Read urhobo Une rẹ Ejiro 35 Bible Online

Une rẹ Ejiro 35 - urhobo bible

Une rẹ Ejiro 35

¹Sivwi oseghe. E Ọrovwohwo, wọ vẹ ihwo ri nene uvwe sivwi oseghe; họnre ihwo ri nene uvwe họnra!

²Reyọ ekpọfia vẹ okurukpẹ ru wo vrẹn rhe cha vwẹ uko!

³Yoro ọlọkọ vẹ ubiri wẹn rhe vwọ so ihwo re vwọ tua vwe! Ta ke erhi mẹ, Mẹvwẹ osivwi wẹn.

⁴Jẹn oma vo ayen ra phọphọ ayen, ayen ihwo re guọnọ erhi mẹ! Jẹn a rhan ayen rhivwi kpo uko wọ harhe ayen re jẹn iroro umwemwu kpahe ovwẹ!

⁵Jẹn ayen dia kerẹ iphopho rẹ odju muẹ, rẹ amakashe rẹ Ọrovwohwo vwọ tua yanran!

⁶Jẹn idjerhe rayen mu ebri rọ ghworiẹ, ye amakashe rẹ Ọrovwohwo vwọ tua ayen!

⁷Emuọvo sorọ-ọ yẹ ayen tan ariri hẹrhẹ ovwẹ; emuọvo sorọ-ọ yẹ ayen tọn uyere hẹrhẹ erhi mẹ.

⁸Jẹn oghwọrọ rhi shenyẹ ayen kpregede! Gbe jẹn ariri rẹ ayen vwọ tan na rhoma mu ayen; jẹn ayen sheruọ re ayen ghwu phihọ!

⁹Etiyin erhi mẹ kọ ghọghọ vwẹ evun rẹ Ọrovwohwo, kọ ghoriẹ vwẹ evun rẹ esivwo rọye.

¹⁰Ibeku mẹ ejobi ke cha ta, E Ọrovwohwo kono re họhọ owẹ, wọwẹ ro sivwẹ ọvwiẹrẹ na nẹ obọ rẹ ohwo rọ ganọ kẹ, ọvwiẹrẹ vẹ ọ rọ bẹn nẹ obọ rẹ ohwo ro miovwo?

¹¹Iseri rẹ ogbarogba vrẹn vwọ so vwẹ, ayen nọ vwẹ ekpẹn rẹ obọ ri mi jẹriẹn.

¹²Ayen vwẹ umwemwu hwa osa rẹ ẹse kẹ vwẹ; erhi mẹ serọ.

¹³Ẹkẹvuọvo mẹvwẹ, re ayen vwọ mwọga — Mi de rhuo amwa rẹ uvweri, Mi de chiri oma mẹ owẹvwe. Me da ne ẹrhovwo gbe uyovwi mẹ phihọ agada,

¹⁴kerẹsiẹ rẹ ivun e de miovwo uvwe vwọ kẹ ugbeyan eyẹ oniọvo mẹ, Mi muẹ yan kerẹ ohwo rọ viẹ oni rọye, gbe uyovwi otọ vwẹ uvweri.

¹⁵Ẹkẹvuọvo me da ghwa yẹghrẹ ayen mi ghwe bi koko vwẹ aghọghọ, ayen ghwẹ koko vwọ so vwẹ, ikpihwo re me riẹnre-e ke phọphọ ovwẹ o rhe fue-e,

¹⁶ehwẹjẹ ko djc ebuebuo phihọ, ayen ra ria ako kpahe ovwẹ.

¹⁷Mavọ okrite, E Ọrovwohwo, ru wọ fọ ghiẹi te? Sivwi vwe nẹ ẹrhaphiẹ rayen, arhọ mẹ nẹ obọ rẹ ikpohrokpo!

¹⁸Etiyin ke me kpẹvwẹ owẹ vwẹ evun rẹ ọghwẹgbe rode na, vwe evun rẹ obibinagba na mi de jiri uwe.

¹⁹Wo jẹn ayen ghọghọ ovwẹ-ẹ ayen otu re jẹ vwẹ eghrẹ ekueku, wo jẹn ayen vwirhi uvwe ẹro-o ayen otu ri di tuoma mẹ ghevweghe.

²⁰Kidie ayen ta ota rẹ ofuoma-a, ẹkẹvuọvo vwọ kpahe ayen re pha fuefu vwẹ otọ na eye ayen je iroro omiomiovwi kpaha.

²¹Ayen rhie unu rayen wranran hẹrhẹ ovwẹ, ayen ra tanẹ, Ọwọhọ, Ọwọhọ ẹro re avwanre mrẹrẹ nure.

²²Wọ mrẹre nureo, E Ọrovwohwo; wo fotovwi-i! E Ọrovwohwo, wọ sherẹ keẹ vwẹ-ẹ.

²³Jẹjẹ oma wẹn, rhọvwọ kidie o vi we, fiki rẹ oyan mẹ, Ọghẹnẹ mẹ kugbe Ọrovwovwe!

²⁴Brorhiẹ mẹ, E Ọrovwohwo, Ọghẹnẹ mẹ, kirobo rẹ ọvwata wẹn epha, wọ jẹn ayen ghọghọ ovwẹ-ẹ!

²⁵Wo jẹn ayen ta ke oma rayen nẹ, Ọwọhọ, avwanre mrẹ obo rẹ udu rẹ avwanre guọnọ nure! Wo jẹn ayen rha tanẹ, Avwanre roro nure-e

²⁶Jẹn oma vo ayen wo zighi ayen kugbe re ghọghọ vwẹ okpetu mẹ! Jẹn a vwo omaẹvuọ vẹ ophọphọvwe vwo rhuo ayen re kpare oma kpenu vwọ so vwe!

²⁷Jẹn ayen otu re guọnọ ase mẹ kperi ukperi rẹ aghọghọ rẹ oma vwerhe ayen, re ayen ta kọke kọke, Ọrovwohwo rhoro gangan, ro vwo omavwerhe vwẹ erhuvwu rẹ odibo rọye!

²⁸Etiyin ẹrenvwe mẹ ko gbe ikun rẹ ọvwata wẹn kugbe ejiro wẹn vwẹ ẹdẹ na ejobi.