Read urhobo Job 39 Bible Online

Job 39 - urhobo bible

Job 39

¹Wọ riẹn ọke rẹ ẹvwe rọ dia ugbenu na vwo vwiẹ? Wo se nẹ obo rẹ uzo sua?

²Wo se kerẹ uche emeranvwe rẹ aye ghwa evun, wọ sa riẹn ọke rẹ ayen che vwo vwiẹ,

³vwẹ ọke rẹ ayen de fiọnko, rẹ ayen da chuọ uvwiẹ, kugbe ọke rẹ ayen de vwiẹ emọ boba nu?

⁴Emọ rayen me rhe gan, evun rẹ uphephẹ e da rhua, e me ro aghwa, I gbi rhivwi bru ayen ọfa-a.

⁵Ono ri siobọ nẹ ekẹtẹkẹtẹ rẹ aghwa nẹ o kpo ọphẹ? ono re rhan ufi nẹ awọ rẹ ekẹtẹkẹtẹ,

⁶ono me vwẹ ichochohri na kẹ nẹ ọ dia uwevwi rọye, otọ rẹ ughweraka na nẹ ọ dia ẹdia rọye?

⁷Ọ vwẹ edo rẹ orere na vwọ jehwe; ọ nyo ekpẹrẹ rẹ ihwo ri muẹ ighuvwu-u.

⁸Ọ rhuẹrẹ igbenu na phihọ kerẹ egbri rọye, ọ guọnọ asan kasan rẹ urhe ọkpokpọ epha.

⁹Erhuẹn rọ djoma choma rọ vwọ ga wẹ? Ọ sa dia urhuẹn wẹn vwẹ ason obọ?

¹⁰Wọ sa vwẹ ifi gba mu ikpotọ na, gbinẹ kọ gua iyara na nene uwe?

¹¹Wọ vwẹ ẹro suọ fikiridie ogangan rọye rhoro, ku wọ yan jẹ iruo wẹn vwo kẹ?

¹²Wo sere gbuyota nẹ o rhivwi cha, re wọ ghwa eka wẹn kpo utuwevwi rẹ ewuye?

¹³Ogomugoro ra vwẹ eheri teyẹ ibekpe rọye; ẹkẹvuọvo eye kẹ erhuvwu vẹ iphoro rẹ ẹguọnọ?

¹⁴Kidie ọ fa ekpẹn rhurhu ikẹn rọye, ọrhorho rẹ otọ na kọye muẹ ayen,

¹⁵ọ rha karophiho nẹ ohwo rẹ akpọ se chiyi ayen va-a, nẹ eranvwe rẹ aghwa se chiyi ayen muotọ-ọ.

¹⁶Ọ djoma kpahe emọ rọye, kerẹsiẹ ra mrẹ emọ rẹ ohwo ọfa, owenẹ ọ lagha oma kufia dede, yẹ oshọ muo-o,

¹⁷fikiridie Ọghẹnẹ miere iroro, ọ vwẹ ọhọ vwọ kẹ kakaka-a.

¹⁸Oke ro de vrẹn gidi nẹ ọye cha djẹ, ọ mẹ hwẹ iyesi vẹ ọ rọ gua kufia.

¹⁹Wẹ re vwẹ ẹgba vwọ kẹ iyesi? Wẹ re vwẹ ogangan muo ohọre?

²⁰Wẹ re nẹrhẹ o pho kerẹ abaka? Ekperẹ rọye na muoshọ gangnn.

²¹O chiyi oseke vwẹ evun rẹ iyara, ọ me vwẹ ogangan rọye mu oma kpenu; o pho ro otafe ra ya oda.

²²O mrẹ oshọ hwe, udu brọ-o; ọ mrẹ ọda dje-ẹ.

²³Edada na dju wan phọn, oda rọ nyavwaro vẹ oshuẹ.

²⁴Ophu vẹ ivuemiovwo ọye o vwo muẹ otọ rọ; owanre de hworo ko muẹ phariẹ.

²⁵Ọke rẹ owanre de hworo, o mi ku ẹnwẹ hi! O nyo ọnrhe rẹ ofovwi vwẹ ogboko, ẹvan rẹ oletu na, kugbe ekuvwie.

²⁶Ẹghwanre wẹn ọso vwọ rhan kpenu na, rọ da bẹre ibekpe rọye vwọ rhan kpo obọrhe ọnre?

²⁷Wẹ ri ji iji kẹ ugo nẹ ọ rha kpenu rere ọ bọn ẹho phihọ ọbo Irharheghe?

²⁸Obenu rẹ oragha ọ dia kẹ etiyin ọ bọn ẹho phihọ vwẹ obo evun ri chochohri rẹ oragha na.

²⁹Oboyi o de djuẹro nẹ obo ro che mu; ogboko ẹro rọye da mrẹ.

³⁰Emọ eboba rọye na ọbara e da; asan rẹ ukegbo epha etiyin a da mrẹ.