Read urhobo Une rẹ Ejiro 31 Bible Online

Une rẹ Ejiro 31 - urhobo bible

Une rẹ Ejiro 31

¹Vwẹ evun wẹn, E Ọrovwohwo, me da guọnọ oma esionẹ; wo jẹ oma vo vwẹ-ẹ, vwẹ evun rẹ ọvwata wẹn sivwi uvwe!

²Rhie erhọn wẹn kẹ vwẹ, sivwi uvwe okpokpakpa! Dia oragha rẹ adjẹrhọ kẹ vwẹ, ogba ọgangan ro sivwi uvwe!

³E, wẹ oragha mẹ kugbe ogba mẹ, fiki re odẹ wẹn sun vwe re wọ sẹro mẹ,

⁴reyọ ovwẹ nẹ ariri re sinu kẹ vwẹ na, kidie wẹ adjẹrhọ mẹ.

⁵Obọ wẹn mi phi erhi mẹ phihọ; we re tan vwẹ, E Ọrovwohwo, Ọghẹnẹ rẹ uyota.

⁶Wo tuoma rẹ ayen otu ri mu ọghọ kẹ oma ofefe; ẹkẹvuọvo me vwe ẹro so Ọrovwohwo.

⁷Oma vwerhe ovwẹ, ke me ghọghọ fiki rẹ ẹguọnọ wẹn rọ je rhẹriẹ, fikiridie wọ mrẹ oma elagha mẹ, wọ nabọ vughe ọdjarhe mẹ.

⁸Wo se phi vwe phihọ obọ rẹ ivwighrẹ mẹ-ẹ, wọ de phi awọ mẹ phihọ asan ọhẹhẹre.

⁹Ni arodọvwẹ mẹ, E Ọrovwohwo, kidie mi ukpokpogho, ẹro mẹ dọnre fiki rẹ uvwerhe, te ẹnwẹ mẹ kugbe ugboma mẹ ejobi rhe.

¹⁰Kidie akpọ mẹ ghwọrọ kufia fiki rẹ oja, ikpe mẹ ejobi vẹ unuẹfiọn, ogangan mẹ reri fiki rẹ ọdjorho mẹ, ibeku mẹ ravwiẹ kufia.

¹¹Mẹvwẹ ke ehwẹjẹ ke ukọn mẹ, oshọ emuo kẹ ihwo re dia kerẹ ovwẹ, emu rẹ uguegue kẹ ihwo re riẹn vwẹ ihwo re mrẹ vwẹ vwẹ urhuvwu ke mrẹ vwẹ dje.

¹²Me chọẹro kirobo rẹ ohwo ro ghwuru chọẹro; Me da rhe hoho ehwehwe okpan.

¹³E, mi nyo ophiọrọ re otu buebu — oshọ vwi kabọ kabọ — rẹ ayen vwọ rua ero kpahe ovwẹ, rẹ ayen vwọ jẹ iroro re vwo hwe vwe! —

¹⁴Ẹkẹvuọvo me vwẹ ẹro so owẹ, E Ọrovwohwo, me tare nẹ, Wẹ ọye Ọghẹnẹ mẹ.

¹⁵Ọke mẹ ọ hẹ obọ wẹn; sivwi uvwe nẹ obọ rẹ ivwighrẹ mẹ kugbe otu ri mu vwe!

¹⁶Jẹn opharo wẹn lo mu odibo wẹn; sivwi uvwe vwẹ evun rẹ ẹguọnọ wẹn ro jẹ rhẹriẹ na!

¹⁷Wọ jẹn oma vo vwẹ-ẹ, E Ọrovwohwo, kidie mi kperẹ se we; jẹn oma vo oruimwemwu, jẹn ayen diunu ghwu kpo Erivwi.

¹⁸Jẹn unu rọ vwọrọ efian di, rọ ta ota rẹ arueyivwo kpahe ọvwata vwe eheri kugbe ehwẹjẹ.

¹⁹E mavọ erhuvwu wẹn bute, ru wọ rhuẹrẹ kpahe kẹ ihwo re dje oshọ wẹn, ru wo ru kẹ ihwo ri si oma rayen nu vwẹ evun wẹn, vwẹ obaro rẹ emọ rẹ ihwo.

²⁰Vwẹ uhoho rẹ opharo wẹn, etiyin wo de si ayen nu nẹ ẹro rẹ ihwo, we re yọnrọn ayen vwẹ otọ rẹ urhurho wẹn ne oseghe rẹ ẹrenvwe buebu.

²¹Ebruphihọ kẹ Ọrovwohwo, kidie o dje ẹguọnọ rọye rọ rhẹriẹ-ẹ kẹ vwẹ vwẹ idjerhe rẹ igbunu ra vwọ hwa riariẹ ovwẹ phihọ kerẹ orere re phiẹ.

²²Me da ta vwẹ evun rẹ ọfianvwe mẹ, A djẹ vwẹ sheri nẹ obaro wẹn. Ẹkẹvuọvo wẹ ri nyo oyare mẹ, ọke mi vwo kperi se ukoẹcha wẹn

²³Guọnọ Ọrovwohwo, ovwan ihwo efuanfon rọye ejobi! Ọrovwohwo na sẹro re ihwo ri sere gbuyota, ẹkẹvuọvo ọ me rha hwa osa buebu ke ihwo re vwe evun ọnko nene yeri.

²⁴Gan oma, re wo jẹn udu wẹn yivwaro, ovwan ejobi re hẹrhẹ Ọrovwohwo na.