Read urhobo Une rẹ Ejiro 59 Bible Online

Une rẹ Ejiro 59 - urhobo bible

Une rẹ Ejiro 59

¹Sivwi uvwe nẹ obọ rẹ ivwighrẹ mẹ, E Ọghẹnẹ mẹ, chochọ mẹ nẹ obọ re ihwo ri vrẹn vwọ so vwẹ,

²Sivwi uvwe nẹ obọ rẹ ihwo ri ru iruo umwemwu, wo sivwi uvwe nẹ obo rẹ ihwo rẹ urhuru re ọbara siẹ.

³Kidie, no, ayen hwa hẹrhẹ arhọ mẹ, ihwo re djoma se oma kokọ vwọ so vwẹ O dia fiki re ogbeku eye umwemwu mẹ-ẹ, E Ọrovwohwo,

⁴ọ dia fiki rẹ oruchọ mẹ-ẹ, ye ayen dje ra hwa hẹrhẹ ovwẹ Jẹjẹ oma wẹn, mọ rhe cha vwẹ uko, wọ mrẹ!

⁵Wẹ, Ọrovwohwo Ọghẹnẹ rẹ otuofovwi, wẹ Ọghẹnẹ rẹ Izrẹl. Vrẹn wo re hwe ẹgborho na, wọ yan je ihwo ogbarogba ọvuọvo vwo re ayen je iroro umwemwu-u.

⁶Kovwọnvwọn kọvwonvwọn ayen mi rhivwi rhe, ayen ra guan kere eranko ayen ra kọn yariẹ orere na.

⁷Etiyin ayen epha, ayen ra vwe unu rayen hworo owanre, ayen ra vwe ẹbẹrunu rayen fie ahọre kidie, Onọ, ayen rori, ri se nyo avwanre?

⁸Ẹkẹvuọvo wẹ, E Ọrovwohwo, che hwe ayen; wẹ re cha vwẹ ẹgborho na ejobi jehwẹ

⁹E Ogangan mẹ, me so ejiro kẹ wẹ; kidie wẹ, E Ọghẹnẹ, ọye asan odjahọ mẹ.

¹⁰Ọghẹnẹ mẹ evun rẹ ẹguọnọ rọye ro jẹ rhẹriẹ na wọ da vwa vwẹ; Ọghẹnẹ mẹ ju vwe vwẹ ẹro re obọẹkparọ ni ivwighrẹ mẹ.

¹¹Wo hwe aye-en, ọ da nẹrhẹ o chọrọ ihwo mẹ ẹro; jẹn ogangan wẹn gẹrẹ ayen ọchọn, rere wọ vwẹ ayen rhiotọ; E Ọrovwohwo, ekpọfia rẹ avwanre!

¹²Fiki rẹ umwemwu rẹ unu rayen, ota rẹ ẹbẹrunu rayen, jẹn ufi re eheri rayen mu ayen. Fiki rẹ iyori rẹ ayen duvwẹ kugbe efian rẹ ayen vwọrọ,

¹³Vwẹ ophu wẹn torhẹ ayen, ghwọrọ ayen bẹsiẹ rẹ ayen vwo nọ kakare, rere ihwo vwọ riẹn nẹ Ọghẹnẹ ria uvie vwi Jekọp rhiri re te oba rẹ akpọ na.

¹⁴Kọvwọnvwọn kovwonvwọn kẹ ayen rhivwi cha, e guan kerẹ eranko e ra kọn yariẹ orere na.

¹⁵Ayen re muẹ yan fiki rẹ emuọre, ayen mia guan ọ da dianẹ evun vọn aye-en

¹⁶Ẹkẹvuọvo me so ine re ẹgba wẹn; Me so ine rẹ ẹguọnọ wẹn ro je rhẹriẹ vwẹ irhiọke. Kidie wọwẹ asan odjahọ kẹ vwẹ asan rẹ oma esiono vwẹ ọke rẹ ukpokpogho

¹⁷E Ogangan mẹ, me so ejiro kẹ wẹ, kidie wẹ, E Ọghẹnẹ, wẹ he odjahọ mẹ, Ọghẹnẹ rọ dje ẹguọnọ ro je rhẹriẹ rọye kẹ vwẹ.