Read urhobo Une rẹ Ejiro 119 Bible Online

Une rẹ Ejiro 119 - urhobo bible

Une rẹ Ejiro 119

¹Ebruphihọ kẹ ayen otu re idjerhe rọye vwo abe-e, re yan phihọ evun rẹ urhi rẹ Ọrovwohwo na!

²Ebruphihọ kẹ ayen otu re yọnrọn iseri rọye, re vwẹ udu rayen ejobi guọnọ,

³I ri ruẹ oruchọ-ọ, ẹkẹvuọvo re yan phihọ evun rẹ idjerhe rọye!

⁴Wọwẹ ri ji iji kẹ avwanre nẹ, a vwẹ oma kpotọ yọnrọn.

⁵E mane kẹ idjerhe mẹ mudia gan vwenẹ vwe iji rọye ẹyọnrọn!

⁶Manẹ oma gbe sa vo vwẹ-ẹ, re me da tọn ẹro vi irhi rọye ejobi.

⁷Mi jiri uwe vẹ udu rẹ ọsoso, vwẹ ọke mi de yono egba wẹn re ọvwata na nu.

⁸Me sẹro rẹ iji wẹn, E wọ sen vwe kakare-e!

⁹Mavọ emeghene sa vwọ sẹro re idjerhe rọye fon? kọ rhẹrẹ kirobo re ota wẹn epha.

¹⁰Udu mẹ ejobi me vwọ guọnọ owẹ; wo ju vwe suosuo nẹ irhi wẹ-ẹn!

¹¹Mi phi ota wẹn phihọ udu mẹ rere mi vwo ji umwemwu eruo kpahe owẹ.

¹²Ebruphihọ ke wẹ, E Ọrovwohwo, yono uvwe iji wẹn na!

¹³Ẹbẹrunu mẹ mi vwo ghwoghwo egba ejobi wọ vwẹ unu wẹn ji.

¹⁴Vwẹ idjerhe re iseri wẹn oma da vwerhe ovwẹ kirobo ri mi vwo efe vwọ te.

¹⁵Mi roro iroro kpahe iji wẹn, Me tọn ẹro vi idjerhe wẹn ejobi.

¹⁶Mi vwo omavwerhe vwẹ iji wẹn. Ota wẹn sa chọrọ ovwẹ ẹro-o

¹⁷Nene odibo wẹn yeri wurhie wurhie, rere me vwọ rhọ me vwọ sẹro rẹ ota wẹn.

¹⁸Rhie ẹro mẹ, rere me vwọ mrẹ imu re igbunu vwe evun rẹ urhi wẹn.

¹⁹Mẹvwẹ ọrhorha vwẹ evun rẹ akpọ na; wo siẹ irhi wẹn nẹ kẹ vwẹ-ẹ!

²⁰Ẹnwẹ mẹ rimu vẹ ẹroerhe mẹ! fiki rẹ egba wẹn vwẹ ọke ejobi.

²¹Wọwẹ re ghwọ ku ọ ro yivwaro, e ra harhere na, ri beghe jẹ irhi wẹn vwo,

²²si ehwẹjẹ vẹ omaẹphọphọ rayen nẹ uvwe oma, kidie me sẹro rẹ iseri wẹn.

²³Ọ da tobọ dianẹ isun tidia re rua ero kpahe ovwẹ, odibo wẹn se roro iji wẹn.

²⁴Iseri wẹn eye omavwerhe mẹ, eye ọbuiroro mẹ.

²⁵Ẹnwẹ mẹ tamu iwurhie; sasa ovwẹ oma kirobo rẹ ota wẹn epha!

²⁶Ọke mi vwo gbe ikun rẹ idjerhe mẹ, wọ da kpahe kẹ vwẹ; yono uvwe iji wẹn!

²⁷Ju vwe riẹn otọ rẹ idjerhe rẹ iji wẹn, ki mi roro iruo rẹ igbunu wẹn na.

