Read urhobo Une rẹ Ejiro 10 Bible Online

Une rẹ Ejiro 10 - urhobo bible

Une rẹ Ejiro 10

¹Die nẹrhẹ wo tephe, E Ọrovwohwo? Die wo vwo siẹ oma wẹn nẹ vwẹ ọke rẹ ukpokpogho?

²Vwẹ evwan rọ udu rọye ọye oruimwemwu vwọ tua ovwiogbere kpata kpata, jẹn ayen ọvo mu ufi rẹ egbẹnẹkẹ rẹ ayen kpahere na.

³Kidie oruimwemwu yeyan rẹ ẹguọnọ rẹ ohwo ro vwo urhuru rẹ erere harha ekan ọ je ghwa sia Ọrovwohwo.

⁴Vwẹ eheri re opharo rọye o rhe jẹn oruimwemwu guọnọ-ọ; iroro rọye ejobi ke ọ na nẹ, Ọghẹnẹ herọ-ọ.

⁵Idjerhe rọye yovwẹ vwe ọke ejobi; edjoeguo wẹn ọ hẹ obenu, e siro nu kẹ; vwọ keẹ ivwighrẹ rọye ejobi, ọ mienu phihọ ayen.

⁶O roro vwẹ udu rọye nẹ, E che se ghwie vwe-e; vwẹ evun rẹ uvwiẹ na ejobi me cha sa mrẹ okpetu-u.

⁷Unu rọye vọnre vẹ ekan vẹ ophiẹnvwe kugbe oshenyẹ, ogbigbiru vẹ orukuruku vọn otọ rẹ ẹrẹnvwe rọye.

⁸O tidia ghrọ phihọ vwẹ evun rẹ eko na; vwẹ evun rẹ odjahọ ọ da teyọ ọvwata hwe. Ẹro rọye bẹdẹ rhẹrẹ omiovwuyovwi,

⁹ọ rọ rhẹrẹ vwẹ odjahọ kerẹ okpohrokpo rọ fiọnko, o fiọnko rọ vwọ mrasan shabọ phihọ ovwiogbere, ọ shabọ phihọ ovwiogbere vwẹ ọke ro de kpono ro evun rẹ ariri rọye.

¹⁰O pho mu omiovwuyovwi ọ me guọghọ, shuo phihọ otọ, o mi she vwẹ oma rẹ ẹgba rọye.

¹¹O roro vwẹ udu rọye nẹ, Ọghẹnẹ gbe karọphihọ-ọ, o si opharo rọye nu, ọ gbe cha mrẹ bẹdẹ-ẹ.

¹²Vrẹn, E Ọrovwohwo, E Ọghẹnẹ, kpare obọ wẹn; wo jẹn ohwo re kpokpo chọrọ owẹ ẹro-o.

¹³Die nẹrhẹ oruimwemwu sen Ọghẹnẹ, rọ da ta vwẹ udu rọye, Wọ che kere ba oka-a?

¹⁴Wọ ghene mrẹ, uyota, wọ ka oka phihọ ukpokpogho kugbe ivuemiovwo rere wọ vwọ mrasan reyọ phihọ obọ wẹn; omiovwuyovwi phi oma rọye phihọ obọ wẹn; wọwẹ ọchuko rẹ ọmọphrorivwi.

¹⁵Vwirhi igbabọ rẹ ohwo ọbrabra vẹ oruimwemwu; guọnọ phia bẹsiẹ wo vwo jẹ mrẹ.

¹⁶Ọrovwohwo ovie rhiri bẹdẹ bẹdẹ; ẹgborho na cha ghwọrọ nẹ otọ rọye.

¹⁷E Ọrovwohwo, wẹ ri nyo ẹguọnọ re ohwo dẹndẹn, wo ru udu rayen gan, wọ kerhọn rayen

¹⁸wọ ru ọsoso ke ọmọphrorivwi kugbe ọ re shenyẹ, rere ohwo rọ dia ọ re akpọ na vwo je oshọ. ẹdjẹ mu ihwo wẹn ọfa.