Read urhobo Job 36 Bible Online

Job 36 - urhobo bible

Job 36

¹Elihu da je ta nẹ:

²Chirako kẹ vwẹ emerha, re mi dje kẹ wẹ, kidie mi vwẹ emuọvo re me je cha ta phihọ abọ rẹ Ọghẹnẹ.

³Me cha reyọ erianriẹ mẹ nẹ ogboko rhe, mi che djẹ ọvwata rẹ Ọrọmavwẹ phia.

⁴Kidie uyota eta mẹ dia efia-an, ohwo rọ gbare vwe eriariẹn vẹ owẹ gba herọ na.

⁵Nighe, Ọghẹnẹ ọgba oruẹ, o nẹ ihwo saka-a; o vwo ẹgba vwẹ ogangan rẹ erianriẹn

⁶O yan jẹ oruimwemwu vwo ọkpokpọ-ọ, ẹkẹvuọvo ọ kẹ otu re shenyẹ ẹkẹn rayen.

⁷O si ẹro rọye nẹ evwata-a, ẹkẹvuọvo ọ phi ayen kugbe ivie vwẹ ekete rayen ọ me vwẹ ayen vi bẹdẹ, ka kpare ayen kpenu.

⁸Ọ da dianẹ a vwẹ ejọnrọn gba ayen dede ra da vwẹ ifi rẹ ukpokpogho vwo mu ayen,

⁹etiyin ọ ke vwẹ iruo rayen nẹ ayen ve imwemwu rayen, nẹ ayen herẹ gangan.

¹⁰O rhiẹ erhọn rayen phihọ kẹ uyono, o de ji iji nẹ ayen rhẹriẹ nẹ orukuruku,

¹¹O da dianẹ ayen kerhọn rẹ ayen da ga, ẹdẹ rayen kẹ gba vwẹ oyovwe, ikpe rayen ke vọn vẹ avwerhe.

¹²Ẹkẹvuọvo ayen rha kerhọ-ọn, oda kọ ghwọrọ ayen, ayen ki ghwu vwi jẹriẹn.

¹³Ohwo rọ riẹn Ọghẹnẹ vwẹ udu-u ophu je; ayen se kperẹ se ọchuko vwẹ ọke ra da gba aye-en.

¹⁴Ayen ghwẹ vwẹ imighele, arhọ rayen kọ mrẹ omavovwẹ.

¹⁵O sivwẹ ihwo re hẹ ukpokpogho nẹ ojaẹriọ rayen, ọ da vwẹ ọbẹvwẹ rhiẹ erhọn rayen.

¹⁶O siẹn ovwan nẹ ukpokpogho ra ro asan ophephẹ re de jẹ oma ekpirhophihọ, emu re mu phihọ imẹjẹ wẹn vọnre vẹ ivwri

¹⁷Ẹkẹvuọvo orhiebro rẹ ohwo umwemwu vọn ovwan oma; orhiebro vẹ ọsoso shabọ hẹ owẹ.

¹⁸Ni oma te eyẹ ivuemiovwo da rhe phiẹn we ra ro ehwẹjẹ; wo jẹn ọrho rẹ ẹtanhirhe ku we rhẹriẹ-ẹ

¹⁹Kẹ oviẹ wẹn se si we nẹ ukpokpogho, gbenẹ kẹ ogangan rẹ ẹgba wẹn?

²⁰Wo rhẹro rẹ ason na-a, ọke re de bru ihwo nẹ edia rayen na.

²¹Jomaotọ, wọ rhẹriẹ kpo orukuruku-u, kidie ọna ri je we nọ ojaẹriọ.

²²Nighe a kpare Ọghẹnẹ kpenu vwẹ ọrho rọye, ono oyono rọ họhe rọ?

²³Ono djẹ idjerhe rọye kẹ, eyẹ ono sa ta nẹ, Wo ru chọ?

²⁴Karohọ re wo jiri iruo rọye, ọ rẹ ihwo so une rọye na.

²⁵Ihwọ ejobi niro, ohwo dia ogboko de no.

²⁶Nighe, Ọghẹnẹ rhoro, yẹ avwanre riẹnre-e; asan riẹn unu rẹ ẹgbukpe rọye-e;

²⁷Kidie ọ si eghwẹghwẹ rẹ ame kpenu, o chere evwru rọye vwẹ evun rẹ osio

²⁸re enu rhọ phihọ otọ, o mi she teye ohwo patapata.

²⁹Kẹ ohwo sa riẹn obo rẹ enu na biẹ phihọ, agbrara vwẹ evun rẹ ighẹn rọye?

³⁰Nighe, ọ hra enuẹnyavwọ rọye yariẹ ema phihọ o de rhurhu awọ rẹ urhie na.

³¹Kidie vwẹ enana o vwo guẹdjọ rẹ ihwo; ọ vwẹ emuọre kẹ buebu.

³²Ọ vwẹ enuẹnyavwọ vwọ rhurhu abọ rọye, ọ da vuẹ nẹ o gbe phi oka na.

³³Ẹvan rọye djere phia kpahọ, ohwo rọ riọma vẹ ophu kpahe orukuruku na.