Read urhobo Une rẹ Ejiro 106 Bible Online

Une rẹ Ejiro 106 - urhobo bible

Une rẹ Ejiro 106

¹Jiri Ọrovwohwo na! E vwẹ ẹkpẹvwẹ kẹ Ọrovwohwo, kidie o yoma, kidie ẹguọnọ rọye ro jẹ rhẹriẹ na dia rhiri bẹdẹ!

²Ono re sa ta ikpiruo ride rẹ Ọrovwohwo, eyẹ se dje ejiro rọye phia?

³Ebruba kẹ ayen otu re guọnọ ọsoso, ri ruẹ ọvwata vwẹ ọke ejobi!

⁴Karohọ ovwẹ, E Ọrovwohwo, vwẹ ọke wọ da vwẹ ẹro esiri vwo nẹ ihwo wẹn, cha vwẹ uko vwẹ ọke wo de sivwi ayen,

⁵rere me vwọ mrẹ erhuvwu re ihwo ru wọ jẹreyọ rere me ghọghọ vwe omavwerhe rẹ ẹgborho wẹn, rere me vẹ ireuku wẹn ghọghọ.

⁶Te avwanre vẹ esẹ rẹ avwanre ru imwemwu; avwanre ru orukuruku, avwanre ru emu umwemwu.

⁷Esẹ rẹ avwanre, ọke rẹ ayen vwọ he Ijipt, ayen roro iruo rẹ igbunu wẹ-ẹn, ayen ji roro ẹguọnọ wẹn ro jẹ rhẹriẹ buebu na-a, ẹkẹvuọvo ayen da vwọ so O ro me kpenu na vwẹ asan Abadi Ọvwavware na.

⁸Dede na o ji sivwi ayen fiki rẹ odẹ rọye, rere ọ mrasan vwẹ ẹgba rọye rode na phia.

⁹Ọ da ghwọ ku Abadi Ọvwavware na, ọ da rhe kpọ; ọ de sun ayen wan okokodo na kerẹ aton.

¹⁰Ọtiọye o de sivwi ayen nẹ obọ re ivwighrẹ, o de sivwi ayen nẹ ogangan rẹ ọvweghrẹ.

¹¹Ame na de rhurhu ukọn rayen, kaka ọvuọvo rayen chekọ-ọ.

¹²Etiyin ayen ki se eta rọye gbuyota; ayen da so ejiro rọye.

¹³Ẹkẹvuọvo nananana iruo rọye da ghwa chọrọ ayen ẹro, aye gbe hẹrhẹ rọ nẹ ayen iroro-o.

¹⁴ẹkẹvuọvo ayen de vwo ubiupho ọbrabra vwẹ evun rẹ aghwa ayen da davwe Ọghẹnẹ ni vwẹ evun rẹ aton na,

¹⁵Ọ da kẹ ayen obo rẹ ayen nọre, ẹkẹvuọvo o de ji emiavwe ro hwe ihwo rhe ohri rayen.

¹⁶Ọke re ihwo re erhọn na vwọ rioma kpahe Mosis kugbe Erọn, ọfuanfon ọvuọvo rẹ Ọrovwohwo na,

¹⁷Otọ na de rhiunu ọ da rọ Datan, o de rhurhu usun re Abiram.

¹⁸Erhanre de mu la vwẹ evun rẹ usun rayen na, ogiderhanre na da torhẹ ohwo umwemwu.

¹⁹Ayen de duvwu ọmọ rẹ erhuẹn vwi Horẹb ayen da ga oma ra wranre

²⁰Ayen de wene urinrin rẹ Ọghẹnẹ phihọ uhoho rẹ erhuẹn rọ ria odi.

²¹Ọghẹnẹ da chọrọ ayen ẹro, Osivwi rayen na, ro ru okpemu rode vwẹ Ijipt na,

²²iruo re igbunu vwẹ otọ ri Ham, kugbe emu ro muoshọ vwe obo Abadi Ọvwavware na.

²³Fikiridie ọ tare nẹ ọye ghwọrọ ayen — ọ dia ifiki ri Mosis, rọ jẹreyọ na vwo-o rọ mudia phihọ ahwa rọye, rọ da ophu rọye ji ro vwo jẹ ayen ẹghwọrọ.

