Read urhobo Une rẹ Ejiro 25 Bible Online

Une rẹ Ejiro 25 - urhobo bible

Une rẹ Ejiro 25

¹Wẹwẹ, E Ọrovwohwo, me kpare erhi mẹ ni

²E Ọghẹnẹ mẹ, wẹ me vwẹ ẹro so, wo jẹn oma vo vwẹ-ẹ; wo jẹn ivwighrẹ mẹ mrẹ vwẹ ghọghọ-ọ,

³E, wo jẹn ohwo rọ hẹrhẹ owe mrẹ omavovwẹ-ẹ, jẹn oma vo ayen otu re họrhọ ro umwemwu eruo ghevweghe.

⁴Ru vwe me vwọ riẹn Idjerhe wẹn, E Ọrovwohwo; yono uvwe idjerhe wẹn.

⁵Sun vwe wan evun rẹ uyota, re wo yono uvwe, kidie wẹ Ọghẹnẹ rẹ esivwo mẹ; kidie wẹ me hẹrhẹ vwẹ ẹdẹ na ejobi.

⁶Karohọ arodọvwẹ wẹn na, E Ọrovwohwo, kugbe ẹguọnọ wẹn ro je rhẹriẹ, kidie ayen herọ nẹ awanre rhe.

⁷Wọ karọhọ umwemwu rẹ ọkeemọ mẹ-ẹ, eyẹ ọgbeku mẹ na-a; kirobo re ẹguọnọ wẹn rọ rhẹriẹ-ẹ epha karohọ ovwẹ, fiki rẹ erhuvwu wẹn, E Ọrovwohwo!

⁸Ọrovwohwo na ohwo esiri vẹ ọsoso; kọye o vwo yono iruimwemwu phihọ idjerhe na.

⁹O suẹn ihwo dẹndẹn phihọ idjerhe rẹ esiri, o mi yono ihwo dẹndẹn phihọ Idjerhe rọye.

¹⁰Idjerhe rẹ Ọrovwohwo ejobi ẹguọnọ ro jẹ rhẹriẹ vẹ uyota, vwọ kẹ ayen otu re yọnrọn ọphọ kugbe iseri rọye.

¹¹Fiki re odẹ wẹn na, E Ọrovwohwo, vwẹ abe mẹ ghovwo uvwe, kidie ọ rhoro gangan.

¹²Ono he ohwo rọ dje oshọ rẹ Ọrovwohwo? ọye ọ che yono phihọ idjerhe rọye rọ jẹreyọ.

¹³Okpuyovwi rọye cha dia vwe evun re oyouvwe emọ rọye cha re ughwẹ re otọ na.

¹⁴Ugbeyan re Ọrovwohwo eye ihwo re djẹ oshọ rọye, kọ cha vwẹ ọphọ rọye phia kẹ ayen.

¹⁵Me tọn ẹro mẹ vi Ọrovwohwo, kidie ọye cha karhien awọ mẹ ne ufi ro mu vwe na.

¹⁶Kuoma rhẹriẹ bru vwe rhe, re wọ re ehrọre mẹ, kidie mẹvwẹ ọvo herọ kpoghono, me hẹ ukpokpogho.

¹⁷Si ukpokpogho rọ udu mẹ no, wọ reyọ ovwẹ nẹ evun rẹ ọdjarhe mẹ.

¹⁸Roro ọdjarhe mẹ vẹ ukpokpogho mẹ, rere wọ vwẹ imwemwu mẹ vwo ghovwo uvwe.

¹⁹Roro obo rẹ ivwighrẹ mẹ bu te, kugbe obo ri mi tu ayen oma dududu te.

²⁰E sẹro rẹ arhọ mẹ, rere wo sivwi uvwe; wọ ja phọphọ ovwẹ-ẹ, kidie mi si oma mẹ nu vwẹ evun wẹn.

²¹Jẹn evun ọfuanfon vẹ ọsoso sẹro mẹ, kidie me hẹrhẹ owẹ.

²²Tan Izrẹl, E Ọghẹnẹ, nẹ evun rẹ ukpokpogho rọye ejobi.