Read urhobo Une rẹ Ejiro 144 Bible Online

Une rẹ Ejiro 144 - urhobo bible

Une rẹ Ejiro 144

¹Ebruphihọ kẹ Ọrovwohwo, oragha mẹ, ro yono abọ mẹ kẹ ofovwi, irhiabọ mẹ kẹ ohọnre,

²oragha mẹ, kugbe ogba ọgangan mẹ, asan ọgangan mẹ kugbe osivwi mẹ, ekpọfia mẹ evun wẹn mi de si oma nu, ro chiyi ihwo na ejobi muotọ kẹ vwẹ.

³E Ọrovwohwo, die ohwo tobọ epha ru wo se gbemu, eyẹ ọmọ rẹ ohwo ru wo roro iroro kpaha?

⁴Ohwo ọ họhọ ẹnwẹ, ẹdẹ rọye họhọ uhoho rọ wanvrẹn

⁵Nuẹ idjuvwu na, E Ọrovwohwo, wo wotọ rhe! Vwẹ obọ te igbenu na ri bru ivwirhi

⁶Nyavwaro nẹ enu rhe re wọ hra ayen, sa edada wẹn re wọ vẹn ayen!

⁷Riẹn obọ wẹn nẹ enu rhe, si vwe re wo sivwi uvwe nẹ ame buebu, nẹ abọ rẹ erhorha,

⁸rẹ unu rẹ ayen vwọrọ efian, re obọrhe rọye dia obọrhe rẹ efian.

⁹Me so une ọkpokpọ kẹ wẹ, E Ọghẹnẹ, enu rẹ akpata re ifi ihwe mi de hworo kẹ wẹ,

¹⁰rọ vwẹ obọẹkparọ vwọ kẹ ivie, ro sivwi Devid odibo wẹn.

¹¹Sivwi vwe nẹ ọlọkọ umwemwu, re wo sivwi vwe nẹ obọ rẹ erhorha, rẹ unu rọye vwọrọ efian, re obọrhe rọye dia obọrhe re efian.

¹²Jẹn emọ rẹ avwanre vwẹ emoha rayen họhọ urhe rọ riẹn rho te, emetẹ re avwanre kerẹ uchivwo rẹ ubienyẹ ra mare ke ebabọn rẹ ighẹn,

¹³Jẹn erhu re avwanre vọn, vẹ oka rẹ erọvwọn buebu; jẹn igodẹ rẹ avwanre vwiẹ uriori uriori ihwe vwẹ evun rẹ udju rẹ avwanre;

¹⁴jẹn uchuru rẹ avwanre tue gbrigbri vẹ emọ, e ji vwiẹ chọra-a eyẹ i vwiẹ ghwẹ-eẹ, e ja mrẹ oviẹ rẹ unuebo vwẹ urhuvwu rẹ avwanre-e!

¹⁵Aghọghọ dia kẹ ihwo re ehruphiho ọtiọye she bru! Aghọghọ kẹ ihwo rẹ Ọghẹnẹ dia Ọrovwohwo kẹ.