Read urhobo Une rẹ Ejiro 145 Bible Online

Une rẹ Ejiro 145 - urhobo bible

Une rẹ Ejiro 145

¹Mi mu we kpenu, Ọghẹnẹ mẹ Ovie mẹ, mi bruba kẹ odẹ wẹn rhiri bẹdẹ bẹdẹ.

²Kẹdẹ kẹdẹ mi vwo bruba kẹ wẹ, mi jiri odẹ wẹn bẹdẹ bẹdẹ.

³Orhuarho ọye Ọrovwohwo, o te ohwo re jiri rhuarho, orhuarho rọye a sa hiẹ mrẹ-ẹ,

⁴Uvwiẹ ọvo che jiri iruo wẹn ra ro ọfa, ko che ghwoghwo uruemu rẹ ẹgba wẹn.

⁵Vwe erhuvwu rẹ urinrin vẹ orhuarho wẹn, kugbe iruo rẹ igbunu wẹn, mi roro iroro kpahe.

⁶Ihwo ki che ghwoghwo ẹgba rẹ iruo ri muoshọ wẹn, ki mi ghwoghwo ọrho wẹn.

⁷Ayen che gbe ikun buebu re usi rẹ erhuvwu wẹn, ke van so ine re ọvwata wẹn.

⁸Ọrovwohwo na vẹ ehrọre vẹ arọdọvwe, ọ fobọ mu ophu-u ọ vọnre vẹ ẹguọnọ ro jẹ rhẹriẹ.

⁹Ọrovwohwo yovwi kẹ ihwo ejobi, aruẹdọ rọye herọ vwẹ enu re emu ejobi rọ mare.

¹⁰Iruo wẹn ejobi cha vwẹ ẹkpẹvwẹ kẹ wẹ, E Ọrovwohwo, ihwo efuanfon wẹn ejobi ki bruba kẹ wẹ!

¹¹Ayen che gbe ikun rẹ urinrin rẹ uvie wẹn, kugbe ikun rẹ ogangan wẹn,

¹²re je emọ rẹ ihwo riẹn uruemu rẹ ẹgba wẹn, kugbe erhuvwu rẹ urinrin rẹ uvie wẹn.

¹³Uvie wẹn ọye uvie ri rhiri bẹdẹ, kugbe isuesun wẹn kọ tọn nẹ uvwiẹ re te uvwiẹ ejobi. Ọrovwohwo ohwo rẹ uyota vwẹ eta rọye ejobi, kugbe ehrọre vwẹ uruemu rọye ejobi.

¹⁴Ọrovwohwo na yọnrọn otu ri she ejobi, ọ me kpare otu re gbe oma kpotọ vrẹn.

¹⁵Ẹro rẹ ihwo ejobi ni we, wọ kẹ ayen emuọre rayen vwẹ ọke ororo rayen.

¹⁶Wọwẹ ri rhie obọ wẹn, wọwẹ re vwe obo ri kohwo kohwo ọkpokpọ guọnọre kẹ.

¹⁷Ọrovwohwo na ọsoso vwẹ idjerhe rọye ejobi. ọ vẹ aruẹdọ vwẹ obọ ro ruẹ ejobi.

¹⁸Ọrovwohwo si kẹre otu ri sere ejobi, ayen ejobi ri sere vwẹ uyota,

¹⁹O ruẹ ẹguọnọ rẹ otu re djẹ oshọ rọye gba, ọye ọvo ri nyo oviẹ rayen, o mi sivwi ayen.

²⁰Ọrovwohwo sẹro rayen otu re guọnerọ ejobi; ẹkẹvuọvo ihwo umwemwu ejobi ka ghwọrọ ayen.

²¹Unu mẹ kọ ta ota rẹ ejiro rẹ Ọrovwohwo, re jẹn uvwo ejobi bruba kẹ odẹ ọfuanfon rọye rhiri bẹdẹ bẹdẹ.