Read urhobo Job 5 Bible Online

Job 5 - urhobo bible

Job 5

¹Gbe se vwe asakiephana, kono ri nyo kẹ wẹ? Ono vwẹ otu rẹ fonro na wo rhivwi bru ra?

²Ghinẹ uyota ophuemuo hwe ẹkpa, omẹriọ hwe ovwibeghe.

³Me mrẹ ẹkpa rọ tan owọ ruotọ, ẹkẹvuọvo siẹvuọvo me da harhe ẹdia rọye.

⁴Emọ rọye pha shesheri kẹ ofuvwegbe, a guọghọ ayen vwẹ anurhoro, amrẹ ohwo ro sivwi aye-en.

⁵E rẹ owẹvwe hwe re orhọ rọye, evun rẹ iwe ọ cha reyọ nurhe; e rẹ urhuru rẹ ame hwe kuẹnwẹ nene efe rọye

⁶Kidie ọdjorho nẹ ekpẹn cha-a, eyẹ ukpokpogho je djẹ nẹ otọ cha-a;

⁷ẹkẹvuọvo evwiẹ ohwo teye ukpokpogho kirobo rẹ imwerhanre rhan kpenu.

⁸Vwọ kẹ vwẹ, Ọghẹnẹ me guọnọ, Ọghẹnẹ mi phi idjerhe mẹ phihọ obọ,

⁹ohwo ro ru imu ride re jẹ sa guọnọ phia na, imu ri gbunu re se kerẹ-ẹ na:

¹⁰ọye re rhọ osio phihọ akpọ na ọye re vwẹ ame ku aghwa na,

¹¹Ọ vwẹ otu rẹ obotọ kpenu, otu ri muomahọ ọ kpare ayen kpo ofuvwegbe.

¹²Ọ rhaphiẹ iroro rẹ ohwo rẹ ọphiẹ ihwo, eriyin na abọ rayen rhe ru emuọvo reyọ-ọ.

¹³O mu evwaghware vwẹ ọphiẹvwẹ rayen, iroro rẹ ọphiẹ che te oba nana nana.

¹⁴Ayen yan mrẹ ebri vwẹ oghẹruvo, ayen mi ghoro vwẹ uvo kerẹ ason.

¹⁵Ẹkẹvuọvo o sivwi emephrorivwi nẹ unu rayen, otu re hẹ ọbẹvwẹ nẹ obọ rẹ ọgba na.

¹⁶Ọtiọye ogbere ko vwo iphiẹrohọ, oshenyẹ ko rhurhu unu rọye.

¹⁷Nighe, aghọghọ kẹ ohwo rẹ Ọghẹnẹ ghwọku; fiki rẹ ọtiọye na wọ sian efafa re Ọrovwoẹgba na-a.

¹⁸Kidie ọ woma, ẹkẹvuọvo ọye ọvo me rha gba; ọ ghwiẹ, ẹkẹvuọvo yẹ obọ rọye sivwẹ.

¹⁹O che sivwi uwe nẹ okpetu esan, vwẹ ighwrẹ umiovwo ọvuọvo che te we oma-a.

²⁰Vwẹ ọke rẹ owẹvwe de fi o se sivwi uwe nẹ ughwu. O sivwi uwe nẹ ogangan rẹ ọlọkọ.

²¹E si we nẹ ehwẹjẹ rẹ ẹrẹnvwe, wọ cha djẹ oshọ vwẹ ọke rẹ ẹghwọrọ da rhe-e.

²²Vwẹ ọke rẹ ẹghwọrọ vẹ owẹvwe, wọ cha hwẹ, wọ gbe cha djẹ oshọ rẹ eranvwe rẹ akpọ-ọ.

²³Kidie wọ vẹ ibieragha rẹ aghwa na cha dia obọ, eranvwe rẹ aghwa na vẹ owẹ cha dia vwẹ ufuoma.

²⁴Ku wọ cha riẹn nẹ oma fuẹ utughẹ wẹn, wo de rhi ni ogba rẹ igegede wẹn, ọvuọvo che ghwru no-o.

²⁵Wo je cha riẹn nẹ uvwiẹ wẹn che buẹ gangan, emọ wẹn kerẹ odi rẹ otọ na.

²⁶Wọ cha ghwa gangan wo ki rhi ghwu, kirobo ra mwavwe eka phihọ uwuye vwẹ ọke ororo rọye.

²⁷Nighere, ọnana avwanre guọnọ phia, uyota oruẹ. Nyo, wọ riẹn vwọ kẹ erhuvwu wẹn.