ Jọb, rọ da ehwẹjẹ kerẹ ame,

⁸rọ vẹ ihwo umwemwu gba yan usun, rọ yan nene ihwo umwemwu na?

⁹Kidie ọ tare, O fi erere kẹ ohwo re ọ vwọ ghọghọ vwẹ evun rẹ Ọghẹnẹ-ẹ.

¹⁰Eriyin na, we gbe nyo vwe, ovwan ihwe ri vwo ọhọ, ọbẹbẹ kẹ Ọrovwoẹgba na re o vwo ru chọ.

¹¹Kidie obo rẹ iruo rẹ ohwo epha ọtiọye ọ hwẹ osa rọye kẹ, obo rẹ idjerhe rọye epha ọtiọye ji ghwe te oma.

¹²Vwẹ ọ rẹ uyota, Ọghẹnẹ ru umwemwu-u, Ọrovwoẹgba je rhẹriẹ uyota-a.

¹³Ono vwẹ otọ na vwọ kẹ yọre, ono ji mu akpọ na soso nyẹ?

¹⁴Ọ da dianẹ ọ rhoma reyọ erhi rọye kẹ oma rọye, ro de koko ẹnwẹ rọye kẹ oma rọye,

¹⁵ugboma ejobi de ghwure, ohwo ko rhivwi kpo ekpẹn.

¹⁶Wo de vwo ọhọ gbe nyo ọnana, gba kerhọn rẹ obo re me ta na.

¹⁷Ohwo rẹ uyota tuoma se sun? ku wo bruhwe ohwo rọ dia ọvwata ro vwo ẹgba,

¹⁸rọ ta kẹ ovie nẹ, Orharhe na, kẹ ikpihwo nẹ, Iruimwemwu;

¹⁹ohwo ro nẹ isun ẹro-o na, ro se edafe gbẹ ohwo nọ ivwiogbere-e na, kidie ayen ejobi iruo rẹ obọ rọye?

²⁰Vwẹ aruẹbrẹ na ayen mi ghwe ghwu, vwẹ ogidi ason ihwo mi mu kpogho ayen me wanvrẹn, abọ re dia abọ rẹ ohwo rẹ akpo-o me reyọ ayen yanran.

²¹Kidie ẹro rọye hẹ idjerhe rẹ ohwo rẹ akpọ, ọ mrẹ ichiyotọ rọye ejobi.

²²Egho eyẹ ebri herọ rẹ iruimwemwu de sioma rẹ ayen nẹ-ẹ.

²³Kidie o bru ọke kẹ ohwo ọvuọvo-o ro vwo bru Ọghẹnẹ kpo ẹdjeguo-o.

²⁴Ọ guọnọ otọ rẹ ọgba na tavwe rọ ke guọghọ-ọ, o mi phi ihwo efa phihọ edia rayen,

²⁵Eriyin rọ vwọ riẹn iruo rayen nure na o mi gere ayen she vwẹ ason, a me guọghọ ayen vworovworo.

²⁶Ọ ghwiẹ ayen fiki rẹ umwemwu rayen vwe irharo rẹ ihwo ejobi,

²⁷fikiridie ayen ghwe oma phihọ akakọ ayen gbi nene-e, ayen gbe davwe erhọn rẹ idjerhe rọye-e,

²⁸ọtiọye ayen da nẹrhẹ oviẹ rẹ ovwiogbere bro rhe, o de nyo oviẹ rẹ otu re kpokpo —

²⁹Ọke rọ da fotovwi, kono se bruhwe? Ọke ro de si opharo rọye nu, kono re sa mrẹ, sẹ ẹgborho eyẹ ohwo ọvo?

³⁰nẹ ohwo rọ riẹn Ọghẹnẹ-ẹ sa re uvie-e, nẹ ọ sa kpahe ufi mu ihwo-o.

³¹Fikiridie kẹ ohwo ọvo ta kẹ Ọghẹnẹ dẹvure, Me re oja gangan; mi rhe duota ọfa-a;

³²gbe yono uvwẹ obo re me mrẹ-ẹ; ọ da dianẹ mi ru orukuruku, mi gbi ruo ọfa-a?

³³Kọ sa hwa osa ro te we ẹro, fikiridie wọ senrọ? Kidie we re jẹ, ọ rha dia omẹvwẹ-ẹ, vwẹ ọtiọye na gbe ghwoghwo obo wọ riẹnre.

³⁴Ihwo ri vwo ọhọ cha ta kẹ vwẹ, ọvwaghwanre ro nyo vwe cha ta:

³⁵Job vwẹ ugheghẹ ta ota, eta rọye vwo aghwanre-e.

³⁶Manẹ ka davwẹ Job ni rhi te oba, fikiridie ọ kpahe eta kerẹ ihwo umwemwu.

³⁷Kidie ọ vwẹ unuesiọ vwọ ba umwemwu rọye, ọ teye abọ rọye vwẹ uherevie rẹ avwanre, ọ ta eta kpahe Ọghẹnẹ buebu.