Read urhobo Une rẹ Ejiro 116 Bible Online

Une rẹ Ejiro 116 - urhobo bible

Une rẹ Ejiro 116

¹Me guọnọ Ọrovwohwo na, fikiridie wo nyo urhuru mẹ kugbe orẹ mẹ

²Fikiridie o rhie erhọn rọye phihọ kẹ vwẹ, vwẹ ọtiọye na ki mi se uche ọke re me dia krite

³Ugodo rẹ ughwu riariẹ ovwẹ wan, obi rẹ Erivwi shabọ phihọ ovwẹ; Me re oja rẹ ọdjarhe vẹ uvwerhe.

⁴Etiyin mi de se odẹ rẹ Ọrovwohwo na. E Ọrovwohwo, me rẹ wẹ, sivwi ẹnwẹ mẹ!

⁵Ehrọre ọ rẹ Ọrovwohwo, kugbe ọvwata; Ọghẹnẹ rẹ avwanre na nẹ arodọvwẹ.

⁶Ọrovwohwo na sẹro rẹ ihwo ugheghẹ, ọke ra vwọ vwẹ ovwẹ gbe otọ, o de sivwi uvwe.

⁷Rhivwi, E ẹnwẹ mẹ, kpo omerovwo wẹn; kidie Ọrovwohwo na nene uwe yeri wurhie wurhie.

⁸Kidie wo sivwi ẹnwẹ mẹ ne ughwu, ẹro mẹ vwo nẹ oviẹ, awọ mẹ vwo nẹ eshe;

⁹Me yan vwẹ obaro rẹ Ọrovwohwo vwẹ evun rẹ otọ rẹ ihwo ekpokpọ na.

¹⁰Me yọnrọn esegbuyota mẹ, vwe ọke me da tanẹ. Me hẹ ọdjarhe rode na;

¹¹Me da ta vwẹ ọke re emu na ejobi vwo bi nyẹ vwẹ, Ihwo ejobi na iphiẹrohọ ofefe ghevweghe

¹²Kidie me kẹ Ọrovwohwo na fiki rẹ ẹse buebu ro kẹ vwẹ?

¹³Me kpare uko rẹ esivwo na ki mi se odẹ rẹ Ọrovwohwo na,

¹⁴Me hwa osa rẹ ive mẹ kẹ Ọrovwohwo vwẹ irharo rẹ ihwo rọye ejobi.

¹⁵Ghaghare vwẹ obaro rẹ Ọrovwohwo na ọtiọye ughwu rẹ ihwo efuanfon rọye epha.

¹⁶E Ọrovwohwo, mẹvwẹ odibo wẹn, mẹvwẹ odibo wẹn, ọmọshare rẹ ọmọtẹ wẹn. Wọwẹ re rhan ifi nẹ uvwe.

¹⁷Ki mi ze izobo rẹ ẹkpẹvwẹ kẹ wẹ ri mi se odẹ rẹ Ọrovwohwo na.

¹⁸Me hwa osa re ive mẹ ke Ọrovwohwo na vwe irharo iẹ ihwo rọye ejobi,

¹⁹vwẹ evun re ọguau re uwevwi re Ọrovwohwo na, vwe uherevie wẹn, E Jerusalẹm, Jiri Ọrovwohwo na!