Read urhobo Une rẹ Ejiro 52 Bible Online

Une rẹ Ejiro 52 - urhobo bible

Une rẹ Ejiro 52

¹Die wọ vwọ yan eyan, E ọgba re ohwo na re umwemwu ru wo ru kpahe ohwo esiri? Vwe ẹdẹ na ejobi wọ ra je iroro rẹ ẹguọghọ.

²Ẹrenvwe wẹn pha dandan kerẹ anre, wọwẹ oruiruo re ogbarogba na.

³Wọ guọnọ umiovwo nọ erhuvwu, efian nọ uyota ru wọ ta

⁴Wọ guọnọ eta ri muẹ ohwo ria, E ẹrenvwe re ophiẹnvwe na.

⁵Ẹkẹvuọvo Ọghẹnẹ cha guọghọ owẹ phihọ otọ bẹdẹ; o che fru we rọ da bẹre owẹ nẹ utughẹ wẹn, o che ghwie we karekare nẹ otọ rẹ ihwo ekpọkpọ na.

⁶Ọvwata kọ cha mrẹ, kọ djẹ oshọ, kọ cha hwẹ, tanẹ,

⁷Nighe ohwo rọ vwẹ Ọghẹnẹ ru odjahọ rọye-e, ẹkẹvuọvo ọ de vwe ẹro so efe buebu rọye, o de re si oma nu vwẹ evun re efe rọye.

⁸Ẹkẹvuọvo me họhọ urhe rẹ oliv ọkpokpọ wọnwọnwọn vwe evun re uwevwi rẹ Ọghẹnẹ. Me vwẹ ẹro so ẹguọnọ rẹ Ọghẹnẹ ro jẹ rhẹriẹ bẹdẹ bẹdẹ.

⁹Me sa kpẹvwẹ owẹ bẹvwẹdẹ, fikiridie we ri ruro. Mi ghwoghwo odẹ wẹn, kidie o yovwiri, vwe irharo rẹ ihwo esiri.