²⁸Ẹnwẹ mẹ ra wran kufia fiki rẹ oja; phi udu phihọ ovwẹ awọ kirobo re ota wẹn epha!

²⁹Si idjerhe ogbarogba nẹ uvwe oma; vwẹ arodọvwẹ wẹn yono uvwe urhi wẹn!

³⁰Me jẹ idjerhe rẹ esegbuyota, mi phi ẹgha wẹn phihọ obaro mẹ.

³¹Me gbane iseri wẹn boma, E Ọrovwohwo; wo jẹn oma vo ovwẹ-ẹ!

³²Me djẹ nene idjerhe rẹ irhi wẹn vwẹ ọke wọ da hẹrẹ erianriẹn mẹ phihọ!

³³Yono uvwe, E Ọrovwohwo, idjerhe rẹ iji wẹn; ke me yọnrọn re duvwu oba.

³⁴Kẹ vwẹ ẹruọ, rere me vwọ yọnrọn urhi wẹn re me vwẹ udu mẹ ejobi vwọ sẹro rọye.

³⁵Sun vwe wan idjerhe rẹ irhi wẹn, Kidie ọ vwerhe ovwẹ oma.

³⁶Nuẹ udu mẹ kpo iseri wẹn, ọ dianẹ kẹ erere-e!

³⁷Rhẹriẹ ẹro mẹ rere o vwo je ogbegbemre e no; wọ kẹ vwẹ arhọ vwẹ idjerhe wẹn na.

³⁸Ru ive wẹn na gan kẹ odibo wẹn, re herọ kẹ otu dje oshọ wẹn.

³⁹Chuko ku eghwọkuo rẹ oshọ rọye mu vwe na; Kidie ẹgha wẹn na iyoyovwi.

⁴⁰Nighere, mi ro rhẹro re iji wẹn na vwẹ evun rẹ ọvwata wẹn kẹ vwẹ arhọ!

⁴¹Jẹn ẹguọnọ wẹn ro jẹ rhẹriẹ na bru vwe rhe, E Ọrovwohwo, esivwo wẹn kirobo rẹ ive wẹn epha;

⁴²Etiyin ke me mrẹ ota kpahe kẹ otu re vwẹ ovwẹ jehwẹ, kidie me vwẹ ẹro so ota wẹn.

⁴³Wo siẹ ota rẹ uyota na nẹ unu mẹ kakare-e, kidie iphiẹrohọ mẹ hẹ evun re egba wẹn.

⁴⁴Me sẹro rẹ urhi wẹn kọke kọke, rhiri bẹdẹ bẹdẹ,

⁴⁵ke me yan vwẹ egbemọphe, kidie me guọnọ iji wẹn.

⁴⁶Mi gbe ikun rẹ iseri wẹn vwẹ obaro rẹ ivie, oma gbe rha vo vwẹ-ẹ,

⁴⁷Kidie me mrẹ omavwerhe me vwẹ evun rẹ irhi wẹn, re me guọnọre.

⁴⁸Mi mu ọghọ kẹ irhi wẹn. re me guọnọ, ki mi rorọ iroro kpahe iji wẹn.

⁴⁹Karohọ ota wẹn ke odibo wẹn, ru wọ da nẹrhẹ ovwẹ vwo iphiẹrohọ.

⁵⁰Ọnana uchebro mẹ vwe evun rẹ ọdjarhe mẹ nẹ ive wẹn kẹ vwẹ arhọ.

⁵¹Ohwo ogbarogba ki mienu phihọ ovwẹ, ẹkẹvuọvo mi se chuko ku urhi wẹ-ẹn.

⁵²Ọke me da karohọ egba wẹn nẹ awanre rhe, ki mi bru oma mẹ uche, E Ọrovwohwo.

⁵³Ivun kọ dja vwẹ djọghọ djoghọ fiki rẹ ohwo umwemwu, rọ sen urhi wẹn.

