Read urhobo Une rẹ Ejiro 105 Bible Online

Une rẹ Ejiro 105 - urhobo bible

Une rẹ Ejiro 105

¹E vwẹ ẹkpẹvwẹ kẹ Ọrovwohwo na, se odẹ rọye, ja riẹn uruemu rọye vwe ohri re ihwo na!

²So une ke, so ejiro ke, gbe ikun re iruo re igbunu rọye!

³Urinrin vwe evun re odẹ ọfuanfọn rọye, jẹn udu rẹ guọnọ Ọrovwohwo ghọghọ!

⁴Guọnọ Ọrovwohwo kugbe ogangan rọye, guọnọ opharo rọye kọke kọke!

⁵Karohọ iruo re igbunu ro ruru, iruo re igbunu rọye, kugbe ọrhiẹn ro bruru,

⁶E uvwiẹ re Ebraham odibo rọye, emọ ri Jekọp, ihwo rọye rọ jẹreyọ!

⁷Ọye Ọrovwohwo Ọghẹnẹ rẹ avwanre, orhiebro rọye he evun re akpọ na ejobi.

⁸O davwerhọn re ọphọ rọye bẹdẹ, vwẹ ota ro ji urhi rọye, kẹ uvwiẹ uriori,

⁹ọphọ na rọ veẹ Ebraham rere, ive rọye rọ veri kẹ Aizik,

¹⁰rọ ru gan ki Jekọp kerẹ iji, kẹ Izrẹl kerẹ ọphọ ri rhiri bẹdẹ,

¹¹tanẹ, Wẹ me vwẹ otọ ri Kenan na kẹ kerẹ ẹkẹn uku wẹn.

¹²Ọke re ayen vwọ epha tutuno, ri fi emuọvo-o, eyoyan ri di muẹ yan vwẹ evun rọye,

¹³re de yan nẹ ẹgborho kpo ẹgborho, nẹ uvie ọvo kpo ihwo ọfa,

¹⁴ọ rhọvwe nẹ ohwo ọvuọvo shenyẹ ayen; ọ ghwọ ku ivie fiki rayen,

¹⁵tanẹ, Wa vwẹ obo te ọ rẹ me vwẹ evwri ghworo na-a, wọ wan emraro mẹ oma-a!

¹⁶Ọke ro vwo se ewẹvwe rhe otọ na ro vwo vwirhi ọkpọ rẹ ikara,

¹⁷o de ji ohwo ka obaro kẹ ayen, Josẹf, ra she kpo ọviẹn.

¹⁸Igoni da kpẹn awọ rọye, e de phi ohọre rọye phihọ ọghrọrọ re utehru,

¹⁹bẹsiẹ re obo rọ tare cha vwọ phia ota re Ọrovwohwo kọ davwọ ni.

²⁰Ovie na de ji ikọn re siobọ no, osun re ihwo na de siobọ no kpo;

²¹o de vwo ru olori rẹ uwevwi rọye, kugbe osun rẹ eyere rọye ejobi,

²²no yono isun rọye obo ri jere, kugbe rere o yono ekpako rọye aghwanre.

²³Etiyin Izrẹl da rhe Ijipt; Jekọp de ghoro vwẹ otọ ri Ham.

²⁴Ọrovwohwo na da nẹrhẹ ihwo rọye bu gangan, o de ru ayen gan no ivwighrẹ rayen.

²⁵O de ku udu rayen rhẹriẹ vwo tuoma rẹ ihwo rọye, re ayen vwẹ ọnko nene idibo rọye yeri.

²⁶O de ji odibo rọye Mosis, kugbe Erọn rọ jẹreyo.

²⁷Ayen da vwe oka rọye phia vwẹ ohri rẹ ayen, kugbe igbunu vwẹ otọ ri Ham.

²⁸O de ji ebri, ọ da nẹrhẹ otọ na mu egho, ayen de mu kpahe eta rọye.

²⁹O de hirhe ame rayen phihọ ọbara, ọ da nẹrhẹ iyeri rayen ghwu.

³⁰Otọ rayen ko biẹyi vẹ igoro, tobọ rho ke evun re ivun rẹ ivie rayen.

³¹O ta ota, etiyin iyẹn de bru rhe, etọre da rhe vọn orho rayen ejobi.

³²O da vwẹ ibiosio rẹ erhanre roro osio kẹ ayen, kugbe enuẹnyavwọ rọ rọ nene otọ rayen ejobi.

³³O da guọghọ vain rayen kugbe irhe ri fig rayen, o de vwirhi irhe rẹ orho rayen ejobi.

³⁴Ọ ta ota, ebaka da rhe, emọ rẹ ebaka ri vwo unu-u,

³⁵re re irhe rẹ otọ rayen ejobi re e da re ekankọn re otọ rayen ejobi nu.

³⁶Ọ da teye emekpako rẹ otọ rayen hwe, ọtuvwiẹ rẹ ogangan rayen ejobi.

³⁷Etiyin o de sun Izrẹl kpo vẹ idọnọ kugbe oro, o gbi vwo ọvuọvo vwẹ ohri rẹ orua rọye na rọ yenghrẹnre-e.

³⁸Ijipt da ghọghọ re ayen vwo mu oyan, kidie uguegue rẹ ayen ro ayen oma,

³⁹Ọ da vwẹ egho vwo rhurhu ayen, erhanre kọ rha vwẹ orẹmrẹ kẹ ayen.

⁴⁰Ayen nọre, ọ da vwẹ irurẹ kẹ ayen ọ da vwe ikara ne obo odjuvwu rhe buebu.

⁴¹O de rhie oragha, ame da mwavwe no rhe; ọ da dje ọkẹre wan aton na kerẹ urhie.

⁴²Kidie o karohọ ive ọfuanfọn rọye, kẹ Ebraham odibo rọye.

⁴³Ọtiọye na o de sun ihwo rọye phia vẹ aghọghọ, ihwo rọye rọ jẹreyo ve ine ẹsuọ

⁴⁴Ọ da vwẹ otọ rẹ ẹgborho na kẹ ayen; ayen da reyọ eyere rẹ emamọ rẹ ihwo na wian phihọ,

⁴⁵rere ayen vwọ sa yọnrọn iji rọye re ayen sẹro rẹ irhi rọye. Jiri Ọrovwohwo na!