Read urhobo Une rẹ Ejiro 104 Bible Online

Une rẹ Ejiro 104 - urhobo bible

Une rẹ Ejiro 104

¹Bruphihọ kẹ Ọrovwohwo, E erhi mẹ! E Ọrovwohwo Ọghẹnẹ mẹ, wọ rhoro gangan! Wọwẹ ra vwẹ ọghọ kugbe orhuarho vwo rhuo.

²We rọ vwẹ orẹmrẹ phopho oma kerẹ ewun, we re riẹn odjuvwu na phihọ kerẹ ibọkpọ,

³we re vwẹ ugbere vwo gberi enu rẹ ame na, we re vwẹ egho na vwo ru akpẹrẹ, wọ gua vwẹ ibekpe rẹ odju,

⁴rọ vwẹ odju na ru ọyinkọ wẹn, erhanre vẹ ogiderhanre kẹ igbodibo wẹn

⁵Wọwẹ re vwe uchivwo rẹ otọ na vi, rere o vwo je kpogho bẹdẹ.

⁶Wọwẹ re vwe okokodo na rhurho kerẹ ewun; ame na de mudia vwe obenu rẹ igbenu na.

⁷Vwe ẹghwọ wẹn kẹ ayen djẹ, vwẹ umri re agbrara wẹn kẹ ayen va djẹ.

⁸Igbenu na vrẹn mudia, iyara na de divwi kpotọ re asan ru wọ dje kẹ ayen.

⁹Wọwẹ ri gbere ughwru phihọ rẹ ayen jẹ sa shariẹ, rere ayen vwọ jẹn otọ na ekuo ọfa.

¹⁰Wọwẹ re nẹrhẹ ogbugbu na va nẹ iyara na rhe, re dje vwẹ uvwre rẹ igbenu na.

¹¹Ayen da vwẹ ame kẹ eranvwe rẹ udju na da, ekẹtẹkẹtẹ rẹ aghwa na de fue urhuru rayen.

¹²Vwẹ oma rayen eye emephran rẹ obenu na bọn ẹho phihọ, ayen mia sua ine vwẹ ohri re abọ rayen.

¹³Nẹ edia wẹn ro kpenu pheneke etiyin wo de ku ame kue igbenu na; evun vọn otọ na fiki rẹ emamọ re iruo wẹn.

¹⁴Wọwẹ re nẹrhẹ odi di vwọ ke uchuru na, kugbe irhe kẹ ohwo rọ kọn, rere ọ mrasan vwo emuọre nẹ otọ na rhe,

¹⁵kugbe udi rọ vwe omavwerhe ke udu rẹ ohwo, ori rere opharo rọye vwo lo, kugbe ikara rọ nẹrhẹ udu re ohwo gan.

¹⁶Irhe rẹ Ọrovwohwo e ku ame ku ayen buebu, igedu ri Lebanọn rọ kọnre.

¹⁷Vwẹ evun re ayen emephran na da bọn ẹho rayen; obo na bọn uwevwi rọye phihọ ohri rẹ uhi na.

¹⁸Enu rẹ igbenu pheneke na keye ẹvwe rẹ aghwa na dia, eragha na kẹ asan rẹ efiotọ na de si oma nẹ.

¹⁹Wọwẹ re ma emeranvwe re ọ ka oka phihọ evwru, ọnre na riẹn ọke ro vwo she.

²⁰Wọwẹ ri ru ebri, ọ me dia ason, ọke rẹ eranvwe rẹ egbo na da rara phia

²¹Upene rẹ okpohrokpo kperẹ kẹ emu rayen, re guọnọ emuọre rayen nẹ obọ rẹ Ọghẹnẹ cha.

²²Ọke rẹ ọnre da varhe, ayen me djẹ yanran ayen mi re rhuẹn vwẹ evun rẹ unu rayen.

²³Ohwo me yanran kpo iruo rọye ọ me wian rhiri re te ovwọnvwọn.

²⁴E Ọrovwohwo, mavọ iruo wẹn bu te! Ẹghwanre wọ vwọ ma ayen ejobi, otọ na vọnre vẹ emama wẹn.

²⁵Oboyi abadi na epha, rhuarho hẹhẹre, ro biẹ vẹ ekuakua re je se kere, ekuakua ekpokpọ te iride te itete.

²⁶Etiyin ekọ ride na da gua, kugbe orhoro ru wọ tanẹ ọ ha eha vwẹ evun rọye.

²⁷Enana ejobi wẹn ayen nẹ, ru wo ke ayen emuọre rayen vwẹ ọke ro fori.

²⁸Ọke wọ da ghwẹ ke ayen, ayen me ghwẹ koko; ọke wo de rhie obọ wẹn, ayen me rhe vọn vẹ emu esiri.

²⁹Ọke wo de si opharo wẹn nu, ofu ko dje ayen, ọke wọ de si ẹnwẹ nẹ ayen oma, ayen ki ghwẹ ayen mi rhivwi kpọ iwurhie rayen.

³⁰Ọke wo de ji Erhi wẹn, ka mama ayen; wọ me rhoma ru opharo rẹ otọ na phihọ ọkpokpọ.

³¹Jẹn urinrin rẹ Ọrovwohwo dia rhiri bẹdẹ, jẹn Ọrovwohwo ghọghọ vwẹ evun rẹ iruo rọye,

³²ro nẹ otọ na o mi kpogho, rọ vwẹ obọ te igbenu na ke ayen bru ivwirhi!

³³Me so ine kẹ Ọrovwohwo kirobo re me dia krite; Me so ejiro kẹ Ọghẹnẹ vwẹ ọke mi ji vwo vwo arhọ na.

³⁴Jẹn umẹ ese mẹ je kidie me ghọghọ vwẹ evun rẹ Ọrovwohwo na.

³⁵Jẹn a torhẹ iruimwemwu nẹ otọ na, e gbi jẹ ohwo umwemwu dia-a. Bruphihọ keẹ Ọrovwohwo, E erhi mẹ! Jiri Ọrovwohwo na!