Read urhobo Une rẹ Ejiro 44 Bible Online

Une rẹ Ejiro 44 - urhobo bible

Une rẹ Ejiro 44

¹Avwanre vwẹ erhọn rẹ avwanre nyo E Ọghẹnẹ, esẹ rẹ avwanre ta kẹ avwanre, iruo ru wo ruru vwẹ ọke rayen, vwẹ ọke re awanre.

²Wọ da vwe obọ wẹn ọvo djẹ ẹgborho na kufia, ẹkẹvuọvo ayen kọye wọ kọn phihọ, wọ da vwẹ osọnọ vwọ re ihwo na, ẹkẹvuọvo ayen kọye wo siobọ nu,

³kidie ọ dianẹ kẹ ogangan rẹ ọlọkọ rayen ayen vwo vwo otọ na-na, eye ke igbabọ rayen ayen vwo phi kparobọ-ọ, ẹkẹvuọvo obọrhe wẹn, kugbe igbabọ wẹn, kugbe urhukpẹ rẹ arhanre wẹn; kidie ivun re ayen vwehe owẹ

⁴Wọwẹ Ovie mẹ kugbe Ọghẹnẹ mẹ, re vwẹ ọbọẹkparọ vwọ kẹ Jekọp.

⁵Vwẹ ogangan wẹn me vwo gere ivwighrẹ she; vwẹ odẹ wẹn me vwo chiyi ihwo ri hwe avwanre muotọ.

⁶Kidie ọ dia umurhabọ me vwẹ ẹro so-o, eyẹ ọlọkọ mẹ sivwi uvwe-e

⁷Ẹkẹvuọvo we ri sivwi avwanre nẹ obọ re ivwighrẹ re avwanre, ayen otu ri tuoma re avwanre wo de bi ayen phihọ ozighi

⁸Ọghẹnẹ ma vwọ yan eyan kọke kọke, ke ma vwẹ ẹkpẹvwẹ kẹ odẹ wẹn bẹdẹ

⁹Dede na wẹ re dje avwanre kufia wọ da vwẹ avwanre gbotọ, wọ rha yan nene unuofovwi rẹ avwanre-e.

¹⁰Wẹ re nẹrhẹ avwanre chuko ku ivwighrẹ rẹ avwanre, ivwighrẹ re avwanre da ghwe ekuakua reyọ.

¹¹We ri ru avwanre kere igodẹ re che hwe, wọ da hra avwanre ro ẹgborho na ejobi

¹²Wẹ re shẹ ihwo wẹn fiki re emu ghevweghe. wọ nọ ekpẹn re emuọvo mie aye-en.

¹³We ri ru avwanre ehwẹjẹ, vwọ kẹ irivẹ re avwanre, ejẹfia vẹ oma ẹphọphọ kẹ otu re riariẹ avwanre.

¹⁴Wọ da vwẹ avwanre bru ọhare vwẹ ohri rẹ ẹgborho na, emu re ehwẹjẹ vwe ohri re ihwo na

¹⁵Vwẹ ẹdẹ na ejobi yẹ omaẹvuọ mẹ ọ hẹ obaro mẹ, omaẹvuọ de rhurhu opharo mẹ,

¹⁶vwẹ oma rẹ ohwo rọ jehwẹ vẹ ọ ro bọphiẹ vwẹ irharo rẹ ọvweghrẹ kugbe orẹihri.

¹⁷Enana ejobi rhi she nyẹ avwanre, dede yu wọ jẹ chọrọ avwanre ẹro-o, eyẹ gbe ni ọphọ wẹn saka-a.

¹⁸Udu rẹ avwanre ji rhivwi kpo uko-o, eyẹ ichiyi rẹ avwanre je ghworiẹ nẹ idjerhe wẹ-ẹn,

¹⁹ku wọ guọghọ avwanre vwẹ asan rẹ ẹrhan ẹpha vwọnẹ, wọ da vwẹ ebri hwi vwo rhurhu avwanre.

²⁰Ọ dianẹ odẹ rẹ Ọghẹnẹ rẹ avwanre chọrọ avwanre ẹro, eyẹ ma da riẹn obọ rẹ avwanre bru eghẹnẹ ẹfa,

²¹kẹ Ọghẹnẹ rha mrẹ otọ rẹ ọnana-a? Kidie ọye re riẹn odjahọ rẹ udu.

²²Ẹjo, fiki wẹ e vwo hwe avwanre ghwẹ vwẹ ẹdẹ na ejobi, e de kere avwanre kerẹ igodẹ re che re hwe.

²³Jẹjẹ oma wẹn! Die wọ vwọ vwerhẹ, E Ọrovwohwo? Vrẹn! Wo ku avwanre fia bẹdẹ-ẹ!

²⁴Die wo vwo si opharo wẹn nẹ? Diẹ osọnọ vẹ oshẹnyẹ rẹ avwanre vwọ chọrọ owẹ ẹro?

²⁵Kidiẹ ẹnwẹ re avwanre wurhuru re te otọ; oma rẹ avwanre tamu ekpẹn

²⁶Vrẹn, yanrhe re cha avwanre uko! Sivwi avwanre fiki rẹ ẹguọnọ wẹn ro jẹ rhẹriẹ na.