Read urhobo Une rẹ Ejiro 135 Bible Online

Une rẹ Ejiro 135 - urhobo bible

Une rẹ Ejiro 135

¹Jiri Ọrovwohwo na. Jiri odẹ rẹ Ọrovwohwo na, kẹ ejiro, E idibo rẹ Ọrovwohwo na,

²wẹ ro mudia vwẹ evun re uwevwi rẹ Ọrovwohwo na, vwe ọguan re uwevwi rẹ Ọghẹnẹ rẹ avwanre na!

³Jiri Ọrovwohwo na, kidie Ọrovwohwo yoma; So une kẹ odẹ rọye, kidie ọ vẹ ehrọre!

⁴Kidie Ọrovwohwo jẹ Jekọp reyọ ke oma rọye, Izrẹl kerẹ emuobọ rọye.

⁵Kidie me riẹnre nẹ Ọrovwohwo rhoro, nẹ Ọrovwohwo rẹ avwanre na rhonọ ẹdjọ ejobi.

⁶Obo ri jẹ Ọrovwohwo ọye o ruẹ, vwẹ odjuvwu vẹ akpọ na, vwẹ evun re abadi vẹ ikokodo ejobi.

⁷Ọye ri ruẹ egho na ro vwo mu vwẹ obo oba re otọ na, ro ru enuẹnyavwọ kẹ osio ọ da reyọ odju nẹ urhuẹn rọye rhe.

⁸Ọye re teyọ emekpako rẹ Ijipt hwe te ọ re ohwo te ọ rẹ eranvwe,

⁹Ono vwẹ ohri wẹn, E Ijipt, re vwẹ oka vẹ igbunu rhe vwọ so Fero vẹ idibo rọye ejobi,

¹⁰Ono re ghwie ẹgborho buebu ro hwe ivie vẹ egba.

¹¹Sihon, ovie rẹ ihwo rẹ Amọr, kugbe Ọg, ovie ri Bashan, kugbe uvie ri Kenan ejobi,

¹²a da vwẹ otọ rayen kẹ ukuẹriọ, ukuẹriọ kẹ ihwo rọye Izrẹl.

¹³Odẹ wẹn, E Ọrovwohwo, ọ dia rhiri bẹdẹ usi wẹn, E Ọrovwohwo wan uvwiẹ na ejobi.

¹⁴Kidie Ọrovwohwo vwẹ ase kẹ ihwo rọye, ọ me re ehrọre kẹ idibo rọye.

¹⁵Ẹdjọ rẹ ẹgborho na idọnọ vẹ oro, iruo rẹ abọ rẹ ihwo,

¹⁶Ayen vwo inu, ye ayen ta ota-a, ayen vwo ẹro, ẹkẹvuọvo ye ayen mrorẹ-ẹ,

¹⁷ayen vwo erhọn, ẹkẹvuọvo yẹ ayen nyo ẹme-e. eyẹ ẹnwẹ vwẹ unu raye-en.

¹⁸Ayen họhọ ihwo re ma ayen! uyota, kohwo kohwo rọ vwẹ ẹro so ayen!

¹⁹E uwevwi rẹ Izrẹl bruba kẹ Ọrovwohwo! E uwevwi re Erọn, bruba kẹ Ọrovwohwo!

²⁰E uwevwi ri Livae, bruba kẹ Ọrovwohwo! Ovwan re dje oshọ rẹ Ọrovwohwo, bruba kẹ Ọrovwohwo na!

²¹Ebruphihọ kẹ Ọrovwohwo na nẹ Zayọn rhe, ọ rọ dia evun ri Jerusalẹm! Jiri Ọrovwohwo na.