Read urhobo Job 8 Bible Online

Job 8 - urhobo bible

Job 8

¹Kọye Bildad rẹ ohwo rẹ Shua da kpahe.

²Mavọ wọ ta eta nana krite, rẹ eta rẹ unu wẹn da họhọ odju rode?

³Ọghẹnẹ kuẹ uyota rhẹriẹ? Gbenẹ Ọrovwoẹgba na rhẹriẹ ọsoso?

⁴Ọ da dianẹ emọ wẹn ru umwemwu kpahọ, ye o phi ayen phihọ obọ rẹ ogangan rẹ oruchọ rayen.

⁵O da dianẹ wọ guọnọ Ọghẹnẹ ru wọ da rhara abọ kẹ Ọrovwoegba na,

⁶wọ da fọn re wọ da dia ọsoso, omuẹro ko che vrẹn vwi fiki wẹ, rọ da vwẹ ẹdia ro fori hwa osa kẹ wẹ.

⁷Owenẹ ẹtuohọ wẹn havwere dede, Obuko rẹ akpọ wẹn cha rhua gangan.

⁸Kidie gba tobọ nọ, mẹ rẹ wẹ, ekpẹn rẹ akpọ rọ wanre, re wo roro obo rẹ esẹ na mrẹre;

⁹kidie avwanre họhọ ihwo rẹ odẹ rọ wanre, re riẹn emuọvo-o, kidie ẹdẹ rẹ avwanre vwẹ akpọ na uhoho diodi.

¹⁰Ayen gbi rhe yono uwe, rẹ ayen da ta kẹ wẹ, re ayen da ta eta nẹ erianriẹn rayen rhe?

¹¹Kẹ igbodigbo sa djẹ vwẹ asan rẹ ibehre epha-a? Egon se yovwi vwẹ asan re ame epha-a?

¹²Ọke rẹ ayen je vwọ kpa ipho na ra je nyavwe ayen te otọ-ọ na, ayen me kare ekakọn ri chekọ vwioro.

¹³Eriyin idjerhe rẹ otu rẹ Ọghẹnẹ chọẹro epha; iphiẹrohọ rẹ ohwo rọ riẹn Ọghẹnẹ-ẹ cha ghwọrọ

¹⁴Ẹroẹvwọsuọ rọye che bru ibribro, ẹroẹvwọkpahọ rọye pha kerẹ uwevwi rẹ ale.

¹⁵Ọ vwẹ oma rẹrẹ uwevwi rọye, ẹkẹvuọvo yo se mudia-a; o muro gbanọ, ẹkẹvuọvo ọ sa tọ-ọ.

¹⁶Ọ rọ rhua vwẹ obaro rẹ ọnre, abọ rọye da rhe hra phihọ vwẹ ogba rọye.

¹⁷Awọ rọye da rhe ghrẹn phihọ ẹko rẹ eragha na, ohri rẹ eragha kọye ọ dia.

¹⁸Ọ da dianẹ aghwọerọ nẹ ẹdia rọye, kọ phrọ, tanẹ, me je mrẹ wẹ dẹvo-o.

¹⁹Nighe, ọnana aghọghọ rẹ idjerhe rọye; vwẹ ekpẹn rẹ otọ na i ri chekọ cha djẹ nurhe.

²⁰Nighere, Ọghẹnẹ cha siẹn ohwo rọ re abe-e, eyẹ ọ je cha sa reyọ obọ rẹ oruimwemwu-u.

²¹Ọ cha vwẹ ehwẹ vọn unu wẹn, ẹbẹrunu wẹn vẹ ekpere rẹ aghọghọ.

²²Otu ri tuoma wẹ oma kọ vo ayen, utughẹ rẹ ohwo umwemwu gbe cha sa dia ọfa-a.