Read urhobo Une rẹ Ejiro 102 Bible Online

Une rẹ Ejiro 102 - urhobo bible

Une rẹ Ejiro 102

¹Nyo ẹrhovwo mẹ, E Ọrovwohwo; jẹn oviẹ mẹ bru we rhe!

²Wo siẹ opharo wẹn nẹ kẹ vwẹ-ẹ vwe ẹdẹ rẹ ukpokpogho! Rhie erhọn wẹn phihọ kẹ vwẹ; kpahe kẹ vwe phẹrẹkpẹ vwẹ ẹdẹ ri mi de sẹ

³Kidie ẹdẹ mẹ ra wanvrẹn kerẹ ivwirhi, ibeku mẹ ra torhẹ kerẹ ẹkuerhanre.

⁴A nyavwe udu mẹ kerẹ odi, o de vwioro, Me gbe karohọ re emu mẹ-ẹ

⁵Fiki rẹ irhivwẹ ọgangan ri mi de ibeku mẹ da tamu uvwo mẹ.

⁶Ke me họhọ ekala rọ hẹ evun rẹ aghwa, kerẹ okpurhukpurhu rọ he evun rẹ etu,

⁷Mi de sherhẹ rhie ẹro phihọ, ke me họhọ ọmọphran rọ hẹ enu re uwevwi kpoghono.

⁸Vwẹ edẹ na ejobi ivwighrẹ mẹ ra bọphiẹ ovwẹ, otu ri brẹ ohare kẹ vwẹ ra vwẹ odẹ mẹ duvwu iyori.

⁹Kidie me ra ria iwurhie kerẹ ikara, Me da vwẹ oviẹ mẹ gua udi mẹ,

¹⁰Fiki re ophu vẹ ivuemiovwo wẹn; kidie wo mu vwe kpenu wo de phi vwe kufia.

¹¹Edẹ mẹ da họhọ uhoho re ovwọnvwọn; Mi vwioro kufia kerẹ odi.

¹²Ẹkẹvuọvo wọwẹ, E Ọrovwohwo, a vwẹ owẹ tidia ekete bẹdẹ; odẹ wẹn rhiri re te uvwiẹ na ejobi.

¹³Wo vrẹn re wọ rẹ ehrọre ri Zayọn; o te ọke re vwo ni ẹroesiri kẹ; ọke re bruru na gbare.

¹⁴Kidie idibo wẹn yọnrọn eragha rọye ghaghare, ọ da re ehrore rẹ iwurhie rọye.

¹⁵Ẹgborho na cha dje oshọ rẹ odẹ re Ọrovwohwo, ivie re akpọ na ejobi ke urinrin wẹn.

¹⁶Kidie Ọrovwohwo cha bọn Zayọn, ọ cha phia vwẹ urinrin rọye;

¹⁷o che mu ọghọ kẹ ẹrhovwo re ọvwuvwohwo, ọ gbe cha jẹ ọre rayen fia-a.

¹⁸Jẹ si ọnana phihọ otọ kẹ uvwiẹ rọ cha, ọtiọye na ihwo re che vwiẹ vwobọ ki jiri Ọrovwohwo na

¹⁹rere ọ wotọ nẹ obenu ọfuanfon rọye na rhe, nẹ ọbo odjuvwu rhe Ọrovwohwo de nẹ otọ na,

²⁰ro de nyo irhivwẹ rẹ ihwo ri uwodi, re e siobọ nẹ ihwo re brorhiẹn rẹ ughwu hwe;

²¹rere ihwo se ghwoghwo odẹ rẹ Ọrovwohwo na vwi Zayọn, vwi Jerusalẹm kẹ ejiro rọye,

²²vwe ọke re ihwo da ghwe koko, re uvie da ra ga Ọrovwohwo na.

²³O vwirhi ogangan mẹ vwẹ ugbo rẹ idjerhe, o bru edẹ mẹ krẹ.

²⁴E Ọghẹnẹ mẹ, me tare, wọ reyọ ovwẹ vwẹ uherevie rẹ ẹdẹ mẹ, wọwẹ rẹ ikpe rọye dia rhiri na vwe uvwiẹ ejobi na!

²⁵Nẹ awanre rhe wọ vwọ tọn uchivwo re akpọ na phihọ, idjuvwu na kẹ iruo rẹ abọ wẹn.

²⁶Ayen cha ghwọrọ, ẹkẹvuọvo wọ dia bẹdẹ; ayen cha nẹ kerẹ ewun. Wo che wene ayen kerẹ amwa, ke ayen cha wanvrẹn;

²⁷ẹkẹvuọvo wọwẹ abavo, ikpe wẹn se vwo oba-a

²⁸Emọ ro idibo wẹn cha dia vwẹ egbemọphẹ, uvwiẹ rayen re cha vwobọ ka tọn ayen phihọ vwẹ obaro wẹn.