Read urhobo Job 9 Bible Online

Job 9 - urhobo bible

Job 9

¹Job da kpahe:

²Uyota, me riẹnre nẹ eriyin ọ epha. Ẹkẹvuọvo mavọ ohwo sa vwọ dia ọsoso vwẹ obaro rẹ Ọghẹnẹ?

³Ohwo da guọnọ nẹ ọye vẹ Ọghẹnẹ phro aphro; ohwo sa kpahe kẹ obọvo vwẹ abọ uriori-i.

⁴Ọ ghware vwẹ udu, ọgba vwẹ ogangan, ono re ga udu rọye kpahọ, rọ da kparobọ?

⁵Ọ rọ ghwiẹ igbenu nẹ, ayen gbe riẹ-ẹn, ro de geri ayen she vwẹ ophu rọye;

⁶ọ ro kpogho otọ na nẹ uchivwo rọye, re uchivwo rọye de kpọghọ;

⁷ọ ro ji urhi kẹ ọnre, rọ gbe va cha-a; ọ rọ huhẹ elo rẹ isio na.

⁸Ọ rẹ ọye ọvo riẹn idjuvwu vwọ tan, ro chiyi ọgbogho rẹ urhie na muotọ.

⁹Ọ rọ ma Emetasa vẹ Oniọhọvemọ na, vẹ ekru rẹ isio re ghwẹ koko vwẹ obọrhe rẹ ọnre.

¹⁰Ọ ro ru imu ride re jẹ riẹn na, vẹ imu rigbunu re je se kere.

¹¹Gbe no, ọ wan vwẹ vrẹn je me mrẹrẹ-ẹ, ọ yan hẹ obaro, yi mi vughire-e.

¹²Nighe, o frẹ reyọ, kono re sa daji? Kono re cha ta kẹ nẹ, Die wo ruẹ?

¹³Ọghẹnẹ che se ophu rọye reyọ-ọ; obotọ rọye ichuko re Rehab diguẹ phihọ.

¹⁴Mavo mi ru sa kpahe kẹ, re me vẹ ọye da phra aphro rẹ eta?

¹⁵Owenẹ me dia ọvwata dede, me sa kpahe kẹ-ẹ, Me rharabọ rẹ arodọvwẹ kẹ ọ ro mu vwe.

¹⁶Ọ da dianẹ mi sere rọ da kpahe kẹ vwe, mi che se segbuyota nẹ ọ kerhọn rẹ urhuru mẹ-ẹ.

¹⁷Kidie ọ vwẹ ogiribo guọghọ ovwẹ, o de ru era mẹ bu phihọ yẹ emuọvo sorọ-ọ,

¹⁸O ju vwe kuenwe me-e, ẹkẹvuọvo ọ da vwẹ ivuemiovwo vwọ vọn vwẹ evun.

¹⁹Ọ da dianẹ kẹ aphro rẹ ogangan, gbe no! Ọ da dianẹ kẹ ota rẹ orhiebro, kono se tuo?

²⁰Owenẹ me dia ohwo esiri dede, unu mẹ ọvo ji bruhwe vwe, owenẹ me re abe-e dede, ọ je mrẹ oruchọ vwẹ obọ me.

²¹Me re abe-e, mi se oma mẹ gbemu-u, arhọ mẹ fi emuọvo-o.

²²Ejobi ọvo, kọye me vwọ ta, ọ ghwọrọ evwata vẹ iruimwemwu.

²³Rẹ okpetu da ghwa ughwu ri kpregede rhe, kọ vwẹ uyovwi emiovwo rẹ ọvwata jehwe.

²⁴E phi akpọ na phihọ obo rẹ oruimwe-mwu, o rhurhu epharo rẹ iguedjo rọye — o rha ọye-e, kono ọ e pha?

²⁵Ẹdẹ mẹ phẹre no ọdjonẹ, e djẹ yanran, e mrẹ erhuvwu-u.

²⁶Ayen djuẹ wan kerẹ iphopho re eyareya, kerẹ ugo rọ rha re mu emu rọ re.

²⁷Ọ da dianẹ me tarẹ, iguẹgu mẹ cha chọrọ ovwẹ ẹro, me sasa opharo mẹ, re me ghọghọ,

²⁸Oshọ rẹ oja mẹ ko mu vwe, kidie me riẹnre nẹ wo che se vwe ọvwata-a.

²⁹E che bruhwe vwe; die jabọ me vwọ wian owian kufia?

³⁰Ọ da dianẹ me vwẹ imicho họ, re me da vwẹ odja hworhẹ abọ mẹ,

³¹dede na wọ je kpare ovwẹ phihọ ọgọdọ, re emwa robọ mẹ da sen vwẹ.

³²Kidie ọ dia ohwo, kerẹ omẹvwẹ-ẹ, re me da sa kpahe kẹ-ẹ, rere avwanre vwo dia onẹdjọ-ọ.

³³Obrorhiẹ ọvuọvo hẹ uherevie rẹ avwanre-e, rọ ghwẹ obọ rọye kpahe avwanre ivẹ na-a.

³⁴E jo si ọkpọ rọye na nẹ uvwe, wo jẹ uguegue rọye mu vwe oshọ-ọ.

³⁵Etiyin me da ta ota oshọ rọye gbi mu vwe-e, kidie me hẹ ọtiọye vwẹ evun mẹ-ẹ.