Read urhobo Une rẹ Ejiro 22 Bible Online

Une rẹ Ejiro 22 - urhobo bible

Une rẹ Ejiro 22

¹Ọghẹnẹ mẹ, Ọghẹnẹ mẹ, die jabọ re wọ vwọ sen vwẹ? Die jabọ wo vwo sheri kẹ ukoẹcha mẹ, kugbe eta rẹ unuebo mẹ?

²E Ọghẹnẹ mẹ, mi kperi se we vwẹ oghẹruvo ẹkẹvuọvo wo nyori-i, vwe evun rẹ ason, mi ji rhurhu unu-u.

³Ẹkẹvuọvo wọ fonro, wẹ re vwo tidia ekete re ejiro rẹ Izrẹl.

⁴Wẹ esẹ re avwanre vwẹ ẹro so, ayen vwẹ ẹro so, wo de ghine sivwi ayen.

⁵Wẹ ayen kperi se, e de sivwi ayen, wẹ ayen vwẹ ẹro so, oma gbe sa vo aye-en

⁶Ẹkẹvuọvo mẹvwẹ ohori ghevweghe, me dia ohwo-o mẹvwẹ re ihwo mienu phihọ, rẹ ihwo ejobi jẹfia.

⁷Ihwo ejobi re mrẹ vwẹ ke vwẹ ovwẹ jehwẹ, ayen miunu phihọ ovwẹ, ayen kpogho uyovwi rayen,

⁸Ọ vwẹ oma rọye kẹ Ọrovwohwo; gbe jo sivwo, gbe jọ chuko, obo rọ phariẹ kpahọ te na.

⁹Ẹkẹvuọvo wẹ ri si vwe nẹ evun rẹ oni mẹ rheọ wẹ re serọ mẹ egberhenẹde re me vwọ obọ rẹ oni mẹ.

¹⁰E vwiẹ vwẹ nẹ evun rhe teyọ awọ wẹn, wọwẹ Ọghẹnẹ mẹ nẹ evun rẹ oni mẹ rhe.

¹¹Wo sherẹ kẹ vwẹ-ẹ, kidie ukpokpogho kẹire o gbi vwo ohwo ọfa rọ chọ ochọ mẹ-ẹ.

¹²Egbo ride buebu riariẹ ovwẹ phihọ, egbo ride gangan ri Bashan ghare ovwẹ phihọ,

¹³ayen rhie unu rayen te ẹtan hẹrhẹ ovwẹ kerẹ okpohrokpo rọ zagha ro do rọ guọnọ emu muẹ.

¹⁴A kpare ovwẹ ku kerẹ ame, ibeku mẹ ejobi nẹ ẹka; udu mẹ epha kerẹ orhọrhe, rọ wrare vwẹ evun mẹ;

¹⁵Ogangan mẹ yamu kere igbephẹre, ẹrẹnvwe mẹ yamu vwe ọhwa, wọ da vwẹ ovwẹ sherhẹ ekpẹn rẹ ughwu.

¹⁶E, eranko gba riariẹ ovwẹ, usun rẹ iruimwemwu riariẹ ovwẹ phihọ; ayen duvwu abọ mẹ vẹ awọ mẹ fi —

¹⁷Mi se kere ibeku mẹ ejobi — ayen tẹro vi vwe ayen ni vwe hrehrehre;

¹⁸ayen ghare ewun mẹ kẹ oma rẹ ayen, ayen da vwẹ ewun mẹ vwo duvwu itẹ.

¹⁹Ẹkẹvuọvo wẹ E Ọrovwohwo, wo sherẹ kẹ vwẹ-ẹ! E wẹ ogangan mẹ, jọphẹre wọ rhe cha vwẹ uko.

²⁰Sivwi erhi mẹ nẹ oda, arhọ mẹ nẹ ogangan rẹ eranko!

²¹Sivwi uvwe nẹ unu rẹ okpohrokpo, erhi mẹ vwo nẹ ọdjarhe rẹ ighoro re ọharhare.

²²Mi se odẹ wẹn kẹ imoni mẹ vwẹ uherevie rẹ ukoko rode mi de jiri uwe.

²³Ovwan otu re djẹ oshọ rẹ Ọrovwohwo, we jiro emọ ri Jekọp ejobi, a vwẹ urinrin kẹ, we mudia vẹ udidi kẹ, ovwan emọ rẹ Izrẹl ejobi.

²⁴Kidie o ku ẹro fia kẹ ihwo re he okpetu eye ukpokpogho-o, wo si opharo wẹn nu kẹ aye-en ẹkẹvuọvo wọ vwọ viẹ kperi se o nyori.

²⁵Obọ wẹn ọye ejiro mẹ nẹ cha vwẹ evun rẹ ọghwẹgbe rode na; Me hwa osa rẹ ive mẹ vwẹ obaro rẹ otu re djẹ oshọ rọye.

²⁶Ohwo rọ hẹ ukpokpogho cha re, evun me vọn; otu re guọnerọ ki jiri Ọrovwohwo! E jẹn udu wẹn dia bẹdẹ!

²⁷Oba rẹ akpọ na ejobi cha karohọ ri de rhivwi bru Ọrovwohwo; uvwiẹ rẹ ẹgborho na cha ga vwẹ obaro rọye.

²⁸Kidie uvie na ọ rẹ Ọrovwohwo, ọye osun rẹ ẹgborho na ejobi.

²⁹E wẹ ọye otu ri herẹ vwẹ akpọ na ejobi che shiguẹ kẹ otu ri kpo obo ekpẹn vwẹ akpọ na ejobi cha vwẹ uyovwi te otọ kẹ, ohwo se sivwi omaobọ rọye rhọ-ọ.

³⁰Uvwiẹ rọ cha vwẹ obuko cha ga; ihwo ki che gbe ikun rẹ Ọrovwohwo kẹ uvwiẹ rọ cha na,

³¹ke che ghwoghwo esivwo kẹ ihwo re che vwiẹ vwẹ obọ nẹ ọye ri ru ọnana.