Read urhobo Une rẹ Ejiro 37 Bible Online

Une rẹ Ejiro 37 - urhobo bible

Une rẹ Ejiro 37

¹Wọ phariẹ vwi fiki rẹ oruimwemwu-u, wọ rioma kpahe ohwo ro ruẹ oruchọ-ọ.

²Kidie ayen che vwioro kerẹ ẹbe rẹ aghwa, ke cha fa kerẹ ẹbe rẹ urhe ọkpokpọ.

³Vwẹ ẹro so Ọrovwohwo, ru wo ru ọ re esiri ko wọ dia otọ na, oma ko fu we.

⁴Jẹn oma rẹ Ọrovwohwo vwerhe owẹ kọ vwẹ obo rẹ udu wẹn guọnọre kẹ wẹ.

⁵Phi idjerhe wẹn phihọ obọ rẹ Ọrovwohwo, vwẹ ẹro vwọ suọ, ko ruo kẹ wẹ.

⁶Kọ vwẹ ase wẹn phia kerẹ uvo, iruo esiri wẹn kerẹ uherevie rẹ uvo.

⁷Hwe oma mu kẹ Ọrovwohwo, re wo vwe erhiori hẹrhẹ, wọ phariẹ fiki rẹ ohwo ọfa rẹ idjerhe rọye yovwi kẹ-ẹ, eyẹ vwẹ enu rẹ ohwo rọ jẹ iroro umwemwu.

⁸Jẹ ivuemiovwo vwo, rere wo jẹ ophu vwo! Wọ phariẹ-ẹ ọ da nẹrhẹ owẹ ru imwemwu

⁹Kidiea cha nyavwe oruimwemwu kufia; ẹkẹvuọvo ayen otu re hẹrhẹ Ọrovwohwo na ke cha vwẹ otọ na reuku.

¹⁰Ọmọke krẹ, oruimwemwu gbe cha dia-a, wọ da tọn ẹro vi otọ ni ẹdia rọye a gbe cha mrẹ-ẹ.

¹¹Ẹkẹvuọvo ihwo dẹndẹn ri che vwo otọ na, vwẹ evun rẹ oyovwe rode kọye ayen da gọlọ.

¹²Oruimwemwu ra jẹn iroro kpahe ọvwata, ọ ra re ako rọye kpahọ,

¹³ẹkẹvuọvo Ọrovwohwo ra hwẹ ohwo umwemwu, kidie ọ mrẹre nẹ ẹdẹ rọye ra cha.

¹⁴Ohwo umwemwu yọnrọn oda o ji si umurhabọ rọye phihọ re, ro vwo hwe ovwiogbere vẹ ọ rọ bẹn, rere ọ rhi vwo hwe ohwo rẹ ọsoso,

¹⁵oda rayen cha rhoma bru udu rayen, ke vwirhi umurhabọ rayen

¹⁶Emerha rẹ evwata vwori yoma nọ efe buebu re oruimwemwu vwori

¹⁷Kidie e che vwirhi igbabọ re oruimwemwu; ẹkẹvuọvo Ọrovwohwo yọnrọn ọvwata,

¹⁸Ọrovwohwo na riẹn ẹdẹ rẹ ohwo esiri, ughwẹ rayen cha dia bẹdẹ,

¹⁹Oma sa vọ ayen vwe ọke re ukpokpogho-o, vwẹ ọke owẹvwe evun sa vọn ayen.

²⁰Ẹkẹvuọvo oruimwemwu cha ghwọrọ, ivwighrẹ rẹ Ọrovwohwo cha họhọ urinrin re ẹbe rẹ aghwa, ayen cha ranvwiẹ kufia kerẹ ivwirhi.

²¹Oruimwemwu momo, ẹkẹvuọvo ọ sa hwa rhivwi-i, ẹkẹvuọvo ọvwata nẹ arodọvwẹ ọ me hwa,

²²kidie ihwo rẹ Ọrovwohwo bruphihọ kẹ cha re erere rẹ otọ na, ẹkẹvuọvo ihwo ro harhere na ka nyavwe ayen kufia

²³Ichiyi rẹ ohwo obọ rẹ Ọrovwohwo o nẹ cha ohwo rẹ idjerhe rọye jere ọye o ruẹ gan;

²⁴o de she dede, o phre ikule-e, kidie Ọrovwohwo vwẹ obọ rọye yọnrọn.

²⁵Me dia omotete jovwo re, vwẹ asakiephana me rha ghwore; ẹkẹvuọvo me je mrẹ ọvwata ra senre-e eyẹ emọ rọye re yare emu re ke ria-a.

²⁶O siẹ obọ nẹ kẹ ayen o momo kẹ ayen buebu, emọ rọye da rhe dia ebruphihọ.

²⁷Siobọ nẹ imwemwu, ru ọ rẹ esiri; eriyin na ko wọ dia bẹdẹ.

²⁸Kidie Ọrovwohwo guọnọ ọsoso, ọ cha sa sen ihwo efuanfon rọye na-a ọ sẹro rẹ ọvwata bẹdẹ, ẹkẹvuọvo emọ rẹ oruimwemwu ka nyavwe ayen kufia.

²⁹Ọvwata cha re ughwẹ rẹ otọ na, kọ dia enu rọye bẹdẹ.

³⁰Udu rẹ ọvwata ẹghwanre ọ vwọ ta ota, ẹrẹnvwe rọye ta ota ọsoso.

³¹Urhi rẹ Ọghẹnẹ rọye ọ hẹ evun rẹ udu rọye ichiyi rọye sa ghworiẹ-ẹ.

³²Oruimwemwu ra rhẹrẹ ọvwata, ọ rọ guọnọ teya hwe.

³³Ọrovwohwo che se phio phihọ obọ-ọ, eyẹ e che se bru hwe vwẹ ọke re de vwo guẹdjọ-ọ.

³⁴Hẹrhẹ Ọrovwohwo, rere wọ sẹro rẹ idjerhe rọye, kọ kpare owẹ kpenu ra re ughwẹ re otọ na; ẹro wẹn kọ cha mrẹ ẹghwọrọ rẹ oruimwemwu.

³⁵Me mrẹ oruimwemwu vwẹ evun re ogangan rode re, ọ da rho kpenu kerẹ uloho ri Lẹbanọn.

³⁶Me rhoma wanvrẹn, mi de no, me gbe mrẹ ọfa-a; Me da nabọ fuẹrẹ, a gbe sa mrẹ-ẹ.

³⁷Ka oka phihọ ohwo ro je abe ẹriọ na, re wo ni ohwo rọ dia ọsoso, kidie oba rẹ ohwo yena ufuoma.

³⁸Ẹkẹvuọvo ohwo ro ruẹ ogbigbiru ka cha ghwọrọ kufia, oba rẹ oruimwemwu ka nyavwọ kufia.

³⁹Esivwo rẹ ọvwata obọ rẹ Ọrovwohwo o nẹ cha; ọye odjahọ rayen vwẹ ọke rẹ ukpokpogho.

⁴⁰Ọrovwohwo cha ayen uko o mi sivwi ayen, o sivwi ayen nẹ obọ rẹ ihwo umwemwu, ọ me sẹro rẹ ayen, kidie ayen si oma nu vwe evun rọye.