Read urhobo Job 7 Bible Online

Job 7 - urhobo bible

Job 7

¹Ohwo rhe vwo owian ọbẹnbẹn vwẹ akpọ na, rẹ ẹdẹ rọye da họhọ ẹdẹ rẹ ohwo re durhie iruo?

²Kẹrẹ ọviẹn ro rhẹro rẹ uhoho, kerẹ ọ re durhieri ro rhẹro rẹ osa,

³eriyin a ghare emeranvwe ofefe te vwe, ason rẹ ọdjarhe kọye a ghare te vwe.

⁴Mi de sherhẹ ke me ta nẹ, Ọke vọ me vwọ rhọvwọ? Ẹkẹvuọvo ason na ji gro, ye me rọ manọ bẹsiẹ rẹ ọke vwo rhie.

⁵Ihori vẹ inuhu kru vwe fẹtẹ, ohọroma mẹ yamu, o de mu bẹre.

⁶Ẹdẹ mẹ ọphẹphẹre kerẹ ọghworuru rẹ orhuemwa, o de rhi te oba yẹ iphiẹrohọ herọ-ọ.

⁷Karohọ nẹ arhọ mẹ e pha kerẹ ẹnwẹ; ubiẹro mẹ gbe mrẹ emuesiri bẹdẹ-ẹ.

⁸Ubiẹro rẹ ohwo rọ mrẹ vwẹ nu gbi se ni vwe ọfa-a; rẹ ẹro wẹn vwo ni vwe na, ke me ghwa yanran.

⁹Kirobo rẹ egho ghofia ọ me ravwiẹ ye, eriyin ohwo ro kpo erivwi nu gbe cha ọfa-a;

¹⁰o gbi rhivwi kpo uwevwi rọye ọfa-a, edia rọye gbe riẹn ọfa-a.

¹¹Ọtiọye na mi gbi rhurhu unu mẹ-ẹ; odjadja rọ hẹ erhi mẹ me vwọ ta ota na; vwẹ evun rẹ ọdavwẹ rẹ ẹnwẹ mẹ mi de gu iguegu mẹ.

¹²Mẹvwẹ kẹ abadi, gbẹnẹ eniame, re wọ vwọ rhẹrẹ ovwẹ?

¹³Re me da ta, Ehwa mẹ che bru vwe uche, ehwa mẹ ko fue iguegu mẹ,

¹⁴etiyin wọ da vwẹ evwerhẹ guegue uvwe wọ da vwẹ emramrẹ djẹ oshọ mu vwe,

¹⁵ọtiọye na ufi mi phihọ ohọre kọye jevwe nọ ughwu kẹ ibeku mẹ.

¹⁶Arhọ mẹ ko tu vwe oma; me rha dia bede-e. Ju vwe vwo, kidie ẹdẹ mẹ họhọ enwẹkuo.

¹⁷Die ohwo epha, wo vwo bru otitivwe rọye ru wọ vwọ vwẹ iroro wẹn kpahọ,

¹⁸ru wo bro ra irhiọke kirhiọke, ru wo vwọ davwo ọke kọke?

¹⁹Mavo o krite ru wo vwo je ẹro esionẹ uvwe eyẹ wo rhe ju vwe vwo bẹsiẹ ri mi vwo rhivwi enya mẹ rọ-ọ?

²⁰Mi de ru umwemwu, kidie mi ru kẹ wẹ, wẹwẹ rọ rhẹrẹ ihwo na? Die jabọ wọ vwẹ ovwẹ ru oka wẹn? Mavọ me vwọ dia oghwa kẹ wẹ vwo?

²¹Die jabọ wọ rha vwẹ oruchọ mẹ ghovwo uvwe-e ru wo de si orukuruku mẹ nu-u? Asakiephana ki mi che sherhe ekpẹn, ku wọ cha guọnọ ovwẹ, ẹkẹvuọvo ye me gbe cha dia-a.