Read urhobo Une rẹ Ejiro 38 Bible Online

Une rẹ Ejiro 38 - urhobo bible

Une rẹ Ejiro 38

¹E Ọrovwohwo, ghwọ ku vwe ọ dia evun rẹ ophu wẹ-ẹn eyẹ wọ fa vwẹ vwẹ ivuemiovwo wẹ-ẹn!

²Kidie ibigẹ wẹn kporo ro vwẹ oma, obọ wẹn de rhi bru vwe rhe.

³Uvwo rẹ oma mẹ de ghwudirhẹ kpimẹ fiki rẹ ivuemiovwo wẹn, ibeku mẹ gbi vwọ oma ọkpokpọ-ọ fiki rẹ imwemwu mẹ.

⁴Kidie orukuruku mẹ phoro uyovwi mẹ, e họhọ nọ oghwa kẹ vwẹ.

⁵Era mẹ bruru ki gbo ọnrhe fiki rẹ ughẹghẹ mẹ,

⁶Mi de wurhu tototo me da riẹn gbere otọ; Mi re muomahọ vwẹ ẹdẹ na ejobi.

⁷Kidie orhẹ mẹ vọnre ko mu vwe torhẹ, uvwo rẹ oma mẹ ghwodirhẹ kpimẹ

⁸Me ranvwiẹ re tototo oma bruku; Me ra guan vwi fiki rẹ oseghe rọ hẹ udu mẹ.

⁹Ọrovwohwo, ẹroerhe mẹ ejobi wọ riẹn ayen, unuẹfiọn mẹ djahe kẹ wẹ-ẹ.

¹⁰Udu mẹ ra teya, ogangan mẹ reri; urhukpẹ rẹ ẹro mẹ fu ju vwe vwo.

¹¹Igbeyan mẹ vẹ otu mẹ mudia tephe kẹ ọga mẹ, imoni mẹ mudia tephe kẹ vwẹ.

¹²Otu re guọnọ erhi mẹ kpahe ufi hẹrhẹ ovwẹ, otu re guọnọ oma ẹwan mẹ ra ta ota rẹ ẹghwọrọ, ayen ra jẹ iroro rẹ ogbarogba kpahe ovwẹ vwẹ ẹdẹ na ejobi.

¹³Ẹkẹvuọvo me họhọ odierhọ, mi nyo ẹme-e, kerẹ odiunu ro jẹ unu rọye erhie.

¹⁴E, me họhọ ohwo ro jẹ ẹme enyo, re ekan ọvuọvo he unu rọye-e.

¹⁵Ẹkẹvuọvo wẹ, E Ọrovwohwo, me hẹrhẹ; We, E Ọrovwohwo Ọghẹnẹ me, ọye ri nyo vwe.

¹⁶Kidie me re, takpe wo jẹn ayen ghọghọ ovwẹ-ẹ, ayen otu re yeyan kpahe ovwẹ vwẹ ọke rẹ owọ mẹ vwọ ghworiẹ!

¹⁷Kidie mi ro muegbe rẹ eshe, yẹ odjadja mẹ vẹ ovwẹ je herọ.

¹⁸Me fan orukuruku mẹ, ọ da vwẹ kẹ imwemwu mẹ.

¹⁹Ayen otu re dia ivwighrẹ mẹ ekueku ganre gangan, buebu di tuoma mẹ ghevweghe.

²⁰Otu re vwẹ umwemwu hwa osa rẹ erhuvwu kẹ vwẹ ayen ukọn mẹ fikiridie mi nenesi rẹ uyoyovwi.

²¹Wọ sen vwe-e, E Ọrovwohwo! E Ọghẹnẹ mẹ, wo sherẹ kẹ vwẹ-ẹ!

²²Jọphẹrẹ rhe cha vwẹ uko, E Ọrovwohwo, esivwo mẹ!