Read urhobo Une rẹ Ejiro 18 Bible Online

Une rẹ Ejiro 18 - urhobo bible

Une rẹ Ejiro 18

²Ọrovwohwo na oragha mẹ, kugbe egbe mẹ, kugbe osivwi mẹ, Ọghẹnẹ mẹ, oragha mẹ, evun wẹn me da djahe, ekpọfia mẹ, kugbe ighoro re esivwo mẹ, asan ọgangan mẹ.

³Mi se Ọrovwohwo, ohwo ro fo ejiro, e de sivwi uvwe nẹ obọ rẹ ivwighrẹ mẹ.

⁴Ifi rẹ ughwu gba vwẹ kokoroko, ọkẹre rẹ ughwru re mu vwe;

⁵ifi rẹ Erivwi kru vwe, ugodo rẹ ughwu jẹn phihọ ovwẹ.

⁶Vwẹ evun rẹ ọdjarhe mẹ mi de se Ọrovwohwo; Ọghẹnẹ mẹ mi kperi se nẹ ọ rhe chuko Vwẹ evun rẹ uwevwi rọye o de nyo urhuru mẹ, oviẹ re me viẹ hwe de rhi te erhọn rọye.

⁷Etiyin akpọ na de yeghe o de kpogho, ichivwo rẹ igbenu na de zie i de zie zighi zighi, kidie ophu muro.

⁸Ivwirhi de bru nẹ umwe rọye rhe, erhanre rọ torhẹ de nẹ unu rọye rhe. imwerhanre weiwei de nẹ oma rọye rhe.

⁹Ọ da nuẹ idjuvwu na, o de wotọ rhe, ebri hwi da hẹ obotọ rẹ awọ rọye.

¹⁰Ọ gua vwẹ enu ri chẹrub, ọ da rhan; ọ da rhe kpata kpata vwẹ enu rẹ ibekpe rẹ odju.

¹¹Ọ da ma ebri vwo phopho oma riariẹ, o de bru ẹgbẹ rẹ egho hwi vẹ ame riariẹ oma vwẹ obenu.

¹²Nẹ evun re elo rọ herọ vwẹ obaro rọye etiyin ikoro na da varhe osio re ibieragha kugbe imwerhanre.

¹³Ọrovwohwo je van vwe obo odjuvwu, Oro Me Kpenu na de rhie urhuru rọye, osio re ibieragha kugbe imwerhanre.

¹⁴Ọ da sa edada rọye, ọ da hra ayen, ọ da nyavwe aro, ọ da vẹn ayen.

¹⁵Etiyin ọva re he obotọ re ame da va phia, ichivwo rẹ akpọ na da fa phia, vwe ẹghwọ wẹn, E Ọrovwohwo, vwe aghworo re odju re inwe wẹn

¹⁶O da riẹn obọ ne obenu rhe, ọ da reyọ ovwẹ, o de si we ne evun re ame buebu rhe.

¹⁷O da sivwi uvwe nẹ obọ rẹ ivwighrẹ re pha gangan, kugbe ayen otu ri tuoma me; kidie ayen gan nọ ke vwe

¹⁸Ayen de rhi rhurhu vwe vwẹ ẹdẹ rẹ okpetu mẹ, ẹkẹvuọvo Ọrovwohwo na he egbe mẹ.

¹⁹O de rhi mu vwe phihọ asan ọhẹhẹre, o de sivwi uvwe fikiridie ivun mẹ vwerherọ

²⁰Ọrovwohwo hwa osa kẹ vwẹ kirobo re ọvwata mẹ epha, kirobo re abọ mẹ fon te eriyin ọ hwa osa keẹ vwẹ

²¹Kidie me yọnrọn idjerhe re Ọrovwohwo, me vwẹ uvumwemwu hẹriẹ oma nẹ Ọghẹnẹ mẹ-ẹ

²²Kidie irhi rọye ejobi e he obaro mẹ, mi gbobọ nyẹ iji ro ji kẹ vwẹ-ẹ.

²³Me re abe vwẹ obọ rọye-e mi de si abọ mẹ ne emu rẹ abe.

²⁴Ọtiọye na Ọrovwohwo kọ hwa osa ke vwẹ kirobo rẹ ọvwata mẹ epha, kirobo re abọ mẹ fon te vwẹ obaro rọye.

