Read urhobo Une rẹ Ejiro 40 Bible Online

Une rẹ Ejiro 40 - urhobo bible

Une rẹ Ejiro 40

¹Mi hwe oma mu hẹrhẹ Ọrovwohwo; ọ ka erhọn mẹ o de nyo oviẹ mẹ.

²O de si vwe nẹ ukpotọ ro tephe shesheri, nẹ evun rẹ ibehre tikan, ọ da ghwẹ awọ mẹ kpahe enu rẹ oragha, ọ da vwẹ ichiyi mẹ muotọ kokoroko.

³O de phi une ọkpokpọ phihọ unu mẹ, une rẹ ejiro kẹ Ọghẹnẹ rẹ avwanre. Buebu ke mrẹ kẹ ayen djẹ oshọ, ke ayen vwe ẹro so Ọrovwohwo na

⁴Ebruphihọ kẹ ohwo rọ vwẹ ẹro so Ọrovwohwo, rọ rhẹriẹ oma bru ohwo ro herẹ-ẹ, ro bru ihwo ri ghwru nene eghẹnẹ rẹ efia-an!

⁵E Ọrovwohwo Ọghẹnẹ mẹ, wo rhoma rhi ru bu phihọ, iruo rẹ igbunu wẹn kugbe iroro wẹn ke avwanre; a sa mrẹ ohwo re vwo dje we-e. a da tanẹ e gbe ikun re ayen, i bunọ obo re se keri.

⁶Izobo re zeri vẹ ẹkpẹvwẹ wọ guọnọre-e, ẹkẹvuọvo wọ kẹ vwẹ erhọn rọ rhie phihọ. Izobo rẹ ẹtorhẹ kugbe Izobo rẹ umwemwu wọ guọnọre-e.

⁷Etiyin me da ta, Nighe, me cha; vwe evun rẹ e kpirho re ọbe na e siro kpahe ovwẹ,

⁸Me vwo omavwerhe ru ọhọre wẹn, E Ọghẹnẹ mẹ; urhi wẹn ọ hẹ evun re udu mẹ

⁹Mi gbe ikun rẹ aghọghọ rẹ esivwo vwẹ evun rẹ ukoko rode na; nighe, mi ji rhurhu ẹbẹrunu mẹ-ẹ, kirobo wọ riẹnre, E Ọrovwohwo.

¹⁰Mi si ota rẹ esivwo rẹ ọchuko wẹn nu vwe evun re udu mẹ-ẹ. Me ta ota re esegbuyota wẹn kugbe esivwo wẹn, Mi ji si ẹguọnọ ro jẹ rhẹriẹ na kugbe esegbuyota wẹn na nu ke ukoko wẹn rode na-a

¹¹O dia owẹ, E Ọrovwohwo, ri si arodọvwẹ wẹn nu ke vwe-e, jẹn ẹguọnọ wẹn rọ jẹ rhẹriẹ na kugbe esegbuyota wẹn sẹro mẹ kọke kọke!

¹²Kidie ihwo umwemwu buebu re je se kere yariẹ ovwẹ phihọ; orukuruku mẹ re vwe phihọ te asan mi de je orẹ ẹmrẹ; ayen bu nọ ẹto rẹ uyovwi mẹ; udu mẹ phiẹn vwẹ.

¹³Jo je we, E Ọrovwohwo, re wo sivwi uvweọ! E Ọrovwohwo, jọ phẹre wọ rhe cha vwẹ uko!

¹⁴Jẹn oma vo ayen tototo re wo phi ozighi phihọ ayen oma e re guọnọ arhọ mẹ frẹ reyọ! Jẹn a dje ayen rhivwi rere a phọphọ ayen re guọnọ ovwẹ woma!

¹⁵Jẹn ofu dje ayen fiki re omaẹvuọ rayen re ta kẹ vwẹ nẹ, Owọhọ, Owọhọ!

¹⁶Ẹkẹvuọvo jẹn ayen otu re guọnọ owẹ ghọghọ re oma vwerhe ayen fiki weẹ! Jẹn ayen otu re guọnọ esivwo wẹn ta kọke kọke nẹ, Ọrovwohwo rhoruọ!

¹⁷Vwọ kẹ vwẹ, mẹvwẹ ovwiogbere rẹ akpọ bẹn; ẹkẹvuọvo yẹ Ọrovwohwo karophihọ ovwẹ. Wọwẹ ọchuko mẹ kugbe osivwi mẹ, wo krẹ-ẹ, E Ọghẹnẹ mẹ.