Read urhobo Une rẹ Ejiro 68 Bible Online

Une rẹ Ejiro 68 - urhobo bible

Une rẹ Ejiro 68

¹Jẹn Ọghẹnẹ vrẹn, jẹn a hra ivwighrẹ rọye, jẹn otu ri tuoma rọye va djẹ vwẹ obaro rọye!

²Kirobo rẹ ivwirhi djuẹ yanran na, eriyin wọ djẹ ayen kufia, kirobo rẹ orhọnrhe wran vwẹ erhanre na, jẹn ohwo umwemwu ghwọrọ vwẹ obaro rẹ Ọghẹnẹ.

³Ẹkẹvuọvo gbe jẹn ọvwata ghọghọ; jẹn ayen mu oma kpenu vwẹ obaro rẹ Ọghẹnẹ; jẹn oma vwerhe ayen vẹ aghọghọ;

⁴So ine kẹ Ọghẹnẹ, so ejiro kẹ odẹ rọye; kpare une kẹ ohwo rọ gua vwẹ enu rẹ egho; odẹ rọye ọye Ọrovwohwo, ghọghọ vwẹ obaro rọye!

⁵Ọsẹ rẹ ọmọphrorivwi ọchochọ rẹ eyauku ọye Ọghẹnẹ vwẹ ẹdia ọfuanfon rọye.

⁶Ọghẹnẹ vwẹ uwevwi kẹ ohwo ra kua jovwo dia; o sun ihwo re he uwodi ra mrẹ oyouvwe ẹkẹvuọvo ihwo ri muẹ kpahe ihwo otọ oyaya kpahra ọ vwọ ke ayen dia.

⁷E Ọghẹnẹ, ọke wọ da karo kẹ ihwo wẹn, ọke wo de chiyi wan evun rẹ aghwa,

⁸otọ na ko kpogho, odjuvwu da rhọ osio phihọ otọ, vwe obaro rẹ Ọghẹnẹ; abọ oboyi ri Sinae de kpogho vwẹ obaro rẹ Ọghẹnẹ, Ọghẹnẹ rẹ Izrẹl na.

⁹Osio da rhọ buebu, E Ọghẹnẹ, wọwẹ re rhọrọ ro asan ejobi; wọwẹ ri rhivwi vwẹ ukuẹriọ wẹn ra rhaphiẹ na rhe;

¹⁰igegede wẹn mrẹ asan dia vwẹ evun rọye, vwẹ erhuvwu wẹn, E Ọghẹnẹ, wẹ re ke ihwo rẹ akpọ bẹn.

¹¹Ọrovwohwo ri ji urhi na, otu re ghwẹ iyẹnrẹ esiri na kẹ ibuebu,

¹²Ivie re otuofovwi na, ayen dje, ayen dje! eya re he uwevwi ra ghare ekuakua,

¹³owenẹ ayen dia ohri rẹ ogba rẹ igegede ibekpe rẹ ilekuku ra vwe idọnọ phare, iphoro rẹ ọrhan rọye a vwẹ oro vwọ pharọ

¹⁴Ọke re Ọrovwogangan vwọ hra ivie vwẹ etiyin, imicho de she vwi Zalmọn.

¹⁵E ugbenu rẹ ọgba na, ugbenu ri Bashan; E ugbenu rọ tan eghọn buebu, ugbenu ri Bashan!

¹⁶Die wo vwo nẹ vẹ omẹriọ, E ugbenu rọ tan eghọn buebu, vwẹ ugbenu rẹ Ọghẹnẹ guọnọre kẹ ẹdia rọye, e, asan rẹ Ọrovwohwo dia bẹdẹ?

¹⁷Vẹ ekpẹrẹ rẹ ofovwi ride, uriori ihwe akuava, uriori kpahe uriori, Ọrovwohwo na de nẹ Sinae rhe rhe ro edia ọfuanfon na.

