Read urhobo Job 38 Bible Online

Job 38 - urhobo bible

Job 38

¹Etiyin Ọrovwohwo da kpahe kẹ Job nẹ evun rẹ aphopho na rhe,

²Ọnana ono ri tighi iroro na rọ vwọ ta eta pruru ri vwo erianriẹ-ẹn?

³Chobie amwa wẹn kerẹ ọshare, me cha nọ wẹ enanọ, ku wọ kpahọ kẹ vwẹ

⁴Tivọ wọ epha ọke re me vwọ tọn uchivwo rẹ akpo na phihọ? Ta kẹ vwẹ, ọ da dianẹ wo vwo ọhọ

⁵Ono re jẹ iroro rẹ ovwanvwọn rọye — Uyota wọ riẹnre! Eyẹ kono rẹ riẹn ufi nene enu rọye?

⁶Didi emu a tọn phihọ esiri rọye, eyẹ kono re vwe ubienyẹ rọye vi.

⁷Ọke rẹ isio rẹ irhiọke vwọ sua ine kuẹgbe, rẹ emọ rẹ Ọghẹnẹ de kperẹ vẹ aghoghọ?

⁸Eyẹ kono re karẹ ẹchẹ gbe abadi na, ọke ro de turẹ nẹ ẹtẹrhe rọye rhe,

⁹re me vwọ ma irharheghe na vwọ dia ewun ro kuphiho, ebri hwi na nọ dia okpan ro vwo phopho,

¹⁰rọ de gbere ughwru kẹ, ro de phi egba vẹ ẹchẹ phihọ,

¹¹ọ da ta, Enẹ wọ yan ba, wọ yan vrẹn etiyi-in, etinẹ ọye egbogho wẹn rọ riọ puọpuọpuọ na yan ba?

¹²Ku wo se ji iji kẹ irhiọke na rhabae re wọ vwo herọ na, ru wọ da nẹrhẹ ọke ro rhie na riẹn asan rọye,

¹³rere o vwo shabọ phihọ ishamwa rẹ akpọ na, rere e vwo kpogho ohwo umwemwu she no?

¹⁴E wenire kerẹ ephiẹn vwẹ otọ rẹ ema na, e de chere kerẹ ewun.

¹⁵E fu urhukpẹ fiki rẹ ohwo umwemwu, obọ rọ kpare kpenu e vwirhiro.

¹⁶Wọ ro evun rẹ ogbugbu rẹ abadi re, eyẹ wọ yan vwẹ obo etan rẹ okokodo na re?

¹⁷A vwẹ anurhoro rẹ ughwu na phia kẹ wẹ re, eyẹ wọ mrẹ anurhoro okokodo rẹ ebri na rẹ?

¹⁸Wọ riẹn obo rẹ akpọ na hẹri te? Gbe ghwoghwo, ọ da dianẹ wọ riẹn ọnana.

¹⁹Tivọ a wan kpo asan rẹ orẹmrẹ dia, tivọ asan rẹ ebri,

²⁰rere wọ reyọ kpo ubrakpọ rọye rere wo vughe idjerhe ra wan kpo uwevwi rọye?

²¹Wọ riẹnre, kidie ọke yena e vwo vwiẹ wẹ, ẹdẹ rẹ akpọ wẹn pha buebu!

²²Wọ sa ro uwevwi rẹ imicho ghwẹ emu phihọ re, eyẹ wo mrẹ uwevwi rẹ osio rẹ erhanre ghwẹ emu phihọ,

²³re me sẹro rọye nu hẹrhẹ ọke rẹ ukpokpogho, kẹ ẹdẹ rẹ ohọnre vẹ ofovwi?

²⁴Tivọ idjerhe ra wan kpo asan ra da ghare orẹmrẹ? eyẹ tivọ a da hra odju rẹ obaro ọnre phihọ akpọ na?

²⁵Ono re tọn eghogho kẹ ọkẹre rẹ osio, kugbe idjerhe kẹ umomo rẹ agbrara,

²⁶rẹ osio vwọ rhọ phihọ otọ rẹ ohwo epha-a, vwẹ enu rẹ aton rẹ ohwo jẹ dia;

²⁷rẹ oma vwo djiro otọ ofefe vẹ otọ rẹ osha, rere otọ na vwo di ẹbe?

²⁸Osio na vwo ọsẹ, eyẹ kọnọ ri vwiẹ ibi rẹ irho na?

²⁹Evun rẹ ono ọye imicho na nurhe, eyẹ kono ri vwiẹ evwru rọ she nẹ enu cha na?

³⁰Ame na me rhe gan kerẹ oragha, enu rẹ urhie na mi rhi dje koi.

³¹Wo se churu ejọnrọn rẹ Emetasa, eyẹ wọ sa rhan ufi rẹ Enumedia?

³²Ku wo se sun Isio na phia vwẹ ọke rọye, eyẹ wo se sun Oniọmọvikẹ kugbe emọ rọye?

³³Wọ riẹn urhi re obo odjuvwu na? ko wo sa vwẹ urhi yena muotọ vwẹ akpọ obonẹ?

³⁴Wọ sa van re de nyo urhuru wẹn vwẹ irharheghe, rere ọghwe re ame rhi rhurhu uwe?

³⁵Wo se ji enu rọ nyavwaro na, rọ da ra rọ da ta kẹ wẹ nẹ, Avwanre na?

³⁶Ono ri phi iroro phihọ evun rẹ egho na, rọ vwẹ ọhọ vwọ kẹ evwru?

³⁷Ono sa vwẹ aghwanre rọye keri eghọ na? Eyẹ kono sa gẹrẹ ọkọkọ rẹ ame rẹ odjuvwu na?

³⁸ọke rẹ iwurhie na de rhi djemu koi rẹ ukori rọye na da rhe fan gbe kokoroko?

³⁹Ku wọ rha bẹrẹ ibefi kẹ okpohrokpo, eyẹ ku wọ se ghẹrẹ upene rẹ okpohrokpo,

⁴⁰vwẹ ọke ri de fiọnkọ phihọ unu rayen, eye ri de rhuen te otọ vwe ọgan rayen,

⁴¹Ono re kẹ okpemu obo ro ria, rẹ emọ boba rọye de kperẹ se Ọghẹnẹ, ri de beghe fikiridie emuọre kare ayen?