Read urhobo Une rẹ Ejiro 136 Bible Online

Une rẹ Ejiro 136 - urhobo bible

Une rẹ Ejiro 136

¹E vwe ẹkpẹvwẹ kẹ Ọrovwohwo, kidie ọ yoma, kidie ẹguọnọ rọye ro je rhẹriẹ na dia rhiri bẹdẹ.

²E vwẹ ẹkpẹvwẹ kẹ Ọghẹnẹ Osonobrughwẹ kidie ẹguọnọ rọye ro je rhẹriẹ na dia rhiri bẹdẹ.

³E vwẹ ẹkpẹvwẹ kẹ Ọrovwohwo rẹ ọrovwihwo, kidie ẹguọnọ rọye ro je rhẹriẹ na dia rhiri bẹdẹ,

⁴vwọ kẹ ọye ọvo rọ ruẹ imu ride ri gbunu, kidie ẹguọnọ rọye ro jẹ rhẹriẹ na dia rhriri bẹdẹ,

⁵vwọ kẹ ohwo rọ vwẹ ẹruọ rọye ma idjuvwu na, kidie ẹguọnọ rọye ro je rhẹriẹ na dia rhiri bẹdẹ,

⁶vwọ kẹ ohwo rọ riẹn akpọ na phihọ enu rẹ ame na, kidie ẹguọnọ rọye rọ jẹ rhẹriẹ na dia rhiri bẹdẹ,

⁷vwọ kẹ ohwo rọ ma irhukpẹ ride na, kidie ẹguọnọ rọye ro jẹ rhẹriẹ na dia rhiri bẹdẹ;

⁸ọnre ro sun vwẹ enu rẹ uvo, kidie ẹguọnọ rọye ro je rhẹriẹ na dia rhiri bẹdẹ,

⁹emeranvwe vẹ isio na ri sun vwẹ ason, kidie ẹguọnọ rọye ro jẹ rhẹriẹ na dia rhiri bẹdẹ,

¹⁰vwọ kẹ ohwo rọ ghwiẹ emekpako rẹ Ijipt hwe, kidie ẹguọnọ rọye ro jẹ rhẹriẹ na dia rhiri bẹdẹ,

¹¹rọ reyọ Izrẹl nẹ ohri rayen rhe, kidie ẹguọnọ rọye ro je rhẹriẹ na dia rhiri bẹdẹ;

¹²vẹ obọ ọgangan kugbe igbabọ ra riẹnre, kidie ẹguọnọ rọye rọye ro je rhẹriẹ na dia rhiri bẹdẹ;

¹³vwọ kẹ ohwo rọ ghare Abadi Ọvwavware na ibrive kidie ẹguọnọ rọye ro je rhẹriẹ na dia rhiri bẹdẹ,

¹⁴rọ da vwe Izrẹl wan uherevie rọye vrẹn, kidie ẹguọnọ rọye ro je rhẹriẹ na dia rhiri bẹdẹ,

¹⁵ẹkẹvuọvo ọ da ghwọrọ Fero kugbe otuofovwi rọye phihọ Abadi Ọvwavware na, kidie ẹguọnọ rọye ro je rhẹriẹ na dia rhiri bẹdẹ,

¹⁶vwọ kẹ ohwo ro sun ihwo rọye wan evun re aghwa na, kidie ẹguọnọ rọye ro je rhẹriẹ na dia rhiri bẹdẹ;

¹⁷vwọ kẹ ohwo rọ ghwiẹ ivie ride ghwu, kidie ẹguọnọ rọye ro jẹ rhẹriẹ na dia rhiri bẹdẹ;

¹⁸ro hwe ivie ri kperi usi, kidie ẹguọnọ rọye ro jẹ rhẹriẹ na dia rhiri bẹdẹ,

¹⁹Sihọn, ovie rẹ ihwo rẹ Amọr na, kidie ẹguọnọ rọye ro jẹ rhẹriẹ na dia rhiri bẹdẹ,

²⁰kugbe Ọg, ovie ri Bashan, kidie ẹguọnọ rọye ro je rhẹriẹ na dia rhiri bẹdẹ,

²¹o da vwẹ otọ rayen vwọ kẹ ayen vwọ re uku, kidie ẹguọnọ rọye rọ je rhẹriẹ na dia rhiri bẹdẹ,

²²ukuẹriọ kẹ Izrẹl odibo rọye, kidie ẹguọnọ rọye rọ jẹ rhẹriẹ na dia rhiri bẹdẹ;

²³Ọye ohwo rọ karohọ obo rẹ avwanre kpotọ te, kidie ẹguọnọ rọye ro jẹ rhẹriẹ na dia rhiri bẹdẹ.

²⁴ro de sivwi avwanre nẹ obọ rẹ ivwighrẹ rẹ avwanre, kidie ẹguọnọ rọye ro jẹ rhẹriẹ na dia rhiri bẹdẹ;

²⁵ọye ohwo rọ ghẹrẹ uvwo ejobi, kidie ẹguọnọ rọye ro jẹ rhẹriẹ na dia rhiri bẹdẹ.

²⁶E vwẹ ẹkpẹvwẹ vwọ kẹ Ọghẹnẹ ro vwo odjuvwu, kidie ẹguọnọ rọye ro jẹ rhẹriẹ na dia rhiri bẹdẹ.