⁵⁴Iji wẹn rhi hirhe phihọ une mẹ vwẹ uwevwi rẹ ọyoyan mẹ.

⁵⁵Me karohọ odẹ wẹn vwe evun rẹ ason, E Ọrovwohwo, me yọnrọn urhi wẹn.

⁵⁶Ebruphihọ na she teye ovwẹ, nẹ me yọnrọn iji wẹn.

⁵⁷Ọrovwohwo na ọye ẹkẹn mẹ; mi veri nẹ me yọnrọn eta wẹn.

⁵⁸Me vwẹ udu mẹ ejobi yare aroesiri wẹn; re ehrọre mẹ kirobo rẹ ive wẹn epha.

⁵⁹Ọke mi de roro idjerhe wẹn, ki mi hirhe awọ ku iseri wẹn;

⁶⁰mi bru okpakpa me da oma ji-i rere me vwọ yọnrọn irhi wẹn.

⁶¹Owenẹ ufi re ohwo umwemwu gba vwẹ dede, urhi wẹn sa chọrọ ovwẹ ẹro-o.

⁶²Vwẹ uherevie ason mi vrẹn jiri uwe, fiki rẹ ẹgba rẹ ọvwata wẹn na.

⁶³Mẹvwẹ otu rẹ ayen ihwo re djẹ oshọ wẹn, ọvo vwẹ ayen otu re yọnrọn iji wẹn.

⁶⁴Akpọ na, E Ọrovwohwo, ọ vọnre ve ẹguọnọ wẹn ro jẹ rhẹriẹ na; yono uvwe iji wẹn.

⁶⁵Wo nene odibo wẹn yere omamọ rẹ eyere, E Ọrovwohwo kirobo rẹ ota wẹn epha.

⁶⁶Yono uvwe omamọ re orhiebro kugbe erianriẹn, kidie mi se irhi wẹn gbuyota.

⁶⁷Favwe me kẹ mrẹ ọdjarhe ye me yan ghwru; ẹkẹvuọvo asakiephana me yọnrọn ota wẹn.

⁶⁸Wọwẹ ohwo esiri wo ki ruẹ emu esiri, yono uvwe iji wẹn

⁶⁹Ohwo ogbarogba da vwẹ efian ghworo uvwe, ẹkẹvuọvo me vwẹ udu mẹ ejobi yọnrọn iji wẹn,

⁷⁰udu rayen vẹ ọkpan kerẹ ivwri, ẹkẹvuọvo oma rẹ urhi wẹn vwerha ovwẹ.

⁷¹O yovwi ke vwe re me vwọ mrẹ ọdjarhe, rere mi vwọ yono iji wẹn.

⁷²Urhi re unu wẹn yovwi ke vwẹ no oro kugbe idọnọ uriori.

⁷³Abọ wẹn re ma vwẹ, ri ruona mẹ; ke vwẹ ẹruọ rere mi vwo yono irhi wẹn

⁷⁴Otu re dje oshọ wẹn ke mrẹ vwẹ ayen ke ghọghọ, fikiridie mi phiẹrohọ ota wẹn.

⁷⁵Me riẹnre, E Ọrovwohwo, nẹ orhiebro wẹn ọsoso, ne ọdjarhe mẹ mrẹ re na dje uyota wẹn phia.

⁷⁶Jẹn ẹguọnọ wẹn rọ je rhẹriẹ na rhoma ro bru vwe uche kirobo re ive wẹn epha ke odibo wẹn.

⁷⁷Jẹn aruẹdọ wẹn bru vwe rhe, rere me vwọ rhọ; Kidie urhi wẹn vwerhe ovwẹ oma.

⁷⁸Jẹn ohwo ogbarogba mrẹ ophọphọvwe, fikiridie ayen vwẹ abe bru ọgọdọ riariẹ ovwẹ; vwọ kẹ vwẹ, mi roro iroro kpahe iji wẹn

⁷⁹Jẹn otu re dje oshọ wẹn rhivwi bru vwe rhe, rere ayen vwọ riẹn iseri wẹn.