²⁴Etiyin ayen da je otọ esiri na fia, ayen vwo esegbuyota kpahe ive rọye-e.

²⁵Ayen guẹ huhuhu vwẹ evun rẹ utughẹ rayen, ayen mu ọghọ ke urhuru rẹ Ọrovwohwo na-a.

²⁶Fiki rẹ ọtiọye ọ kpare abọ rọye ọ de duvwu iyori kẹ ayen rere ayen vwo she vwẹ evun re aghwa na,

²⁷kọ hra uvwiẹ rayen rọ ohri rẹ ẹgborho na, rọ hra ayen nene etọ na.

²⁸Etiyin ayen da vwe oma re ayen gba Baal Peọr, ayen da re izobo re zo kẹ oriwi na;

²⁹ayen da kpare ophu rẹ Ọrovwohwo fiki rẹ obo rayen ruẹ. Ọtiekọ da va phia ve uherevie re ayen.

³⁰Etiyin Finihas de vrẹn mudia ọ da re Ọtiekọ na da daji.

³¹E de kere ọyena phihọ ọvwata vwọ ke ne uvwiẹ re te uvwiẹ bẹdẹ.

³²Ayen da nẹrhẹ ophu muo vwẹ asan ame ri Meriba, ọ da nẹrhẹ ọ bru ki Mosis fiki rayen;

³³kidie o ru erhi rọye muenu phihọ, ọ da ta eta gbagbagba.

³⁴Ayen guọghọ ihwo na a, kirobo rẹ Ọrovwohwo ji urhi ke aye-en

³⁵ẹkẹvuọvo ayen de kuoma kugbe ẹgborho na ayen de ru kirobo re ayen ruru.

³⁶Ayen da ga ema rayen, re rhoma hirhe phihọ ufi kẹ ayen.

³⁷Ayen da vwẹ emeshare rayen ze izobo ayen da vwẹ emetẹ rayen kẹ idẹbono,

³⁸ayen de sun ọbara rẹ ekun kuotọ, ọbara rẹ emeshare kugbe emetẹ rayen, re ayen vwo ze Izobo ke ema ri Kenan, otọ na de rhi gbeku vẹ ọbara.

³⁹Ọtiọna ayen rhe vwọ dia gbegbe vwẹ oma re uruemu rayen, ayen de gbe igberadja fiki rẹ obo rayen ruẹ.

⁴⁰Etiyin ophu rẹ Ọrovwohwo da rhe tua kpahe ihwo rọye, o de tuoma rẹ ireuku rọye,

⁴¹o de phi ayen phihọ obo re ẹgborho na, fiki re ọtiọye na ihwo ri tuoma ke rhoma sun ayen,

⁴²Ivwighrẹ rayen de shenyẹ ayen, ayen de rhi phi oma phihọ otọ rẹ ogangan rẹ isuesun rayen.

⁴³Ọke buebu o vwo sivwi ayen, ẹkẹvuọvo udu rayen vọnre vẹ arueyivwo vwẹ iroro rayen, a da vwẹ ayen gbe otọ fiki rẹ orukuruku rayen.

⁴⁴Yi dede o vughe ọdjarhe rayen, vwẹ ọke ro vwo nyo oviẹ rayen.

⁴⁵Ọ vwi fiki rayen karohọ ọphọ rọye, o de dogho obọ kirobo rẹ ẹguọnọ rọye ro jẹ rhẹriẹ epha.

⁴⁶O da nẹrhẹ ehrọre rẹ ayen re ihwo otu ri mu ayen ighuvwu ejobi.

⁴⁷Sivwi avwanre, E Ọrovwohwo Ọghẹnẹ rẹ avwanre, re wọ ghwẹ avwanre koko nẹ ohri rẹ ẹgborho na rhe, re ma vwe ẹkpẹvwẹ ke ode ọfuanfon wẹn re vwo urinrin vwẹ ejiro wẹn.

⁴⁸Ebruphihọ kẹ Ọrovwohwo na, Ọghẹnẹ rẹ Izrẹl na, nẹ rhiri bẹdẹ re te rhiri bẹdẹ! E gbe jẹn ihwo ejobi ta, Isẹ! Jiri Ọrovwohwo na!