Read urhobo Une rẹ Ejiro 139 Bible Online

Une rẹ Ejiro 139 - urhobo bible

Une rẹ Ejiro 139

¹Ọrovwohwo, wọwẹ rẹ hiẹn vwẹ wọ da riẹn vwẹ!

²Wọwẹ re riẹn ọke mi vwo tidia kugbe ọkẹ mi vwo vrẹn; wọwẹ ri vughe iroro mẹ vwẹ ogboko.

³Wọwẹ rẹ hiẹn idjerhe mẹ phia kugbe ẹshẹrhẹn mẹ, wọ riẹn idjerhe mẹ ejobi.

⁴Tavwe rẹ ota ke rhe dia ẹrenvwe mẹ, No, E Ọrovwohwo, ju wọ riẹnrẹ ejobi rẹ.

⁵Wọwẹ rẹ gba phihọ ovwẹ tẹ obuko tẹ obaro, wọ da ghwẹ obọ wẹn kpahe ovwẹ.

⁶Oghẹre rẹ erianriẹn ọtiọna o dẹ gbẹ vwe unu vrẹn; okpenu nọ, obọ mẹ sẹ te-e.

⁷Tivọ me djẹ ra kẹ Erhi wẹn? Eyẹ ki tivọ me djẹ nẹ opharo wẹn ra?

⁸Ọ da dianẹ mi yeri kpo odjuvwu, wọ hẹ etiyin! Ọ da dianẹ me hwa ehwa mẹ phihọ Erivwi, wọ he etiyin!

⁹Ọ da dianẹ me reyọ ibekpe rẹ irhiọke Me da ra dia obo ẹtan rẹ abadi na,

¹⁰Etiyin rhe obọ wẹn de sun vwe, obọrhe wẹn cha yọnrọn ovwẹ.

¹¹Ọ da dianẹ me tare, jẹn ebri ọvo rhurhu vwe, rẹ orẹmrẹ rọ oma mẹ hirhe phihọ ason,

¹²ebri dede na sa dia ebri kẹ wẹ-ẹ, ason pha ghologholo kerẹ uvo; kidie ebri ọ họhọ orẹmrẹ vwẹ obọ wẹn.

¹³Kidie wọwẹ re ma obọ evun mẹ, wọwẹ ri rhuọn vwẹ kugbe vwẹ obo evun rẹ oni mẹ,

¹⁴Mi jiri uwe, kidie wọ vọnre vẹ oshọ kugbe igbunu. Igbunu ọye iruo wẹn epha! Wọwẹ re riẹn vwẹ tototo;

¹⁵esuanson mẹ ejobi si oma nu kẹ wẹ-ẹ, ọke ra vwọ ma vwẹ vwẹ odjahọ, ra ghẹnghẹn phihọ vwẹ obọ okokodo rẹ akpọ na.

¹⁶Ẹro wẹn mrẹ asan ra je ma-a vwẹ oma mẹ; vwẹ evun rẹ ọbe wẹn e si ayen phihọ ọvuọvo, ẹdẹ ra mare vwọ kẹ vwẹ, yẹ ọke yena a je ma ọvuọvo rẹ aye-en.

¹⁷Mavọ iroro wẹn ghare kẹ vwẹ te, E Ọghẹnẹ! Mavọ ekru re ayen reghe te!

¹⁸A da ta nẹ mi gbe kere ayen, ayen bunọ ehavwo, Ọke me da rhọvwọ, me vẹ owẹ je herọ.

¹⁹E mane ku wo hwe ohwo umwemwu vwenẹ, E Ọghẹnẹ, rẹ ihwo rẹ ọbara de bi nu vwe oma,

²⁰ihwo re vwẹ ihuhu gbe ofian phihọ owẹ obọ, re kpare oma kpenu vwọ so owẹ fiki re umiovwo!

²¹Mi rhe tuoma rẹ ayen otu ri tuoma wẹ E Ọrovwohwo? mi rhe tuoma rẹ ayen otu re vwọ so owẹ?

²²Mi tuoma rẹ ayen gangan; Mi kere ayen phihọ ivwighrẹ mẹ.

²³Riẹn vwẹ, E Ọghẹnẹ, re wọ riẹn udu mẹ! Daovwẹ ni re wọ riẹn iroro mẹ!

²⁴Re wọ mrẹ se emu umwemwu he idjerhe mẹ, rere wọ sun vwe vwẹ idjerhe ri bẹdẹ.