⁸⁰E jẹn udu mẹ re abe vwẹ oma rẹ iji wẹ-ẹn, rere oma vwo ju vwe ẹvuọ!

⁸¹Ẹnwẹ mẹ rọ riakọ fiki esivwo wẹn, mi phiẹrohọ ota wẹn.

⁸²Ẹro mẹ djeri kidie me ra diaotọ hẹrhẹ ive wẹn; Me da nọ, Ọkevọ wo che vwo bru vwe uche?

⁸³Kidie me rhoma rhe dia kerẹ okọkọ rẹ udi vwe evun rẹ ivwirhi, dede na iji wẹn je chọrọ ovwẹ ẹro-o

⁸⁴Mavọ odibo wẹn chirako krite vwo? Ọkevọ wo vwo guẹdjo rẹ ihwo ri kpokpo uvwe?

⁸⁵Ihwo ogbarogba tọn ukpotọ hẹrhẹ ovwẹ, ihwo re rhọvwe phihọ urhi wẹ-ẹn

⁸⁶Irhi wẹn ejobi muẹro, ayen di kpokpo uvwe ekueku; cha vwẹ uko!

⁸⁷Ayen dino kru akpọ mẹ ba ẹroro, ẹkẹvuọvo iji wẹn je chọrọ ovwẹ ẹro-o.

⁸⁸Vwẹ evun rẹ ẹguọnọ wẹn ro jẹ rhẹriẹ na sẹro rẹ arhọ mẹ, rere me vwọ sẹro rẹ iseri rẹ unu wẹn.

⁸⁹A tọn ota wẹn rhiri bẹdẹ, E Ọrovwohwo, phihọ kokoroko vwẹ obo odjuvwu.

⁹⁰Esegbuyota wẹn ọ herọ rhiri nẹ uvwiẹ re te uvwiẹ, wọwẹ re tọn akpọ na phihọ, o de mudia kokoroko.

⁹¹Obo wo djere phihọ ọye ayen vwọ herọ rhi te nonẹ, kidie emu na ejobi e rẹ odibo wẹn.

⁹²Ọ dianẹ urhi wẹn kẹ vwẹ oma vwerhe vwo-o, yi mi ghwruru vwe evun rẹ ọdjarhe mẹ.

⁹³Iji wẹn sa chọrọ ovwẹ ẹro bẹdẹ-ẹ, kidie vwẹ oma rẹ ayen wọ da kẹ vwẹ arhọ.

⁹⁴Mẹvwẹ ọwẹn, sivwi uvwe; kidie me guọnọ iji wẹn.

⁹⁵Ohwo umwemwu fiọnko hẹrhẹ ovwẹ re ọ ghwọrọ ovwẹ, ẹkẹvuọvo mi roro iseri wẹn na.

⁹⁶Me mrẹ oba rẹ orugha ejobi, ẹkẹvuọvo urhi wẹn hẹre gangan.

⁹⁷E, mavọ me guọnọ urhi wẹn te! Ọye mi roro vwẹ ẹdẹ na ejobi.

⁹⁸Urhi wẹn nẹrhẹ ovwẹ ghwanre nọ ivwighrẹ mẹ, kidie ọ vẹ ovwẹ herọ bẹdẹ

⁹⁹Mi vwọ ẹruọ no otu ri yono uvwe ejobi, kidie iseri wẹn na ọye iroro mẹ.

¹⁰⁰Mi vwo ẹruọ nọ otu rẹ ekpako, kidie me yọnrọn iji wẹn.

¹⁰¹Me rhan awọ mẹ rhivwi nẹ idjerhe kidjerhe umwemwu, rere me sa vwọ yọnrọn ota wẹn.

¹⁰²Mi bioma akakọ kẹ egba wẹ-ẹn, kidie wẹ ri yono uvwe.

