Read urhobo Une rẹ Ejiro 30 Bible Online

Une rẹ Ejiro 30 - urhobo bible

Une rẹ Ejiro 30

¹Mi jiri uwe, E Ọrovwohwo, kidie wo si vwe reyọ kpenu, o rhe jẹn ivwighrẹ mẹ mrẹ vwẹ ghọghọ-ọ.

²E Ọrovwohwo Ọghẹnẹ mẹ, mi kperi se we nẹ wọ rhe cha vwẹ uko, wo de ghine sivwi vwe.

³E Ọrovwohwo, we ri si erhi mẹ ne Erivwi rhe, wọ da nẹrhẹ ovwẹ varhe nẹ ohri re ihwo re yanran kpo obo Ukpotọ.

⁴So ejiro kẹ Ọrovwohwo, E ovwan ihwo efuanfon rọye, vwẹ ẹkpẹvwẹ kẹ odẹ ọfuanfon rọye,

⁵Kidie ophu rọye dia ọmọke kren, aroesiri rọye o ri rhiri. Oviẹ sa dia kẹ ọke rhie, ẹkẹvuọvo aghọghọ cha vwẹ urhiọke.

⁶Vwọ kẹ vwẹ, me da ta vwe ọyouvwe mẹ, ne e che se ghwie vwe-e.

⁷Vwẹ aroesiri wẹn, E Ọrovwohwo, wọ da vwẹ ovwẹ muotọ kokoroko kerẹ ugbenu ọgangan, wọ de ghine si opharo wẹn nu, ofu de dje vwe.

⁸Wẹ, E Ọrovwohwo, mi kperi se; wẹ, Ọrovwohwo me yare oyare mie;

⁹Ki didi erere re hẹ ughwu mẹ, o da dianẹ mi kpo obo Ukpotọ? Ke iwurhie se jiri uwe? Ko se gbe ikun rẹ esegbuyota wẹn?

¹⁰Nyo, E Ọrovwohwo, wo jẹn ehrọre mẹ re owẹ! E Ọrovwohwo, dia ọchuko mẹ.

¹¹We re rhẹriẹ omaemuohọ mẹ phihọ eha egbe, wo rhan amwa re uvweri mẹ nu wọ da vwe aghọghọ vwo rhuo vwe,

¹²rere erhi mẹ vwo jiri uwe rọ vwọ je fotovwi gbiẹi. E Ọrovwohwo Ọghẹnẹ mẹ, me vwẹ ẹkpẹvwẹ kẹ wẹ bẹdẹ.