Read urhobo Une rẹ Ejiro 51 Bible Online

Une rẹ Ejiro 51 - urhobo bible

Une rẹ Ejiro 51

¹Ni aruẹdọ mẹ, E Ọghẹnẹ, kerẹ ọtiobo rẹ ẹguọnọ ro jẹ rhẹriẹ wẹn bute, kerẹ ọtiobo re aruẹdọ wẹn bute, phoro ogbeku mẹ nu

²Họ vwẹ kakare nẹ orukuruku mẹ, rere wọ hworhẹ ovwẹ nẹ imwemwu mẹ,

³Kidie me riẹn ogbeku mẹ umwemwu mẹ ọ he obaro mẹ.

⁴Wọwẹ ọvo, mi ru imwemwu kpahe, mi ru obo re brare vwẹ obaro wẹn, wọ vwọ re ase vwẹ ẹdjọeguo wẹn rere wọ vwọ je abe ẹriọ vwẹ orhiebro.

⁵Nighere, a mrevun mẹ vwẹ evun rẹ orukuruku, vwẹ evun rẹ imwemwu oni mẹ de vwiẹ vwẹ

⁶Nighere, wọwẹ re guọnọ uyota ro ne evun rhe; fiki rẹ ọtiọye na gbe yono uvwe aghwanre vwẹ udu mẹ.

⁷Reyọ ahworhẹ vwọ họ vwẹ ke me fon; họ vwẹ, ke me fon vrẹn imicho.

⁸Vwe aghọghọ vẹ ornavwerhe vọn vwẹ evun; jẹn ubeku ru wo vwirhiri jovwo ghọghọ.

⁹Si opharo wẹn nu ke imwemwu mẹ, ru wo phoro orukuruku mẹ nu.

¹⁰Ma udu ọfuanfon phihọ evun mẹ, E Ọghẹnẹ ru wo phi erhi ọkpokpọ wẹn phihọ udu mẹ.

¹¹Wọ djẹ vwẹ nẹ obaro wẹ-ẹn, wọ reyọ Erhi ọfuanfon wẹn na mie vwe-e.

¹²Vwẹ aghọghọ rẹ esivwo wẹn rhivwi rhe vwe, rere wọ vwẹ erhi rẹ ẹserọphẹ wẹn yọnrọn ovwẹ.

¹³Etiyin ki mi yono igburhi na idjerhe wẹn, iruimwemwu ki rhivwi bru we rhe.

¹⁴Sivwi vwe nẹ abe re ọbara, E Ọghẹnẹ, wẹ Ọghẹnẹ re esivwo mẹ, ẹrenvwe mẹ ko so ine re esivwo wẹn phia.

¹⁵E Ọrovwohwo, rhie ẹbẹrunu mẹ, rere unu mẹ vwọ vwẹ ejiro wẹn phia

¹⁶Kidie oma re izobo vwerha owẹ-ẹ a da tanẹ me torhẹ izobo kẹ wẹ, e cha vwerhe owẹ ivu-un.

¹⁷Izobo re Ọghẹnẹ reyọ vwonẹ ọye erhi rọ guọghọre; udu rọ guọghọre kugbe udu ọfuanfon, E Ọghẹnẹ, wo sian otu nana-a

¹⁸Ru uyoyovwi ki Zayọn vẹ omavwerhe, rhoma bọn igbẹhẹ ri Jerusalẹm.

¹⁹Kẹsiẹye izobo re ọsoso ke vwẹrhe owẹ oma, izobo ẹtorhẹ kugbe ekru rẹ izobo ẹtorhẹ; Tavwe a ke vwẹ irhuẹn gọ wẹ vwẹ enu rẹ ẹshẹ wẹn.