¹⁰³Mavọ ota wẹn vwerhe kẹ vwẹ te, ọ vwerhe nọ ọnyọn kẹ unu mẹ!

¹⁰⁴Vwe oma rẹ iji wẹn mi de vwe ẹruọ; vwẹ ọtiọye na oma rẹ idjerhe umwemwu ko tu vwe.

¹⁰⁵Ota wẹn ọye urhukpẹ ke awọ mẹ kugbe oremrẹ ke idjerhe mẹ

¹⁰⁶Mi veri mi de ji ruo gan, nẹ me yọnrọn egba re ọvwata wẹn na.

¹⁰⁷E kpokpo uvwe brabra; ke vwẹ arhọ, E Ọrovwohwo, kirobo rẹ ota wẹn epha!

¹⁰⁸Reyọ izobo rẹ ejiro mẹ, E Ọrovwohwo, rere wo yono uvwe ẹgha wẹn na.

¹⁰⁹Me yọnrọn arhọ mẹ vwẹ obọ mẹ kọke kọke, ẹkẹvuọvo urhi wẹn chọrọ ovwẹ ẹro-o.

¹¹⁰Ohwo umwemwu kpahe ufi hẹrhẹ ovwẹ, ẹkẹvuọvo mi ghwru nẹ iji wẹn na-a.

¹¹¹Iseri wẹn eye uku mẹ bẹdẹ, e, ayen aghọghọ rẹ udu mẹ.

¹¹²Me vwẹ udu mẹ kpahe iji wẹn re mi ru ayen, rhiri bẹdẹ, re te oba.

¹¹³Oma rẹ ihwo ri vwo evun ivẹ tu vwe, ẹkẹvuọvo me guọnọ urhi wẹn.

¹¹⁴Wọwẹ asan mi de si oma nẹ kugbe ekpọfia mẹ, mi phi ẹro phihọ ota wẹn.

¹¹⁵Bi nu vwe oma, wẹ ohwo umwemwu, rere me sa yọnrọn irhi rẹ Ọghẹnẹ mẹ.

¹¹⁶Yọnrọn ovwẹ kirobo rẹ ive wẹn epha, rere me sa rhọ, wo jẹ oma vo vwẹ vwẹ iphiẹrohọ mẹ-ẹ!

¹¹⁷Yọnrọn ovwẹ, rere oma fu vwe rere mi se iji wẹn gbe emu kọke kọke!

¹¹⁸Wọwẹ re vwẹ otu ri beghe jẹ egba wẹn vwo vwọ jehwẹ; uyota, ẹghwanre rayen ofefe.

¹¹⁹Ihwo umwemwu rẹ akpọ na ejobi wọ vwẹ ayen roro isọn, ọtiọye na iseri wẹn kọye me guọnọ.

¹²⁰Uvwo mẹ phariẹ fiki rẹ oshọ wẹn. oshọ re orhiebro wẹn mu vwe.

¹²¹Mi ru obo ro shephihọ vẹ ọ rẹ ọsoso; wọ yan ju vwe vwọ kẹ otu ri shenyẹ vwẹ-ẹ.

¹²²Re esarobọ re esiri kẹ odibo wẹn wo je ohwo ogbarogba shenyẹ vwẹ-ẹ.

¹²³Ẹro mẹ djeri kidie me diaotọ hẹrhẹ esivwo wẹn, fiki rẹ orugha rẹ ive rẹ ọvwata wẹn.

¹²⁴nene odibọ wẹn yeri kirobo rẹ ẹguọnọ wẹn ro jẹ rhẹriẹ epha, rere wo yono uvwe iji wẹn.

¹²⁵Mẹvwẹ odibo wẹn, kẹ vwẹ ẹruọ, rere me vwọ riẹn iseri wẹn na!

¹²⁶O te ọke rẹ Ọrovwohwo vwo tu re, kidie urhi wẹn e miovwiro.

