Read urhobo Une rẹ Ejiro 64 Bible Online

Une rẹ Ejiro 64 - urhobo bible

Une rẹ Ejiro 64

¹Nyo urhuru mẹ, E Ọghẹnẹ, vwẹ iguegu mẹ; Serọ rẹ arhọ mẹ ne oshọẹdjẹ rẹ ivwighrẹ mẹ,

²Sivwe nẹ ẹhwaphihọ rẹ ihwo umwemwu, nẹ iroro ẹjẹ rẹ iruimwemwu,

³re nọ ẹrenvwe rayen dandan kere ọlọkọ, re vwẹ ota ọbrabra sa ohwo kere edada,

⁴re sa ohwo rọ re ase nẹ asan rọ da hwaphihọ cha, rọ sa kpregede jẹ oshọ muo-o.

⁵Ayen churu obọ mu iroro omiomiovwi rayen na kokoroko, ayen bẹbẹ ta ota re ufi ẹkpahọ, ayen roro nẹ, Kono sa mrẹ avwanre?

⁶Kono sa hiẹ oruchọ re avwanre phia? Avwanre vwe ona jẹn iroro rẹ ero ọvo. Kidie iroro rẹ obo evun rẹ ohwo pha kokodo!

⁷Ẹkẹvuọvo Ọghẹnẹ cha vwẹ odada rọye sa ayen; a cha wan ayen oma kpregede.

⁸Fiki re ẹrẹnvwe rayen ko che sun ayen kpo ughwru, ayen ihwo re mrẹ ayen ejobi ki kpogho uyovwi.

⁹Etiyin ihwo ejobi ke djẹ oshọ ke ayen che gbe ikun rẹ obọ rẹ Ọghẹnẹ ruru, ayen ki che roro obo ro ru nure.

¹⁰Jẹn ọvwata ghọghọ vwẹ evun rẹ Ọrovwohwo na, rere o si oma nu vwẹ evun rọye! Gbe jẹn ihwo rẹ udu rayen dia ọsoso ghọghọ.