¹⁸Wọwẹ ghine yere ugbenu ro kpenu na, wo re siẹ ighuvwu nene oma, e re ru ẹse kẹ wẹ vwẹ ohri rẹ ihwo, mrẹmrẹ vwẹ ohri rẹ ihwo re vwọ so wẹ, rere Ọrovwohwo Ọghẹnẹ vwọ sa dia etiyin.

¹⁹Ebruphihọ kẹ Ọrovwohwo, rọ vwi kẹdẹ kẹdẹ mu avwanre kpenu, Ọghẹnẹ esivwo rẹ avwanre.

²⁰Ọghẹnẹ rẹ avwanre ọye Ọghẹnẹ rẹ esivwo, Ọghẹnẹ Ọrovwohwo na, ọye abọẹva rẹ ughwu rheri.

²¹Ẹkẹvuọvo Ọghẹnẹ cha guọghọ iyovwi rẹ ivwighrẹ rọye, erhu rẹ ẹtuẹto ke ohwo rọ yan vwẹ idjerhe rẹ abe

²²Ọrovwohwo na tare, Me sa reyọ ayen rhivwi nẹ Bashan rhe, Me sa reyọ ayen nẹ obọ okokodo rẹ abadi rhe,

²³rere wọ hworhẹ awọ wẹn vwẹ ọbara, rere ẹrenvwe rẹ eranko wẹn vwo se vwo ẹkẹn rayen nẹ obọ rẹ ivwighrẹ na rhe.

²⁴Usun dọdọdọ wẹn a mrẹrẹ, E Ọghẹnẹ, usun rẹ Ọghẹnẹ mẹ, Ovie mẹ, vwo kpo obo ẹshẹ —

²⁵ibuine na hẹ obaro, emetẹ re ghwie abọ e hẹ obuko, vwẹ uvwre rayen kẹ etiyin emetẹ na de hworo ukiri;

²⁶Bruba kẹ Ọghẹnẹ vwẹ evun rẹ ukoko rode na, Ọrovwohwo, E wẹ ro nẹ ogbugbu rẹ Izrẹl rhe na!

²⁷Etiyin Bẹnjamin epha, rọ dia omotete vwe ohri rayen ejobi, ọye ri sun ayen, isun ri Juda vwẹ usun rayen gidi gidi na, isun ri Zebulọn, emọ rẹ ivie ri Naftali.

²⁸Se ogangan wẹn koko, E Ọghẹnẹ; dje egba wẹn phia, E Ọghẹnẹ, wọwẹ wian kẹ avwanre.

²⁹Fiki rẹ uwevwi wẹn vwi Jerusalẹm ivie ki ru ese rhe we

³⁰Ghwọ ku eranvwe re dia uherevie rẹ eyareya na, ekru re Irhuẹn eshare vẹ upene rẹ ihwo na Ke vwe awọ chiyi ihwo re vwẹ urhuru toro igho muotọ, hra ihwo re guọnọ ofovwi.

³¹Jẹn a ghwe erọvwọ nẹ Ijipt rhe; jẹn Itiopia bru okpakpa riẹn abọ rọye bru Ọghẹnẹ.

³²So ine kẹ Ọghẹnẹ, E uvie rẹ akpọ na; so ejiro kẹ Ọrovwohwo na,

³³ke ohwo rọ gua vwẹ idjuvwu na, idjuvwu rẹ awanre na; nighe, o je urhuru rọye cha, urhuru rẹ egba rọye na

³⁴Ọghẹnẹ ri vwo ogangan, re ọrho rọye hẹ enu rẹ Izrẹl ejobi, egba rọye da he obenu na.

³⁵Ọghẹnẹ muoshọ vwẹ ẹshẹ rọye, Ọghẹnẹ rẹ Izrẹl na, O vwẹ egba vẹ ogangan kẹ ihwo rọye. Ebruba ke Ọghẹnẹ!