²⁵Ohwo ro vwo ẹguọnọ esiri ọye wo dje ẹguọnọ esiri wẹn kẹ, ohwo rọ gbare ọye wo dje oma wẹn kẹ gbagba,

²⁶ohwo rọ fonro wọ me vwẹ ọfuanfon wẹn vwọ nẹ, ohwo ro gunuru wọ me vwẹ ogugunu wẹn vwọ phia kẹ

²⁷Kidie wo sivwi ihwo re vwẹ oma kpotọ; ẹkẹvuọvo ohwo vẹ ẹro umwemwu wo sio kpotọ.

²⁸E, we ri rhu urhukpẹ mẹ; Ọrovwohwo Ọghẹnẹ ri rhuẹ urhukpẹ phihọ ebri mẹ.

²⁹E, vwẹ ogangan wẹn me guọghọ urogho, vwẹ oma rẹ Ọghẹnẹ mi se pho wan igbẹhẹ.

³⁰Ọghẹnẹ nana — idjerhe rọye gbare; ive rẹ Ọrovwohwo uyota ọ dia; egbe o ruẹ kẹ ihwo ri si oma nu vwẹ evun rọye

³¹Kidie ono Ọghẹnẹ, ọ dia Ọrovwohwo-o? ono oragha, jokpa rẹ Ọghẹnẹ rẹ avwanre?

³²Ọghẹnẹ rọ vwẹ ogangan rhuo vwe, ro ru idjerhe mẹ fuefu

³³O de ru awọ mẹ kerẹ awọ rẹ uzo, o de mu vwe dẹndẹn phihọ asan ro kpenu.

³⁴O yono abọ mẹ obọ re phie ofovwi, re igbabọ mẹ se si umurhabọ re utehru.

³⁵Wẹ re ke vwẹ ekpọfia rẹ esivwo, obọrhe wẹn da chọ vwẹ, ọchuko wẹn de ru vwe rhọ.

³⁶Wọ da kẹ vwẹ asan ọhẹhẹre ni mi chiyi, awọ mẹ gbe sa ghworiẹ-ẹ.

³⁷Me vwọ tua ivwighrẹ mẹ, me da dje vrẹn ayen, Me rha rhoma-a bẹsiẹ ra ghwọrọ ayen nu.

³⁸Mi de duvwu ayen fi, o gbi jẹn ayen se vrẹ-ẹn; ayen de she teye obotọ rẹ awọ mẹ.

³⁹Kidie wẹ re vwe ogangan chobiẹ ovwẹ kere amwa hẹrhẹ ofovwi, we re nẹrhẹ ihwo ri hwe vwe she teyo obotọ rẹ awọ mẹ.

⁴⁰Wẹ re nẹrhẹ ivwighrẹ mẹ chuko ku vwe, otu ri tuoma mẹ ke me ghwọrọ ayen.

⁴¹Ayen kperi se ọchuko, ekevuovọ o vwo ohwo ọvuọvo ro sivwi aye-en, ayen kperi se Ọrovwohwo, ẹkẹvuọvo ọ cha kpahe kẹ aye-en.

⁴²Me guọghọ ayen vworo vworo kerẹ iwurhie vwọ kẹ odju, Me da chuẹ ayen kufia kerẹ ibehre rẹ urhuvwu.

⁴³We ri sivwi vwe nẹ oseghe re ihwo, wẹ vwe ovwẹ ru olori re ẹgborho na; ihwo re me riẹn dẹvo-o ke ga vwẹ.

⁴⁴Ayen de ghwe nyo urhuru mẹ ke ayen mu ọghọ kẹ vwẹ erhorha ke gbanọ ovwẹ.

⁴⁵Orhiọn rẹ erhọrha na da rhan, ayen da yanrhe vẹ opharie nẹ asan rayen de si oma nu rhe

⁴⁶Ọrovwohwo herọ: ebruba ke oragha mẹ, kpare Ọghẹnẹ rẹ esivwo mẹ kpenu.

⁴⁷Ọghẹnẹ ro reihri kẹ vwẹ rọ vwẹ ihwo na hwa otọ kẹ vwẹ,

⁴⁸ro sivwi uvwe nẹ obọ rẹ ivwighrẹ mẹ; e, ọye kpare ovwẹ kpenu nọ ukọn mẹ, wẹ ri sivwi uvwe ne obọ re ihwo ri gbe ozighi.

⁴⁹Fiki rẹ ọnana ki mi jiri uwe, E Ọrovwohwo, vwẹ ohri rẹ ẹgborho na, ke me so ine rẹ aghọghọ kẹ odẹ wẹn.

⁵⁰Ọ nẹrhẹ ovie rọye nẹ udjẹ rode, o de dje ẹguọnọ rọye ro je rhẹriẹ kẹ ọ rọ vwẹ evwri ghworo, kẹ Devid kugbe uvwiẹ rọye bẹdẹ