Read urhobo Job 37 Bible Online

Job 37 - urhobo bible

Job 37

¹Ọnana kọye udu mẹ kpogho kẹ, o de phonẹ ẹdia rọ epha.

²Kerhọn rẹ agbrara rẹ urhuru rọye vẹ edo rode ro nẹ unu rọye cha.

³Vwẹ otọ rẹ odjuvwu na o de siobọ no yanran, aroẹnyavwọ rọye re te ibienyẹ rẹ akpọ na ejobi.

⁴Urhuru rọye ko do nene; ọ vwẹ urhuru rẹ ọrho rọye van ọ da aroẹnyavwọ na ji vwẹ ọke ro vwo nyo urhuru rọye na-a.

⁵Ọghẹnẹ vwẹ urhuru rọye van gangan; o ruẹ imu ride rẹ avwanre sa riẹ-ẹn.

⁶Kidie ọ ta kẹ imicho nẹ, She phihọ akpọ na; vwọ kẹ eghwẹghwẹ rẹ osiọ vẹ osio ọ tare nẹ, Gba gan.

⁷Ọ pharẹ obọ rẹ ihwo ejobi koko, rere ihwo ejobi vwọ riẹn iruo rọye.

⁸Etiyin eranvwe na de kpo urhuẹn rayen, e da dia inu rayen.

⁹Ighẹn rọye odju nẹ cha, ekpahe de nẹ odju rọ hrare na rhe.

¹⁰Ẹnwẹ rẹ Ọghẹnẹ ọye imicho nẹ cha, ame rode na de djemu kokoroko.

¹¹Ọ ghwẹ ame vọn egho na, egho na re hra aroẹnyavwọ rọye na.

¹²Vwẹ isuesun rọye ayen vwo kiẹn ohrohribo na, rẹ ayen vwo ru obo ro ji iji kẹ ayen na gba vwẹ enu rẹ akpọ ra dia na.

¹³Owenẹ fiki rẹ ẹrhuẹrẹ phihọ, eyẹ fiki rẹ otọ rọye na, eyẹ fiki rẹ ẹguọnọ, o vwo ruo nẹ ọphia.

¹⁴Nyo ọnana, E Job; mudia fọ re wo roro iruo rẹ igbunu rẹ Ọghẹnẹ.

¹⁵Wọ riẹn obo rẹ Ọghẹnẹ ji iji rọye kẹ ayen te, ro de ru aroẹnyavwọ rẹ egho rọye lo.

¹⁶Wọ riẹn obo rẹ enu vwo phieghe ro vwo je she, iruo rẹ igbunu rẹ ohwo rẹ erianriẹ rọye ghare?

¹⁷Wẹ rẹ iwun rọye rhorha rẹ akpọ na da fọ riei fiki rẹ odju ro nẹ obọrhe ọnre cha?

¹⁸Ku wọ sa vwẹ ẹro kere ru wọ da riẹn irharheghe na vwọ hwa, rọ gan kpohro kerẹ ughegbe ro djeri?

¹⁹Yono avwanre obo re ma ta kẹ; avwanre se tuẹ ẹdjọ rẹ avwanre bro fiki rẹ ebri na-a.

²⁰Kono ta kẹ nẹ me cha ta ota? kẹ ohwo rhe roro kẹ oma rọye ne eche mu ọye rọ?

²¹Asakiephana ihwo rhe ni urhukpẹ na-a vwẹ ọke rọ da la vwẹ obenu, rẹ odju na wan ro de phorhẹ ayen nu.

²²Vwẹ obohwẹre ọnre oboyi uvo rẹ oro nẹ cha vẹ erhuvwu rọye; a vwẹ emwa ri udidi rhuo Ọghẹnẹ

²³Ọrovwoẹgba na — avwanre sa mrẹ-ẹ; ọ rhoro vwẹ ogangan vẹ ọsoso, ọvwata rode na ọ chọ urhi-i.

²⁴Fiki rẹ ọtioye ihwo rẹ akpo wa djẹ oshọ rọye; o se ohwo rọ ghwanre ọvuọvo gbẹ emu vwẹ evun rẹ aghwanrẹ rọye-e.