Read urhobo Une rẹ Ejiro 66 Bible Online

Une rẹ Ejiro 66 - urhobo bible

Une rẹ Ejiro 66

¹Do ẹdo rẹ aghọghọ kẹ Ọghẹnẹ, akpọ na ejobi;

²So urinrin rẹ odẹ rọye; vwẹ ejiro rẹ urinrin vwọ kẹ!

³Ta kẹ Ọghẹnẹ, Mavọ iruemu wẹn mu udidi te! ọtiọye ogangan wẹn rho te rọ nẹrhẹ ivwighrẹ wẹn siẹ wunrhẹ vwẹ obaro wẹn

⁴Akpọ na ejobi gọ wẹ; ayen sua ejiro kẹ wẹ, ayen sua ejiro kẹ odẹ wẹn.

⁵Yanrhe wọ rhe mrẹ obo rẹ Ọghẹnẹ ruru, o muoshọ vwẹ uruemu rọye vwẹ ohri rẹ ihwo.

⁶Ọ rhẹriẹ abadi phihọ otọ ọyaya; ihwo da vwẹ owọ wan urhie na vrẹn. Etiyin avwanre da ghọghọ vwẹ oma rẹ obo ro ruru,

⁷ọ ro suẹn vwẹ ẹgba rọye bẹdẹ, rẹ ẹro rọye rhẹrẹ ẹgborho na — wo jẹn ihwo okpetu na mu oma rayen kpenu-u.

⁸Bruphihọ kẹ Ọghẹnẹ rẹ avwanre, E ihwo, we je nyo edo rẹ ejiro rọye,

⁹Ohwo rọ sẹro rẹ avwanre vwẹ ohri rẹ ihwo ekpokpọ o rhe jẹn owọ rẹ avwanre ghworiẹ-ẹ.

¹⁰Kidie wẹ, E Ọghẹnẹ, re davwẹ avwanre wọ davwẹ avwanre kirobo ra wran idọnọ.

¹¹Wẹ rhe reyọ avwanre rhi vwo mu ariri, wẹ rhi kru odjadja nyẹ ehun rẹ avwanre;

¹²Wẹ re nẹrhẹ ayen gua vwẹ enu rẹ uyovwi rẹ avwanre; avwanre wan erhanre vrẹn je wan ame vrẹn; dede na wọ da je vwẹ avwanre rhi vwo te asan ophephẹ.

¹³Me cha rhe uwevwi wẹn vẹ izobo rẹ ẹtorhẹ, Me cha hwa osa rẹ ive mẹ kẹ wẹ,

¹⁴ọ rẹ ẹbẹrunu mẹ tare na rẹ unu mẹ veri re me vwọ ukpokpogho.

¹⁵Mi che ze izobo rẹ ẹtorhẹ rẹ eranvwe vẹ ivwri kẹ wẹ, vẹ ivwirhi rẹ izobo rẹ egbo, Mi ze izobo rẹ erhuẹn ọshare vẹ ẹvwe.

¹⁶Mọ wo nyo, ovwan ejobi re djẹ oshọ rẹ Ọghẹnẹ ki mi gbe obo ro ru kẹ vwẹ.

¹⁷Me viẹ kperi se, mi de jiro vẹ ẹrenvwe mẹ.

¹⁸Ọ da dianẹ me ghẹrẹ orukuruku vwẹ udu mẹ, Ọrovwohwo sa kerhọn mẹ-ẹ

¹⁹Ẹkẹvuọvo vwẹ ọ rẹ uyota Ọghẹnẹ kerhọn mẹ nure; ọ nabọ davwerhọn rẹ urhuru rẹ ẹrhovwo mẹ.

²⁰Ebruphihọ kẹ Ọghẹnẹ, fikiridie ọ sa sen ẹrhovwo mẹ-ẹ eyẹ o si ẹguọnọ rọye ro jẹ rhẹriẹ na nu kẹ vwẹ-ẹ.