¹²⁷Fiki re ọtiọye na me guọnọ irhi wẹn na nọ oro, nọ oro ro me yovwi.

¹²⁸Fiki rẹ ọtiọye iji wẹn kọye mi vwo sun ichiyi mẹ; mi tuoma rẹ idjerhe kidjerhe re efian.

¹²⁹Iseri wẹn igbunu, ọtiọye na ẹnwẹ mẹ kọ yọnrọn ayen.

¹³⁰Ota wẹn ro rhie phihọ na kẹ orẹmrẹ, ọ vwẹ ẹruọ vwọ kẹ ọvwugheghẹ.

¹³¹Ve unu ro rhie phihọ me ra wẹn fẹkpẹ fẹkpẹ, fikiridie urhuru rẹ irhi wẹn sivwe.

¹³²Rhẹriẹ oma ku vwe wọ re ehrọre mẹ kirobo wo ruẹ kẹ ihwo re guọnọ odẹ wẹn.

¹³³Kpọ ichiyi mẹ vi kirobo wo veri, wo jẹ orukuruku sun vwe-e.

¹³⁴Tan vwẹ nẹ oshenyẹ re ohwo rẹ akpọ, rere me vwọ yọnrọn iji wẹn.

¹³⁵Ru opharo wẹn lo mu odibo wẹn, rere wo yono uvwe iji wẹn.

¹³⁶Ẹro mẹ ra djẹ ọkẹre rẹ oviẹ fikiridie ihwo sa yọnrọn urhi wẹ-ẹn.

¹³⁷Ọvwata wo ruẹ, E Ọrovwohwo, orhiebro wẹn ọ gbare.

¹³⁸Wọwẹ vwẹ iseri wẹ mu vwẹ ọ re ọvwata kugbe esegbuyota ejobi.

¹³⁹Oruru mẹ torhẹ ovwẹ, kidie eta wẹn chọrọ ivwighrẹ mẹ ẹro.

¹⁴⁰Ive wẹn a nabọ davwọ ni, odibo wẹn da guọnọ.

¹⁴¹Me hanvwere a jẹ vwẹ fia, dede na ye iji wẹn chọrọ ovwẹ ẹro-o.

¹⁴²Ọvwata wẹn ọvwata rhiri bẹdẹ, urhi wẹn je hẹ uyota.

¹⁴³Ukpokpogho vẹ enuebro bru vwe rhe, ẹkẹvuọvo irhi wẹn ọye omavwerhe mẹ.

¹⁴⁴Iseri wẹn ọvwata rhiri bẹdẹ, kẹ vwẹ ẹruọ rere Me vwọ sa rhọ.

¹⁴⁵Udu mẹ ejobi me vwọ viẹ, nyo vwe, E Ọrovwohwo! ke me yọnrọn iji wẹn.

¹⁴⁶Mi bunu se we, sivwi uvwe, rere me vwọ sẹro rẹ iseri wẹn.

¹⁴⁷Mi de vrẹn vwẹ irhiọke ride kperi kẹ ọchuko; mi phi ẹro phihọ eta wẹn

¹⁴⁸Ẹro mẹ rhieri tavwe rẹ otu rẹ ohẹrhẹ rẹ ason ki vrẹn, rere mi vwo roro ive wẹn.

¹⁴⁹Nyo urhuru mẹ vwẹ evun rẹ ẹguọnọ wẹn ro jẹ rhẹriẹ na, E Ọrovwohwo, vwẹ evun rẹ ọsoso wẹn sẹro rẹ arhọ mẹ.

¹⁵⁰Ihwo ri kpokpo uvwe na re siẹ kẹre ovwẹ vẹ iroro umwemwu, ayen tephe kẹ urhi wẹn.

¹⁵¹Ẹkẹvuọvo wẹ ọkẹkẹre, E Ọrovwohwo, irhi wẹn ejobi na uyota re.

