Read urhobo Une rẹ Ejiro 34 Bible Online

Une rẹ Ejiro 34 - urhobo bible

Une rẹ Ejiro 34

¹Mi bruphihọ kẹ Ọrovwohwo vwẹ ọke ejobi, ejiro rọye dia unu mẹ kọke kọke.

²Erhi mẹ vwẹ Ọrovwohwo yan eyan; jẹn ọ re kpokpo nyo re ọ ghọghọ.

³E nene uvwe bru ọrho phihọ Ọrovwohwo oma, jẹn avwanre koko kpare odẹ rọye kpenu!

⁴Me guọnọ Ọrovwohwo, o de nyo kẹ vwẹ, o de sivwi uvwe nẹ oshọ mẹ ejobi.

⁵No, opharo wẹn kọ sasa, eriyin na oma gbe sa vo opharo wẹ-ẹn.

⁶Ovwiogbere nana kperi se, Ọrovwohwo de nyo kẹ, o de sivwo nẹ ukpokpogho rọye ejobi.

⁷Amakashe rẹ Ọrovwohwo mu erhọn riariẹ ayen otu re djẹ oshọ rọye, o de sivwi ayen.

⁸E davwe re wọ mrẹ nẹ Ọrovwohwo yoma! Aghọghọ dia kẹ ohwo ro sioma nu vwẹ evun rọye!

⁹E djẹ oshọ rẹ Ọrovwohwo na, ovwan ihwo efuanfon rọye, kidie ihwo re djẹ oshọ rọye sa mrẹ ọkarovwẹ-ẹ!

¹⁰Emọ rẹ okpohrokpo sa mrẹ ọkarovwe kugbe owẹvwe, ẹkẹvuọvo ayen otu re guọnọ Ọrovwohwo emu esiri sa kare aye-en.

¹¹Yanrhe, E emọ, kerhọn mẹ, Mi yono uwe oshọ ẹdjẹ rẹ Ọrovwohwo na.

¹²Didi ohwo re guọnọ arhọ, rọ rioma re ẹdẹ buebu, rọ sa vwọ ghọghọ vwe emu esiri?

¹³Sẹro re ẹrẹnvwe wẹn nẹ umwemwu eruo, rẹ wo si ẹbẹrunu wẹn nẹ ophiẹnvwe.

¹⁴Bi oma kẹ umiovwo, ru ọ re esiri, guọnọ ufuoma, re wọ vwọ tua.

¹⁵Ẹro rẹ Ọrovwohwo re nẹ ọvwata, erhọn rọye rhie phihọ kẹ oviẹ rayen.

¹⁶Ọrovwohwo hirhe opharo ku iruimwemwu, ro vwo phoro ẹkarohọ rayen nẹ otọ rẹ akpọ na.

¹⁷Ọvwata da viẹ se ọchuko, Ọrovwohwo ko nyo, o mi sivwi ayen nẹ ukpokpogho rayen ejobi.

¹⁸Ọrovwohwo na si kẹrẹ otu rẹ udu rayen vwirhiri, o mi sivwi ayen otu rẹ udu rayen ghwọre

¹⁹Ukpokpogho re ọvwata ọpha buebu, ẹkẹvuọvo Ọrovwohwo na sivwo nẹ ayen ejobi.

²⁰O sẹro rẹ ibeku rọye ejobi, ọvuọvo rọye che vwirhi-i.

²¹Umwemwu che hwe ohwo umwemwu; ayen otu ri tuoma rẹ evwata ke bruhwe ayen.

²²Ọrovwohwo sa tan arhọ rẹ idibo rọye; ohwo ọvuọvo ro si oma nu vwẹ evun rọye re che bru hwe herọ-ọ.