Read urhobo Une rẹ Ejiro 107 Bible Online

Une rẹ Ejiro 107 - urhobo bible

Une rẹ Ejiro 107

¹E vwẹ ẹkpẹvwẹ kẹ Ọrovwohwo, kidie oyovwiri; kidie ẹguọnọ rọye ro jẹ rhẹriẹ herọ rhiri bẹdẹ!

²Jẹn e ra tanhirhe rẹ Ọrovwohwo ta ọtiọye, rọ tanhirhe neẹ ukpokpogho

³ra ghwẹ koko nẹ etọ na rhe, nẹ obaro ọnre vẹ obuko ọnre, nẹ obọrhe ọnre vẹ obọhwere ọnre.

⁴Ẹvo mu yan vwẹ evun rẹ aton ofefe ayen mrẹ idjerhe wan kpo orere ra dia-a,

⁵owẹvwe vẹ urhuru rẹ ame, oma ko ro ayen.

⁶Etiyin ayen de kperi se Ọrovwohwo vwẹ ukpokpogho rayen, o de si ayen nẹ ọdjarhe rayen,

⁷o de sun ayen wan idjerhe ọphiọnphiọn, bẹsiẹ re ayen vwọ te orere re ayen dia.

⁸Jẹn ayen kpẹvwẹ Ọrovwohwo fiki re ẹguọnọ rọye ro je rhẹriẹ, fiki rẹ Iruo re igbunu rọye ro ru ke emọ re ihwo!

⁹Kidie ofue urhuru rẹ ohwo rẹ urhuru rẹ ame hwe, ọ rọ owẹvwe hwe ọ da vwẹ emu esiri vọn evun!

¹⁰Ẹvo tidia vwẹ ebri vẹ uvweri, ighuvwu rẹ ọdjarhe vẹ igoni,

¹¹kidie ayen mu kpahe eta rẹ Ọghẹnẹ, ayen da vwẹ iroro rẹ ọ ro Me Kpenu na jọdẹ.

¹²Udu rayen de wurhu vẹ owian ọgangan, ayen de she, a gbe mrẹ ohwo ọvuọvo rọ sa kpare aye-en.

¹³Etiyin ayen de kperi se Ọrovwohwo vwe evun rẹ ukpokpogho rayen, o de si ayen nẹ ọdjarhe rayen;

¹⁴ọ da reyọ ayen nẹ evun rẹ ebri vẹ uvweri, o de vwirhi igọni rayen kufia.

¹⁵Jẹn ayen kpẹvwẹ Ọrovwohwo fiki re ẹguọnọ rọye ro je rhẹriẹ, fiki rẹ iruo re igbunu rọye ro ru ke ẹmo rẹ ihwo!

¹⁶Kidie ọ bẹrẹ ẹchẹ rẹ ẹrovwo, o de vwirhi egbe re utehru na ibro ivẹ.

¹⁷Evo da mwọga fiki rẹ idjerhe umwemwu rayen, fiki rẹ orukuruku rayen ayen da mrẹ ọdjarhe!

¹⁸kemuọre kemuọre ke ayen nẹrhẹ, ayen de si kẹrẹ anurhoro rẹ ughwu.

¹⁹Etiyin ayen de kperi se Ọrovwohwo vwẹ evun rẹ ukpokpogho rayen, o de si ayen nẹ ọdjarhe rayen;

²⁰o de ji ota rọye phia, o de sivwi ayen, o de sivwi ayen nẹ ẹghwọrọ.

²¹Jẹn ayen kpẹvwẹ Ọrovwohwo fiki rẹ ẹguọnọ rọye ro jẹ rhẹriẹ fiki rẹ iruo rẹ igbunu rọye ro ru kẹ emọ rẹ ihwo!

²²Jẹn ayen ze izobo rẹ ẹkpẹvwẹ, re gbe ikun re uruemu rọye vwẹ ine rẹ aghọghọ!

²³Ẹvọ vwẹ ekọ kpo ọbo abadi, ri ru iruo rayen vwẹ ame rode;

²⁴ayen mrẹ uruemu rẹ Ọrovwohwo na, iruo rẹ igbunu rọye vwẹ evun rẹ okokodo.

²⁵Kidie o ji urhi, odju rẹ oseghe o de dju, rọ kpare oseghe re abadi na kpenu

²⁶Ayen de mu osusu kpo obo odjuvwu, e da rhoma she kpo okokodo vwe obotọ, arueyivwo rayen da wran kufia vwẹ evun rẹ ọdjarhe umwemwu rayen;

²⁷ayen re gele yẹnghrẹ kerẹ ohwo rẹ udi muẹ, ofu de dje ayen hwe

²⁸Etiyin ayen de kperi se Ọrovwohwo vwe evun rẹ ukpokpogho rayen, o de si ayen nẹ ọdjarhe rayen,

²⁹ọ de ru ogiribo fọ, oseghe rẹ abadi de rhurhu unu.

³⁰Etiyin oma da vwerhe ayen kidie asan ejobi fọre riẹi, ọ da reyọ ayen te erhuru re ayen guọnọre.

³¹Jẹn ayen kpẹvwẹ Ọrovwohwo fiki rẹ ẹguọnọ rọye ro jẹ rhẹriẹ, fiki rẹ iruo re igbunu rọye ro ru kẹ emọ rẹ ihwo!

³²Jẹn ayen kparọ kpenu vwẹ ukoko rẹ ihwo na, re jiro vwẹ ọghwẹgbe rẹ ekpako na.

³³O hirhe irhie phihọ aton, ogbugbu rẹ ame phihọ otọ ọyaya,

³⁴otọ ro yovwẹ emu hirhe phihọ otọ rẹ ughweraka diodi, fiki rẹ umwemwu rẹ ihwo re dia.

³⁵Ọ rhẹriẹ aton phihọ ẹtẹrhe rẹ ame, otọ ọyaya phihọ ogbugbu rẹ ame.

³⁶Ke etiyin ọ vwọ kẹ ọ rẹ owẹvwe hwe nẹ ọ dia, ayen da bọn orere phihọ evun rọye;

³⁷ayen de voro udju, ayen da kọn ugbo ri vain, Etiyin i de yovwi ke ayen.

³⁸Vwẹ oma rẹ ẹrhovwo rọye ayen de yovwi buebu; o rhe jẹn uchuru rayen ravwiẹ-ẹ.

³⁹Ọke rẹ ayen da havwa she kpotọ, fiki rẹ oshenyẹ, ukpokpogho, kugbe oja,

⁴⁰kọ vwẹ isun na jehwẹ ọ mẹ nẹrhẹ ayen suosuo vwẹ otọ ofefe ro vwo idjerhe-e,

⁴¹ẹkẹvuọvo ọ kpare ọ re akpọ bẹn nẹ ọdjarhe, o de ru uvwiẹ rayen ker;r uchuru rẹ igegede

⁴²Ohwo rẹ ọsoso kọ mrẹ ọ me ghọghọ, ihwo umwemwu ejobi ki rhurhu unu rọye

⁴³Onọ re ghwanre jọ kerhọn re imu nana, jẹn ihwo roro ẹguọnọ re Ọrovwohwo ro je rhẹriẹ na.