¹⁵²Me riẹn kpahe iseri wẹn krite ne wọwẹ ri muro vi bẹdẹ

¹⁵³Ni ọdjarhe mẹ rere wo sivwi uvwe, kidie urhi wẹn chọrọ ovwẹ ẹro-o

¹⁵⁴Mie vwe unu vwo gu rere wọ tan vwẹ, kẹ vwẹ arhọ kirobo rẹ ive wẹn epha!

¹⁵⁵Esivwo pha shesheri kẹ ohwo umwemwu, kidie ayen guọnọ iji wẹ-ẹn.

¹⁵⁶Aruẹdọ wẹn pha rhuarho, E Ọrovwohwo, kẹ vwẹ arhọ kirobo rẹ ọsoso wẹn epha.

¹⁵⁷Ukọn mẹ vẹ otu ri kpokpo uvwe pha buebu, ẹkẹvuọvo mi che yeghe oma nẹ iseri wẹ-ẹn

¹⁵⁸Mi ni ohwo ro segbuyota-a vẹ ohọre ẹkparọ fikiridie ayen yọnrọn irhi wẹ-ẹn.

¹⁵⁹Roro obo me guọnọ iji wẹn te! serọ rẹ arhọ mẹ, E Ọrovwohwo, kirobo rẹ ẹguọnọ wẹn rọ jẹ rhẹriẹ epha.

¹⁶⁰Ekuogbe rẹ ota wẹn ejobi uyota egha kegha rẹ ọvwata wẹn ejobi na dia rhiri bẹdẹ.

¹⁶¹Isun de mu vwe ekueku ghevweghe, ẹkẹvuọvo udu mẹ mudia vwẹ udidi rẹ eta wẹn.

¹⁶²Me ghọghọ vwẹ oma rẹ ota wẹn kerẹ ohwo rọ mrẹ emu buebu tọrọ.

¹⁶³Oma re efian tu vwe me gha, ẹkẹvuọvo me guọnọ urhi wẹn.

¹⁶⁴Asieghwrẹ mi jiri uwe ẹdọke fiki rẹ ẹgba rẹ ọvwata wẹn na.

¹⁶⁵Ufuoma rode ọye ihwo re guọnọ urhi wẹn mrẹ; emu ọvuọvo se gere ayen she-e.

¹⁶⁶Mi phiẹrohọ esivwo wẹn, E Ọrovwohwo, Me sẹro rẹ irhi wẹn.

¹⁶⁷Ẹnwẹ mẹ yọnrọn iseri wẹn; Me guọnọ ayen gangan.

¹⁶⁸Me Yọnrọn iji wẹn kugbe iseri wẹn, kidie idierhe mẹ ejobi e he obaro wẹn.

¹⁶⁹Jẹn oviẹ mẹ bru we rhe, E Ọrovwohwo; kẹ vwẹ ẹruọ kirobo rẹ ota wẹn epha!

¹⁷⁰Jẹn omavwerhe mẹ bru we rhe; sivwi vwe kirobo rẹ ota wẹn epha.

¹⁷¹Ẹbẹrunu mẹ ko ku ejiro wẹn ku rere wo vwo yono uvwe iji wẹn.

¹⁷²Ẹrenvwe mẹ kọ so ine rẹ ota wẹn, kidiẹ irhi wẹn na ejobi gbare.

¹⁷³Jẹn obọ wẹn choma rọ cha vwẹ uko, kidiẹ me jẹ iji wẹn reyọ.

¹⁷⁴Urhuru rẹ esivwo wẹn si vwe, E Ọrovwohwo, urhi wẹn ọye omavwerhe mẹ.

¹⁷⁵Jẹn uvwe rhọ, rere mi vwo jiri uwe, jẹn ẹgba wẹn cha vwẹ uko.

¹⁷⁶Mi ghwruru kerẹ ogegede ro ghwruru, guọnọ odibo wẹn, kidie irhi wẹn chọrọ ovwẹ ẹro-o.